人來人往,你為甚麼要回來找我...: 16
一大清早到了鄧肇堅運動場，有不少啦啦隊隊員在熱身。
「一陣等人齊我地練幾次就等下晝正式出喇。」鹿仔凝重地望著我們。
「放鬆啲。」開口的同時我也盡量叫自己放鬆。
「定啦，要做既動作好簡單咩啫。」羅船長搭著我的肩膀。
「你就緊係定架，拎住支旗亂咁舞就得。」黃逸茵說。
「咦，啊茵你幾時返黎架？」鹿仔問。
「啱啱啫。」
「你返黎既時候好趕咩？」
「唔係啊，做咩咁問？」
「你睇你，」鹿仔單膝跪在地上：「鞋帶鬆左都唔知。」
「呃……唔該。」
「啊子良呀，你睇你，」羅船長跪下：「好鬆啊……」
「邊有啊？」我問。
「我頂你……」黃逸欣望著我和羅船長。
練習了幾次後，校長在開幕禮上講了幾句話，為這天的陸運會掀開序幕。
男子甲組四百米的比賽，是我上場的時候。
「喂陳子良，加油啊。」
我找不到一個比周子若更甜美的笑容。
「嗯。」
走到跑道旁集合的地方，看見一個健碩的身影。
紅社的侯紹龍。
「咦，你咪五信班果個陳子良？」他走過來。
「乜你都跑四百米咩？」他按著我的肩胛骨。
「係。」
他指向綠社的看台：「見唔見？」
「見唔見咩？」
「周子若。」
當然看得到。
「佢望過黎喇。」侯紹龍咬牙顫笑：「一陣間，我要佢親眼睇住你……輸比我。」
我一時反應不過來。
「哇哈哈哈哈……」他仰天長笑。
是因為沙灘排球的那一次而對我心生忿恨嗎？
比賽馬上就要開始了……
絕對不可以輸。
「記住我講既野呀良仔。」他在起跑線前蹲下。
不可以。
起步的一瞬間，我應聲彈出，不停地跑，以自己最快的速度衝刺。
看見了嗎？我領在前頭，我是第一位，我又怎會輸給這種氣燄囂張的人？
吸……呼……
胸腔開始支撐不住了，手臂和小腿也感到乏力。
「我行先一步喇。」侯紹龍從我的身邊超越我。
短短二百米，我就已經將渾身的力氣耗盡。
眼睜睜地望著侯紹龍遠去的背影，一個接一個的人在自己的眼前走過。
我輸了。
「侯爵好型啊。」幾個紅社的女孩在終點處為侯紹龍按肩捶臂。
「係咪呢？」他喝口水，然後對著我說：「話左我一定會贏你架啦。」
我輸得很徹底……
「贏就係贏，輸就係輸。」
我想不出半句可以反駁的話。
「你永遠都無可能贏到我架喇，」他望著從遠處走過來的周子若：「無論係邊方面……都係一樣。」
他轉身離去。
可惡……
「佢啱啱同你講左啲咩？」周子若問。
「周子若，我可唔可以問你一個問題……」
「問啦。」
「你會唔會鐘意侯紹龍？」
「你煩唔煩啲？我尋日咪答左你囉。唔會呀！」
「咁聽日呢……」我忍著淚水：「咁後日呢？」
「陳子良，望住我。」
她雙手托著我的下巴。
「唔該你聽清楚。」
她的姆指溫柔地按著我的臉頰。
「無論發生任何事，我鐘意既人都唔會變。」
我望著她。
「知道未？」她把臉靠前。
「我……」
「好喇，返上去喇。」
發軟的雙腿變成了兩根僵硬的木頭。
「仲唔行？」她回頭看著我。
「哦……」
吃過飯，啦啦隊的比賽快要開始了。
