我叫求東。: 第三章 響樽

一到放學既時候，我地同奇雲會合就一齊踩單車過去。

今次既感覺寧舍唔同，因為成條大路都係奇雲班兄弟，7架單車霸住條公路，特別夠霸氣!

我地10個人一齊行入大公。呢度係草地所以有人踩上去都好易被察覺到。佢地班人一聽到有聲，轉個頭望就縮左一縮，跟著就叫係度玩緊蟋蟀既柏飛。

柏飛見況，就企起身問。

"你地係咩人?"





呢個時候，奇雲就率先行出黎，邊行邊講。

"我叫奇雲。你地邊個叫柏飛?"

"我就係，做咩?想做我條?"柏飛得得戚戚。

奇雲冇理到佢，緩步直到企係佢前面。佢慢慢張開笑容，伸出左手示意握手。

"哦?"柏飛又不由自主咁伸出佢隻手。就係呢個時候，奇雲既左手突然拎起收埋係褲袋既牛奶樽，一野爆落柏飛度!





過程只係短短半秒!但就將奇雲既氣場瞬間爆發出黎!

柏飛既慘叫聲隨著破碎既玻璃一齊趺低，跟著就雙手禁實個頭。呢個時候班飛仔都不知所措，唔敢行埋黎，因為大家都係第一次見到柏飛流血!

我都係第一次親身見到呢種咁暴力既場面，以前都係推推撞撞，打下人地，邊度夠膽拎野打人!

呢一幕，我永世都記得!

"大公以後係我既，唔服就還拖。10秒後我唔要見到你地，如果唔係就響樽。"





跟著落黎就係佢身後面班兄弟，個個雙手都拎起晒牛奶樽，霸氣十足。班飛仔見到咁既情況，唯有拖住柏飛，狼狽不堪咁走左出去。

從佢地踏出大公呢一刻，我就知道勝利係屬於我地!

估唔到牛奶樽都可以有咁大殺傷力!奇雲呢個人真係夠晒狠!