就是偽影評: <<我們愛，但是我們不懂愛＞＞

說好的<<分手100次>> 的偽影評，講好左唔走數既 ~　
（都係個句，又係有劇透嫁）

如果我話你知我入場唔係睇周秀娜既，我就擺明係呃緊你啦。不過講真，周秀娜好戲到超越左我既想像，呢個位堅係要讚既。

全場只有我一個是一個人去看的 ，其他全是情侶，不過，講真，睇完之後，我feel 到好痛，個種痛，係心痛。
個種係心痛拉扯的痛。

在正文之先，真係好想引用一段好中意既聖經文字，
大家都會係婚禮中經常會聽到、很耳熟能詳的一段：　

「愛是恆久忍耐、又有恩慈。愛是不嫉妒、愛是不自誇、不張狂，不作害羞的事。不求自己的益處、不輕易發怒、不計算人的惡、不喜歡不義，只喜歡真理。凡事包容、凡事相信、凡事盼望、凡事忍耐。愛是永不止息。　　－　歌林多前書13:5-8」

真心，編劇鄭丹瑞一出手，簡單，直接，易明，到位。

一個簡簡單單的都事愛情故事，一個長唔大既男朋友（鄭伊健），同一個被人話係「港女」既女朋友（周秀娜），仲有一班係女朋友眼中既豬朋同狗友，就成就左一套好好睇既戲。

基於唔好劇透太多，
所以，正如文章既開首，
＜我們愛，但是我們不懂愛＞

探討既，主要係當在愛情之中，當大家愛到不知如何下去，其實係十分沉重既一個課題。

當我地係相處之中，其實我地唔止係愛緊對方，
更重要既，係學習點樣用一個對方喜歡既方式去愛對方。
而好多時，我地反而係用左自己想要，
又或者係我地認為最好既方法去愛對方，
而其實，我地係冇諗過對方真正既感受到底係點。

好似在戲中，長唔大既男朋友，經常打機，玩，諗埋好多3分鐘熱度既野，都經常令周秀娜飾演既女朋友成日發嬲，

同之前寫過的文章的情節一樣，

「彼此的了解正在加深，同時彼此的矛盾也以幾何級數升級。
原來還可以呃下自己的，都開始覺得自欺欺人。
原來還以為自己可以忍得了，其實就係忍唔住。
原來以為戀愛大過天，但其實問題天天都多。」

而每次到了極限的時候，女方都會出一招「大絕」，就係分手。

作為男人，係呢一個 Critical Moment - 你會點揀? 
to be or not to be , that always is the question. 

戲中既男朋友選擇既，都係跪地，認錯。
看似係好冇霸氣既選擇係咪呢?

女人似乎唔知道一個事實，
就係一個男人肯同你認錯，
就係佢愛你既表現，
你諗下一個男人佢重面子重尊嚴講地位，
點解會為一個女人肯底聲下氣呢？

只係因為愛。

但，愛又係唔係無極限呢？
好肯定答你，
一定唔係。

尤其是，當分手，慢慢變成了手段，成為左令對方跪低既武器。

至於點解一個女人要用到呢一種武器呢？

就係因為佢睇唔到將來。

當一個男人如果掛住搞自己既興趣而沒有顧及女人的需要個陣，
（呢度請留意，需要係講身心靈既需要，唔係滿足男人自己既肉體需要）
女人就會開始覺得佢地睇唔到將來。

當一個女人開始睇唔到將來，好自然既，為左眼前呢個恨鐵不成鋼既男人，

女人原本都想扮蠢，又或者做一個係佢身邊既傻妹仔，一個傻足一世既女人仔，但睇住佢咁唔爭氣，都要立即做返對精明眼，開始要對佢個男人做返D 野。

要個男人變得「成熟」一點，先可以睇到將來。
但呢個行為就係係男人既眼中一個加速彼此感情死亡既行為　－　取捨／捽數。

當男人俾一個女人捽數，就會係佢心情最唔好既時間，
好多人都以為，呢個時候如果一個男人回轉去做返她想要他做的事，

咁唔一定係一個好現象。

因為行到呢一步，表面上，一個男人肯為左個女人去回轉，
但其實，佢已經死心了。

也許你會問，一個男人唔去做返D野，咁即係佢係要繼續廢男姐！
個睇法係岩，但個諗法係錯。

一個男人為左一個女人去做一Ｄ野，冇問題，
問題係出發點。
係男人眼中，係唔係如果我有，你先會留係我身邊，
如果我冇，你就會走?
今時今日既我冇，唔代表明日既我都會冇。

正如電影中不務正業既男主角，竟然又俾佢諗到分手迷理倉一招發圍，但女主角就會話無以為繼，對於男主角仲諗住開分店之舉稱為唔成熟，一盤冷水淋左落黎。

慢慢地，當時間推移，當男人意識到真正令女人高興，就是他要做相應在她心目中係「岩」既行為，佢慢慢就會覺得佢所做既一切一切都只係為左 Entertain 對方而唔再係因為愛，男人就會慢慢走返舊路。

因為，男人的自尊的破壞力，
絕對能比得上女人的妒忌心。

即使佢為左你改左幾多
即使佢為左你放棄左幾多
即係佢為左你嘗試應你要求「長大」左幾多。

慢慢，就會淡然的再一次進入分手與否之間的彌留狀態。
也是，最危險的狀態。

到左整部電影的高潮位及靈魂，都好多人已經爆左係尾段和結局位。

係離合期間既拉扯，最令人感到心悒(讀up)既地方，就係終於到左第100次既分手，大家已經唔會好似以前咁再為左對方大吵大鬧，唔會再思考向對方和好，雖然仲係好中意好中意對方，但傷痕既力量大到已經不能夠再走落去，選擇對對方尤如雖生猶死的冷戰來相處，甚至，係分開之後，寧願自己一個人都唔會再同其他人一齊。

因為回憶太清昕，
因為經歷太青澀，
因為彼此太熟悉。

但之後，已經唔會可能再有一個這樣的人去了解你，明白你，愛你。

「以前我難過因為害怕你會離開我，現在我難過因為我已經不知道如何愛你…」

也當我睇到男主角寫呢句說話俾女主角，想起我曾經也有這一段咁樣既回憶。

有 d 人會認為個結局係爛到好 hea ，好似就咁用無聲帶過左，但其實反而就正正就恰如其份。

感情淡了，有時係唔需要用口講出黎，講返清楚反而仲有機，而相方在清醒之後，才明白有些事錯過了，有些時間已經返唔到轉頭。

＜這感覺 已經不對 我最後才了解 一頁頁 不忍翻閱的情節 妳好累
妳默背 為我掉過幾次淚 多憔悴 而我心碎妳受罪 妳的美 我不配＞

(如果喜歡我的文章， 就給我一個 like 吧 )

https://www.facebook.com/thesiufui