「咁多位，之前我有咩唔啱，有咩唔著既地方，好對唔住。」林惠喻說：「跟住落黎，就係將我地練過既野拎出黎比人睇既時候，我地一定要團結，跳得好好睇睇呀！」
「好！」
「綠社！」
這樣就對了。
周子若換了啦啦隊的隊服，胖胖的身軀撐著綠色的綿衣……
真的很漂亮。
「好喇各位同學，跟住落黎既時間就係啦啦隊比賽既時間。」
整個看台一陣哄動和尖叫。
「好好好，靜一靜先。跟住落黎歡迎我地第一隊既啦啦隊，就係……綠社！」
我們拿著銀色的啦啦球逐一走進跑道。
「綠社！」
全部人盤著雙手，垂下頭……就等音樂開始的一刻。
節奏開始了，一致地抬頭，舉起手。
強而有力。
進入雙人舞的部分，不能有絲毫的出錯。
「跳得好好。」周子若說。
「你都係。」
在鹿仔的悉心指導下，黃逸茵的節奏感進步了許多。
他們倆真合拍。
實在太刺激了，在周子若的身旁，這麼多的人注視著自己……
幸虧她帶我走進綠社。
「朱咕力出黎喇，加油。」
「收到。」
眾人往左右兩邊讓開。
鹿仔將手中的啦啦隊拋在地上，上前跳過巧克力。
趙尚文也做到了。
該我了。
一、二───跳！
著地……卻站不穩。
「良！」
周子若衝過來推著我的手臂，使我不致失衡倒地。
「多謝你……」
「快啲企位，仲有唔夠八拍時間。」她說：「頂埋佢。」
我走到拿著社旗的羅船長身邊。
「拿，頂硬上啊子良。」
我和他交換了一個堅定不移的眼神。
跳完最後一段舞步，我們疊起來，擺出一個架式。
總算完成了。
「綠社！」看台上傳來一陣歡呼。
「掂啊。」羅船長舉起拳頭。
「算啦……」周子若望著紅色的地面：「已經跳得好好。」
「啱啱好對唔住啊。」我說。
「都唔係你既錯。」
我的失誤確實影響了啦啦隊整體的評分。
「下晝繼續比心機啦。」她說。
「我會。」
男子甲組四百米的接力賽開始召集了。
「啊文你真係唔跑？」小豬一邊說一邊繫著釘鞋的鞋帶。
「係呀連名都填埋喇，」趙尚文說：「去去去。」
「咁我地行喇。」啊狗說。
「記住攞個金牌返黎呀。」
小豬、鹿仔、啊狗和我四個人……
盡力而為吧。
「咦良仔，乜又係你呀？」侯紹龍笑著說：「今朝輸唔夠，而家黎輸多次比我呀？」
「你講乜野呀侯紹龍？」啊狗搶上前。
「我話，你今朝輸唔夠，而家仲要───」
「講野唔好咁串好喎。」小豬也忍不住破口。
「對唔住囉……呵唔。」他還要打個呵欠。
「你───」在啊狗想出掌打侯紹龍的一剎那，我從後挾住他。
「唉，而家啲人真係好唔掂，郁啲就郁手郁腳。」侯紹龍將臉靠到啊狗面前：「你唔係真係以為你夠我打吓嘛？」
「喂侯爵，仲企係度做咩？快啲去第三接棒區啦。」不遠處一個紅社社員大喊。
「好即刻黎！」侯紹龍回頭望著我們：「唔得閒同你地慢慢玩喇。」
「你因住黎！」啊狗掙開了我。
「綠社等輸啦！」
侯紹龍……
「快啲去你地既接棒區啦。」鹿仔說：「要教訓佢，唔係用拳頭。」
「而係用腳。」我意會到鹿仔的意思。
「好。」
「睇佢威得幾耐。」小豬咬著牙。
「哈哈，係咪認真得滯。」鹿仔摸摸後腦勺。
「對住佢呢亭人，唔認真唔得。」
