某日，我搬左入去一間鬼屋度住: 第一回 地獄黑仔王 X Mr.Chung
是咁的，我叫阿樂。今日，我想系度同大家講一個故事，一個由鬼屋帶出黎嘅故事，一個令我悅變成長，呢一世都唔會忘記嘅故事。
係故事開始之前，我有個問題想問一問大家:
人生，有時難免會行衰運，但……幾時先知自己霉完，黑完?
曾經，
我炒金炒股炒樓炒哎瘋，乜Q都炒。識得投機計數，投資會損手爛腳? Are you kidding me?! 搵錢，簡直輕輕鬆鬆Easy Job!
曾經，
我不愁吃喝，有車有樓，屋企仲有個索爆靚女未婚妻等住我。呢種情況就好似德國國腳卻奧斯(Toni Kroos)咁，年少有為，廿四歲仔就已經踢過豪門拜仁慕尼黑同皇家馬德里，捧過歐聯冠軍，仲拎到美斯同C朗呢兩位世界級超級球王恨極都唔恨到，足球壇上至尊無比、有今生無來世既終極榮耀 — 大力神盃。
足球壇上，佢有哂地球上所有波牛一生人既夢想；而我，廿幾歲，雖然我未致於有錢到好似乘哥咁樣，可以買起成個香港，又或者養起一隊廣州恆大，但我亦擁有過美好既生活、美好既事業，仲有美好既感情。
曾經，
我覺得自己會咁樣就過一世，(仲有唔咩滿意啊!? 全H市有七成人都冇搵得過萬四蚊，仲呻)我亦可以好驕傲同我老豆老母咁講: 我得左喇!
曾經，
當時既我係咁諗。
哈哈哈……
但，結果，好景不常。一場風暴，將我所有希望統統幻滅。
2008年，金融海嘯，將世界上所有有錢佬、商家、企業等等數以兆萬億計既財富，一夜之間在股票市場中悄然蒸發成空氣，李加乘冇左一半身家，賭王何熊身慘到得返十分之一塊餅。慘情還慘情，但仍未輸清到貼地賣腎還債，因為更慘、更仆街既未輪到佢地，仲有我。
果一年，我瀨左嘢。
我將我身上所有野變賣還債，銀行存戶，得返可憐既三位數字: 三十六個九；
系公司，我比同事出賣，屈我賣公司機密俾對手，老闆當堂二話不說請我食鼓椒沙魷；
老豆老母亦炒濃股，棺材本都輸埋，兩老年紀大，受唔住刺激，一時睇唔開就由六十四樓一野落黎，死埋；
至於我個未婚妻，佢，佢……佢……
……
我坐係天台旁邊，眺望遠方。
腦海又再一次重複又重複咁播放昔日往事，我好想回憶返當日既甜蜜，卻殊不知已經被今日既痛苦徹底抹殺得一乾二淨。
一時間，我沉默起來。
「佢做乜啊?」阿SIR問。
係個一剎那，我眼前浮現起果個女人醜惡既嘴臉，不禁悲從中來，一邊啜泣:「佢……條仆街跟埋個佬走左去啊!!」講到咁上下，我既眼淚又開始忍唔住係眼框裡面打轉，然後一下子傾瀉下來，淚流滿面:「嗚啊啊……我唔死都冇用啊!」說畢，我激動到立即起身，就想一嘢跳落去。
「喂喂喂! 大佬，冷靜啲，唔好咁衝動啊!!」
我聽到身後既喝止聲，衝動既腳步驀然停下，而腳步旁不足10cm既位置就係天台邊緣。鑑多一步，咁我就栗一燒。俯身一望，大廈全部三十多層樓層到地下門口，再到大廈隔幾個街口既四周事物，一覽無遺: 大廈周邊，已經被警方包圍，將沿途食花生既市民檔在封鎖線外，而消防員亦忙個不停，佈置著大型氣墊等器具。
市民見我遲遲未跳，紛紛關切又肉緊地大叫:
「阻膠住哂! 跳啊! X你老X!」
「老公，係唔係拍緊戲啊?」
「好悶啊~~~快啲跳喇臭X!」
我好想跳，我好想跳落黎! 但口裡說不，身體卻很誠實，我雙腳猶如被一股無形既力量釘左係地下，郁極都郁唔到。我好辛苦，一心我係想求死，由呢個天台跳落去，一了百了，只不過，我竟然係呢一刻卻步、猶疑，唔通我仲有嘢留戀係呢個世界上!? 冇可能，冇可能架! 我已經一無所有，乜到無哂!!
「螻蟻都尚且偷生，有乜事唔掂都可以拆到掂。你唔好行咁出先，行返埋啲先啦。好嗎?」
我望住後面幾個阿SIR，個個都好緊張咁樣。我其實好清楚佢地點解會咁，因為佢地技窮。如果唔到山窮水盡，都唔會用得啲「大耳窿」先會講，想氹你落搭借錢，借錢就可以解決問題等等諸乎此類賴係好正面狗屁說話。俾著事情發生係你身上，你會突然無記劇集主角正能樣上身，好能正面豁達面對呢個Les Misérables? Hi你 Auntie! 唔係為左筆獎金同要寫report，你地會咁懶好心咁肉緊!
諗到呢度，我更加生無可戀:「唔掂拆到掂? 你認為可能咩! 可能咩! 依加係個天玩嘢，想玩死我啊!! 你認為人可以同個天鬥!? 鬥條毛啊! 好啊? 你想玩我啊嘛!? 我偏唔俾你玩，一於死俾你睇!」慘然一笑，我閉上雙眼，身體已經在半空之中，急速下降，勁風系我耳邊嘯嘯在響……
……
當我再一次張開雙眼既時候，我已經身處一個白色空間裡面。空間大得驚人，彷似永無盡頭，只有白茫茫一片，莫非呢個就係死後既世界!?
正當我諗緊發生咩事，突然係我身後面聽到幾下清脆既鐘聲，然後一把厚重又帶點滋性既男聲響起(P.S.把聲你可以FF一下係福山雅治咁樣):「下一位。」
我拎轉頭，係我既不遠處，有個人坐左係度，不過佢既樣我睇唔清，因為佢俾面前一座又一座，真係堆到成到座將X澳垃圾堆填區個座山既文件堆遮住左個樣，只係穩約見到大概正埋首苦幹處理文件既模樣。
四周無人，指名叫「下一位」既人兄，應該……就係我掛。(廢話 = =)
我行到文件堆面前，男人仍然望都唔望下我，一邊做文件，一邊就話:「雷樂，請坐。」唔知幾時，我身後就已經擺左張office成日都見到既有四個轆既辨公凳。與此同時，我又心生一個疑問:「點解，佢會知我個名既? 唔通佢系識得我!?」
心中既疑團未解，我既思緒卻被一道慘叫聲硬生生打斷。我回過神來，眼前的文件堆好似山泥傾斜咁崩塌下來，冧到一地都係。
係呢個時候，我終於望到男人個樣，而佢狀甚狼狽，嘴角微微向上揚起，對我露出帶點尷尬既笑容，就話:「幸會，幸會。初次見面，我叫Mr. Chung，鍾馗是也。」