落街打羽毛球慘被活力阿婆扣殺，心情好低落: 8

係去商場既路上，我同呢個阿婆都有少少眼神接觸
佢側面真係好熟悉，一行近佢仲散發住一種非一般阿婆氣質

「你唔帶眼鏡既咩?」我唔知點解會咁問佢

佢望向我微笑 :「我睇到野呀」


呢個笑容，令我諗返起以前







還記得當日我係眾目睽睽之下嘔左四眼妹件飯團
仲打爆埋佢眼鏡

「你有無事呀」我摸一摸四眼妹個頭

「無事..」

四眼妹下意識做出拓眼鏡手勢，完全唔記得副眼鏡已經碎晒係地下




我望住佢雙眼
由我認識四眼妹開始，我好少有機會同佢四目交投
我完全比佢雙眼吸引到入左神

「喂」四眼妹叫一叫醒我
我從佢雙眼走返出黎

係喎!
四眼妹日日都要讀書，要快d買返副眼鏡比佢






阿sir見狀走上前問我 :「你點呀?」

我無回應，走左去裁判面前示意我要退出比賽



「你傻左呀?」阿sir蚊左我埋牆
我 :「係」


果次，我失去左我學界比賽第一個冠軍
我由細到大定立既我的志願-做不敗將軍，失敗左.....
離開體育館時，師生都顯得平靜，但一臉疑惑
黑人青年向我舉起倒轉既手指公






「我帶你去買副新眼鏡先」我拉住四眼妹隻手，步出體育館大門..



「喂」
我從阿婆既雙眼走返出黎，原來已經到左體育用品店