人來人往,你為甚麼要回來找我...: 25

  新的一年剛開始，便要迎接兩星期的考試。
  總算熬過去了。
  「Over，聽唔聽到？」張晞易捧起試卷：「跟住落黎派卷喇。」
  「今次出黎既結果係有少少嚇親我既，因為全班第一名既人係周子若。」
  周子若？
  我碰一下拿著試卷回來的她：「又會咁勁既。」
  雖然拿到第一名的不是自己，可是也替她高興。
  「唔？其實我都無乜點溫過。」
  「未見過有人攞第一仲咁串。」
  「咁係丫嘛，呃你做咩啫？」




  「你有咩可能會勁得過張───」
  「張卓蓉，你今次既成績好唔掂呀，點解可以退步左咁多架？」張晞易說：「我真係接受唔到囉。」
  張卓蓉一臉木然地走出來，接過張晞易手中的考卷：「唔該。」
  「咁又唔洗咁灰心既，我睇好你架，下次同我考返個第一返黎。」
  「哦。」她點點頭。
  她發生了甚麼事……
  「良。」周子若輕聲地說。
  「唔？」
  「一陣可唔可以陪我去一個地方？」
 




  我倆在放學後徒步走到湖山河畔公園。
  「行上條橋囉。」她說。
  「嗯。」
  為甚麼她要帶我來到這裡呢？
  我和她雙手伏在欄杆上，望著屯門河裡綠色的水。
  「良，記唔記得……我地第一次見面係幾時啊？」
  算起來，初次見面的時候是……
  「九月一，開學果日。」我說。
  我和她都遲到了，然後她帶著我走到五信班的課室。
  「咁我同你係呢度相遇既時候係幾時？」




  「係呢度？」
  是說跑步的那一次嗎？
  「呃……」
  「九月十二，」她說：「開完綠社既社員大會之後。」
  「做咩？你想我記晒所有日子？」
  這種浪漫的做法倒是挺費神。
  「唔洗，咁就夠喇。」她吁口氣：「記黎都唔一定有用。」
  「不過我想你知道一樣野，」她雙手按著我的肩膀：「無論點都好，我好掛住你。」
  她一把摟住我。
  從未試過摟得這樣緊。
  「我真係好鐘意你啊……」她的聲線開始變得嗚咽。
  「做咩。」我輕撫她的背。
  「我可唔可以……」她望著我的雙眼。
  可以。
  我閉上眼，微微傾著臉，嘴唇貼在她的嘴唇上。




  這一秒好像靜止了。
  在這道屯門河上的橋，只有我和她……
  我張開雙眼，看見她合上的眼滲出了淚水。
  「多謝你。」她將臉頰貼在我的胸膛。
  「唔洗……」又有甚麼好道謝的。
 
  今天是戲劇團最後一次的綵排。
  明天晚上我們就會在屯門大會堂演出。
  「奧菲莉亞，奧菲莉亞你醒下啦，」侯紹龍不停地搖著周子若的雙肩：「克勞迪已經比我殺死左喇。」
  「哈姆雷特……」周子若雙目失神地掃視著四周。
  她的演技實在太好了。
  「我知我之前呃你係唔啱，但係我係有苦衷架……我係因為要為我既父王報仇先至會呃左你咁耐。」侯紹龍眼泛淚光：「我求下你快啲清醒返啦。」
  該到我出場了。
  「奧菲莉亞。」我走上前。
  「你係……吓？」周子若眼眶撐開，往後跌坐在地上：「你咪係已經死左既───」




  「無錯。」我說：「我就係哈姆雷特既爸爸。」
  「咁點解……係咪我都已經死左喇？」
  「唔係咁樣，你本來因為哈姆雷特三返四次咁拒絕你而痴左線。之不過而家你咁樣比我嚇一嚇，又變返正常喇。」
  「呵呵呵……」我盡力模仿一把年老慈祥的笑聲。
  「啊，我既哈姆雷特。」周子若伏在侯紹龍的懷中。
  「奧菲莉亞。」侯紹龍擁著周子若。
  雖然知道他們是在演戲，但是看見這種情景始終……
  有點難受。
  啊草望著手上的劇本：「就係咁，哈姆雷特就同佢既奧菲莉亞開開心心咁生活落去喇，好野。」
  在場所有台前和幕後的人一起鼓掌。
  「做得好好啊你地。」梁老師拍拍雙手：「拿今晚你地返去就早啲休息，聽晚完左先再同你地慶功。」
  「好！」
  「喂，良仔。」侯紹龍叫住我。
  「咩事？」
  「你啱啱唔係吃醋吓嘛？」




  「我邊有……」我聳聳肩：「你地都排左咁多次啦。」
  「就係次次排親都見你好似個心戚住戚住咁。」
  「連個心戚住戚住你都睇得出？」
  「我有名你叫做侯爵喎，」他說：「有咩我睇唔出呀？」
  「拿良仔，聽我講。」他攬著我的肩：「自從酒店果次之後呢，我真係無乜野既。所以你唔洗擔心咁多。」
  「咁我又唔係───」
  「你就算信唔過我都信周子若丫。」
  「唔。」
  「真係唔好以為我係想博啲乜，我衷心祝福你地兩個既。」
  就連侯紹龍也為我送上祝福。
  「多謝。」
  「喂你地兩個做咩仲唔走啊？」周子若把我的背包遞給我：「拿，快啲返屋企抖下啦。」
  「好喇，咁唔傾住，」侯紹龍擺擺手：「聽日加油。」
  「一定。」