我叫求東。: 第五章 德才中學

我選德才中學既原因，唔係因為佢有咩特別。而係因為一個人。

佢叫呀花。

呀花係我隔離班既女仔。眉目清秀，天生麗質，留住一把長頭髮。雖然唔係咩班花，但係佢去到邊度，走入人群，我都可以輕易望到佢既身影。

大概因為青春期發作，有次係學校樓梯，同佢擦肩之後，佢轉個頭對住我帶笑抱歉，就走左去。果一刻我望住佢既背影，同岩岩觸摸到既髮絲，就好似rejoice個洗頭水廣告咁。

很黑。很亮。很柔。





因為咁，佢既存在就深深咁係印左係我腦海入面，我既夢裏面。

....

"東同學。"

....

"東同學。"





....

"求東!!!"

"呀…係。呀係!係!"我抹走枱上同臉上既口水跡。

呢隻老妖將我係夢入面拉返出黎現實。其他學生見到我狼狽既樣都紛紛偷笑。

"寫好志願表未呀?"佢用不俏既眼神望住我。





"寫好!寫好!"我將份表遞俾老師，最後既鐘聲同一時間響起。之後就係迎接我地起漁村入面最後一個暑假。