某日，我搬左入去一間鬼屋度住: 第二回 毒撚鍾馗 X 命格操控
眼前呢位男人，以我既印象當中，應該……係初次見面: 佢白白淨，瘦孟孟，有少少寒背，戴往一幅塊鏡片仲厚過牆磚既近視眼鏡，七三分界頭，見落冇咩點打理顯得有啲凌亂，一身略為over size既恤裝西褲，典型到不得了既office boy裝扮。雖則個樣堅係幾毒下，不過感覺上都幾平易近人。
我見佢伸出「友誼之手」，正所謂:「伸手不打笑面人」，於是我亦伸手禮貌性咁互揸一野:「鍾生你好。」揸揸下半路，我就發覺有啲唔對路，鍾馗呢個朵咁熟既，好似係邊度聽過。
「轟隆 —— 」突然，腦內一下靈光閃過，我頓時冒出一個詫異又古怪既念頭。為左確定我既諗法，我冒住俾人話係「超級大傻仔」既風險，膽粗粗、口窒窒去問:「咪……咪住? 唔通，你，你就係傳說中惡魔妖怪既剋星，捉鬼天師鍾馗!!?」
對於我既疑問，呢位自稱鍾馗既男人不作任何廢話，直接以行動黎回應我。
「變 — 身 —— 」
突然，毒撚爆出一股強烈既勁風，將我震退左好幾步；身體俾數道黑色球體包圍，球體瘋狂咁圍繞住佢黎疾速旋轉，快到連裡面既身影都變得朦朦糊糊。
一聲清脆響指，球體瞬間消失，又毒又弱雞既毒撚竟然變左做一個身穿古裝藍色爛長袍，雄糾糾，大眼濃眉，滿面鬍鬚既魔鬼筋肉人!
寛大又鬆身既衣衫，都掩蓋唔到一身碩大粗壯既肌肉，仍能營造出逼爆既效果。虎軀四圍不時有黑色閃電冒出，劈劈啪啪咁作響，透出懾人兇悍既氣勢。果一刻，我嚇到成個人腳到軟哂，跪係地下，氣門仲好似塞住左，呼吸唔到空氣!
「本座，就係如假包換，人稱『翊聖雷霆驅魔辟邪鎮宅賜福帝君』、『捉鬼天師』 —— 鍾馗是也!」語氣當中，有一種絕對不可置疑、聖犯不可侵犯既威嚴同霸氣! 完完全全同頭先果個毒撚唔同。
睇到呢度，有部分後生既讀者，可能會不知道鍾馗兄是誰。咳咳咳……跟據全知全能既維基百科，搜尋關鍵字“鍾馗”後，內容節錄其中幾段黎介紹一下佢本人 —
“鍾馗，唐初長安終南山人，專能鎮宅驅魔之神也。頂破帽，衣藍袍、束角帶。虎背熊腰，豹頭虎面，龍額魚眼，臉生虯髯。鍾才華横溢、滿腹經論，平素正氣活然，剛直不阿，待人正直，肝膽相照。”
用現代話黎講，鍾馗係捉鬼達人兼神仙。平日衣著行頭似足乞衣犀利哥，外貌同性格就係倒模三國關二哥關羽雲長mix張三爺張飛翼德。
好，資料交代完，我地將個鏡頭交返俾一廠先。
……
係我面前既，系一尊殺神，一個可以足以斬殺世上所有邪魔既男人!
好，好強既氣! 我感覺到自己既身體就黎俾無形既氣牆壓扁，頂唔順喇! 我立即狂拍地下投降，用盡全身既氣力大叫:「夠喇! 夠喇! 我信喇! 大神有怪莫怪，細路仔唔識世界，係我唔識野。求下你，放，放過我啦!!」
「變。」筋肉人咧嘴一笑，又瞬間變回毒撚模樣。可怕既感覺消失得無形無踪，我當堂鬆一口氣。回過神來，我發覺自己全身已經標哂冷汗。個種穿透靈魂既顫慄感，好真實，好得人驚!!
鍾馗皮笑肉不笑:「睇怕，你依加肯相信『本座』既身份喇，係唔係啊!?」。話到最後，更特意加強「本座」呢兩個字既語氣。
果然，毒撚……啊! 唔係! 系神仙都唔係人咁品的說。ORZ
鍾馗托一托佢既眼睛:「既然你都知我係咩人，咁你都清楚你依加係咩環境。」
我:「知道，我已經……」
鍾馗:「要做出自殺呢個決定，唔係因為一時三刻既衝動就可以做到。相反，係須要好大既勇氣先可以成事。作為過來人，我係相當之明白你既感受。」鍾馗嘆一口氣，見佢神色感慨，似乎諗返起一啲往事，然後話鋒一轉，續道:「不過，事情亦唔係你想象之中咁樣，因為……你仲未死。」
完全難以置信，甚至我懷疑自己聽錯:「乜話!? 我仲未死!!?」
鍾馗思考左一陣，就話:「要我完完全全解答你既問題之前，有啲野系必須需要你去了解……」說畢，鍾馗一揚手，憑空變左一部手提電腦，之後將部電腦屏幕迎向我，電腦裡面播放住一段片段，鍾馗就一邊旁白:
「所謂既世界，其實係由三界所構造而組成，分別就係:
1. 人間界，即是人類生活既現世
2. 地獄界，靈魂暫居之地
3. 天界，眾神居住既地方，
而往來三界既媒介，就係靈魂。所有出生係地球上人間界既所有生物，由第一日開始，靈魂就已經綁定係佢地身上，直到肉身崩潰，與靈魂分離，然後過渡往地獄界，於地獄界修行積陰德。當功德累積若干程度，就可以選擇循入輪迥，重生返回人間界，成為新造既生物，又或者得道進入天界，成為新神。而你，就夾係人間界同地獄界中間，一個叫『渡魂道』既地方，亦即係呢度。」
鏡頭一轉，我同鍾馗黎左一個似系資料庫既地方。我一望，資料庫內文件夾既數量，目測至少有數萬份。全部文件，都整整齊齊排係書架上面，仲分門別類將佢地分開處理，而每份文件夾都寫上名字。
我一邊跟住鍾馗既腳步，一邊聽佢解說:「呢度叫做『命格儲庫』，地球上所有生物既『命格』檔案都會儲放係度。每當靈魂重新投入人間界，『命格』會隨同靈魂，一同綁定係新既肉體上，而靈魂既一生，就會約束係『命格』呢個框框裡面，正如玩RPG咁樣，系永遠都唔會走出遊戲自身以外既軌道既前題下，主角每一個決擇都會被自身條件限制而影響劇情走向，選擇左其中一個分岔口，然後接關再繼續簡另一個分岔口咁走落去，直到肉身崩潰，『命格』亦隨之而刷新，然後重頭再玩過。」
「仲有，當『命格』一開始運行，直至執行為止，就絕不容許改變。假若隨意更改，世界既平衡定必變成支離破碎。有見及此，波士於是就委任我，成為觀察者，監察『命格』既運行。」講到咁上下，鍾馗停低腳步，係架上拎左一個文件夾，上面寫住既名，竟然就係我「雷樂」既大名:「講左咁柰耶穌，終於都入正題。系近呢五百年來，『命格』出現既失誤愈來愈多，而你就係其中一個。再坦白啲講，呢啲所謂既『失誤』，其實係被人幕後操控住!」