「咁多位，」我伸出手：「我地一定要……」
「贏！」
不僅是為了綠社，還有為了侯紹龍的一口氣。
我們四個人各就各位，第一棒的鹿仔凝重地蹲下，遠眺著前方。第二棒是小豬，第三棒是啊狗。
第四棒───就是我。
「砰！」
輕盈的鹿仔馬上搶上前，領在前頭一直跑，小豬接棒後，在直路上將距離拉得更遠。
我想起了早上發生的事。
不可能發生的。
在第三棒的啊狗起動時，黃社和紅社的運動員根本還未到達。
氣勢凌厲的他沿彎道漸漸貼近我……
「去呀！」啊狗將棒交到我的掌心。
我拔腿就跑，向前衝的我不忘回頭一望。
侯紹龍接棒後不停地加速。
不能輸給他！
他愈逼愈近了……
啊───
我在他超越我之前衝過了終點線。
「得左喇！」在終點等候著我的小豬整個人跳起來。
沒錯，我們成功了。
「豬隊友。」侯紹龍把接力棒往地上一擲。
「聽講啱啱紅社有條友好串架喎。」啊狗望著他。
他沒有答話。
看著倨傲的侯紹龍落得這個樣子，全身發燙的我心頭不禁感到一陣涼快。
「侯爵……」他身後一個紅社的社員搭著他的肩膀。
「唔好掂我！」侯紹龍撥開他的手。
「淨係識得賴隊友既人，永遠唔會進步。」小豬盤起雙手。
「收聲，」侯紹龍瞪著我們：「唔好係度教我點做點做。」
算罷，像他這種自負的人，根本就聽不進別人的話。
「贏就係贏，輸就係輸。」我刻意地冷笑幾聲：「走囉。」
「好。」
一整天下來，最重要的時刻到了。
究竟啦啦隊比賽的冠軍誰屬呢？
站在跑道上的社幹事們全都默不作聲……
頒獎的老師一直宣佈著一些奪得個人獎項的名字，聽得我緊皺著眉頭。
啦啦隊，我要聽的是啦啦隊。
「好喇，跟住落黎要頒發既係啦啦隊比賽既獎項。」
來了來了……
「本年度陸運會啦啦隊比賽既季軍係……黃社！」
黃社的社幹事和啦啦隊隊員湧出來領獎。
「亞軍係……」
會是誰？
「紅社！」
太好了！
綠社和紅社同時間響起一陣哄動，綠社所分享的喜悅明顯比紅社的更多。
「我地贏左呀！」羅船長胸前的一雙拳頭不停地抖動。
鹿仔興奮得一把摟著黃逸茵，黃逸茵沒有把他推開，兩人一直雙擁著。
「周子若。」我望向她。
卻只見她呆呆地睜著雙眼。
「我地真係……贏左呀？」
「係啊。」我按住她的雙臂搖晃，想要把她喚醒：「我地真係冠軍呀，你唔係發緊夢呀。」
「陳子良。」她並沒有如我想像中那樣尖叫，也沒有跳起來。
她一把抱住我。
我全身顫了一下。
「你真係做得好好。」
「吓？我頭先明明跳錯左。」
「如果唔係你，綠社就無可能攞冠軍。」
她哭了。
「喂……唔好喊啦，」我感到有點失措：「我未試過有女仔係我膊頭喊架。」
「嗯……」
「而且比女仔咁樣攬住都係第一次。」
「哈哈。」
比起眼淚，我更喜歡你迷人的甜笑。
「喂，我地今晚一於食餐勁既。」趙尚文邊走邊說。
「正呀喂。」羅船長搶上前。
「又係蝴蝶邨果幾間呀？」我問。
「咁就緊係唔係啦。」趙尚文拍拍雙手：「今日我地去……東城！」
「東城？」
「打邊爐呀，你唔係未去過吓嘛？」趙尚文半張著口。
「咁我又真係未去過。」
