人來人往,你為甚麼要回來找我...: 6

  「咔擦。」
  芳姨回來了。
  「啊芳。」是母親的聲音。
  「做咩事啊阿姐？」
  「我想話，啊健佢今日搵過我。」
  是父親。
  這一次我沒有打開門，不過大概母親也知道我會聽得見。
  「吓，你見過個衰佬黎？」
  「電話呀。」
  「哦，嚇得我，仲以為佢知你搬左入黎屯門添。」




  「不過，估都估到啦。」
  母親講得沒有錯，只要稍為想一下，就能猜到她到了妹妹的住處暫住。
  「佢有無講啲咩？」
  「咪對唔住之類既野囉。」
  「拿，阿姐你聽我講呀，死都唔好返去，返去棧再比條衰佬遭質咋。」
  父親……
  「芳。」
  「姐。」
  我伏在房門上。
  「唔洗怕，以後有咩事都好，有我呢個做細妹既係度，我一定───」




  「啊芳，真係好多謝你。」
  「挑，一世人兩姊妹，講埋啲咁既野，真係丫。」
  她倆哄然而笑。
  「啊芳呀，其實呢……」
  「講啦阿姐。」
  「餅店仲請唔請人？」
  「吓，仲請緊人既。­」
  「可唔可以比我入黎做？」
  「哦，你想做呀嘛？易辦啦，我開句聲就得。」芳姨說：「不過呢，其實你唔洗咁急住搵工喎，而家既生活仲過得去。」
  「我係想快啲忘記啊健啫。」




  「呃，咁我明白喇。」
  竟然打算忘記父親……他不算壞，既不抽菸也不好賭，不過嗜酒如命。想到這，不禁心生感喟。
  窗外柔黃的光線探進來，斜陽裡黯然的餘暉壓得我呵出一口悶氣。
  出去走走吧。
  我換上黑色的背心和運動短褲，打開房門，穿上紫色的跑步鞋。
  「媽我出去跑步呀。」
  「跑邊度呀？」
  「唔知呀，應該跑樓下個公園。」
  「哦，小心啲呀。」
 
  從公園的出入口處走出來，右邊的是一條上斜的行人天橋，長長的天橋可以通往屯門河的對岸。左邊的正是湖山河畔公園，磚紅色的緩跑徑……就走這邊吧。慢著，前方那個背向著我的女生怎麼好像有種熟悉的感覺，及肩的短髮，粉紅色的上衣，黑色的短褲，還有點胖。她別過臉來，看見了我，她揚起眼眉……
  竟然是周子若？
  「咁啱既。」我裝作自然地走到她的身旁，跟她一起用雙肘架著欄杆。
  她輕笑一陣。
  「你唔係住美樂既咩？」




  「屯門河，」她說：「呢度既屯門河係最靚既。」
  我眨一下眼，望著這條河。
  「唔好淨係用眼睇，淨係用眼睇睇唔出佢靚既地方。」
  河面上淡淡的光，散發著一層薄紗般的愁緒，沉寂沒有將繚繞的鬱悶封在耳畔，反而隨著一呼、一吸而抒發。
  「做咩突然間講野咁深奧既？」
  「乜係咩？」
  「我唔知我係咪明。」
  「一定明既。」
  「你又知我一定會明？」
  「唔好講咁多喇，你係咪跑步架？」
  「係呀。」
  「咁跑啦。」
  「跑去邊？」
  「跟住我跑就得。」
 




 
  她話未說完，便開始踏著小步，沿緩跑徑走。她領著我離開了緩跑徑，通過了很短的行人隧道。她並沒有跑太快，跟上她並不是一件太吃力的事。
  「究竟你想帶我去邊架？」我和她一起穿過一條只能讓一人通過的窄路。
  「跑落去你咪知囉。」
  她跑到交通燈前停下：「未停住架，仲有段路。」
  我們走過了馬路。
  「拿，右邊既係西鐵站，左邊既就係河田輕鐵站。」她一邊跑一邊說：「你聽下，河田既河唔及富健既河靜。」
  單車徑上有不少跑步的人迎面而來，亦有不少的人從後越過。他們帶來了幾分熱鬧，可是我與周子若所見略同，還是比較喜歡湖山河畔公園。
  「前面就係蔡意橋，你聞下。」
  我嗅了嗅。
  「蔡意橋既河太臭。」她說。
  的確。
  「係喇，社幹事既事，多謝你。」
  「得啦，」她滿足地笑：「係你話想做社幹架嘛。」
  「我話？其實我覺得……做唔做都無乜所謂。」




  「哈哈，無得做既話你會後悔。」
  「點解？」
  「中五係你可以玩既最後一年，如果唔將自己既汗水灌溉係呢啲咁有意義既活動上面，就等於無經歷過校園生活。」
  「做乜無端端說教起黎？」
  「乜係咩？」
  不過她說的不錯。不難想像，像我這樣的一個人，若沒有她的幫助，就會呆呆地待在班中，然後虛度這一年的光陰。
  「真係好多謝你。」
  「嗯，應該既。」
  往左邊望，是屯門醫院，右邊，是周子若的臉。白裡透著淡紅，嘴唇比臉頰紅一些，耳窩比嘴唇紅一些。
  「做咩望住我唔出聲？」她直視著前方。
  「無。」
  「係咪因為我太靚？」
  我不懂該怎樣回答。
  「即係係啦。」她亦講得沒有錯。
  「好喇，我地到兆康喇。」她在昏橙的燈光下放慢腳步，停下來。




  這裡是兆康輕鐵站，比剛剛經過的河田和蔡意橋更熱鬧。半空中的夕陽落得只剩黯淡的紅，左邊「金海漁港酒家」六個紅色的字顯得更紅。
  「返去囉。」
  「由呢度跑返去？」
  「係啊，」她已經開始動身：「你追我丫───」
  我望著她的背影。
  追你？好。
  等我。