東城這個名字讓我想起一家在天水圍的火鍋酒家，名叫羊城。
「佢今年先入黎屯門住，」羅船長說：「唔怪得佢。」
「哦……原來係咁。」
「我地係咪行過去呀？」
「搭507啦。」
我隨著他們走上輕鐵，很快就下車，穿過我完全沒有概念的迷宮，到了東城酒家。
這裡的燈光不及羊城的那麼溫暖，冷冷的煞白……
「啊良，想食咩自己出去攞就得架喇。」
「哦。」
「出去攞野食啦。」
周子若用她溫暖的手扣住我的手腕。
「夾咁多食唔食得晒架？」
「得啦，唔止我同你食，佢地都食架嘛。」她遞給我一隻碟子：「幫我拎住先。」
「拎埋呢碟。」
「食咁多……唔驚食肥你呀？」
「唔驚，就算真係食肥左都唔驚無人要。」
倒也是，她這樣吸引……
「瘦田無人耕，耕開就有人───」
「頂你。」
忽然間從我和她中間冒出來的羅船長被周子若用手肘撞了一下。
「嘩肥婆若你想頂死我咩？」羅船長按著自己的小腹。
「想頂到你無聲出啫。」
「唔知係邊個話自己就算食肥左都唔驚無人要呢？」
「又關你咩事？」
「我同啊子良係好兄弟黎架嘛，關佢事既事就即係關我事啦。」羅船長搭著我的肩。
「我有話過關陳子良事咩？」
呃……我的心黯然地抽動了一下。
如果她話中所指的人不是我，那又會是誰呢？
難道除了侯紹龍，還有另外的人嗎？
「行啦，呆下呆下咁企係度做咩？」
你的身影漸漸變得愈來愈遠……
究竟你所喜歡的，會是個怎樣的人？
是我認識的嗎？
「喂陳子良，你對腳係咪黐住左呀？」
「呃，唔係，即刻黎。」
我在她的身邊坐下，良久想不到該講些甚麼話。
「喂，咁多位。」趙尚文站起來：「多謝你地一直以黎仆心仆命咁為綠社出力。」
他舉起手中的罐：「你地既努力係無白費架！」
「係！」
眾人一起互相擊罐。
「係呢度我想多謝一個人……」
「緊係呀嫂啦仲洗問既？」
「呀喻當然係要多謝啦，不過今次我想講既果個人唔係啊喻。」
「係啊良。」他望著我。
我？
「如果唔係有佢係度做和事佬，可能我地今日會跳到一盤散沙咁。」
趙尚文身後坐滿啦啦隊隊員的那一檯傳來一陣掌聲。
「所以，」趙尚文雙手拱著罐：「呢一杯我敬你既。」
我站起來：「唔好咁講……」
「啊文講得好啱，」林惠喻說：「睇黎我真係應該要學下聽下人地講。」
「嘩，真係豬乸都會上樹喎。」羅船長的舌頭果然從來不饒人。
「丫羅銘浩你個死仔。」林惠喻攥起拳頭。
「拿拿拿，呢頭先話完要做人妻架。」
「你講乜野呀？」
「我話，你要做人賢妻良母嘛，咁粗魯係唔要得架。」
「哈哈啊浩你唔好咁玩佢啦。」
「既然大家咁開心，我亦都想係度同大家宣佈一件事。」鹿仔說。
「咩事啊？」
「就係……由今日開始，啊茵就係我既女朋友喇。」鹿仔牽著黃逸茵的手站起來。
「嘩，恭喜晒喎。」
「真係比我講中左。」
「係咪呢？都話架啦，之前啦啦隊果陣已經見佢兩個行得好埋。」
一陣喜悅的感覺油然而生……
「做得好呀陳子良。」周子若用手肘輕輕地碰我一下。
「多謝。」
喜悅的同時感到有點羨慕。
望著周子若側臉上的笑容……
甚麼時候我才能牽起你的手？