我係網上面識左個女仔: 第三十五章-這不是導火線(9)

擘大雙眼，今日已經係六月五號。

兩行淚痕猶在，好似提醒緊我呢一切唔係夢咁。

艱難咁起身，換好校服，返學。

一打開門，我大驚，就好似小學生抄功課一抬頭見到老師咁。我見到Anna企係我屋企門前，應該係等埋我一齊返學，佢生日……所以期望我會比啲咩驚喜佢……？對唔住，要令你失望啦……

「哈囉！」
佢笑臉依然，反而心虛既我表現唔太自在。




因為我琴日稍微抱怨過嚮往多陣都唔得，天呀你宜家就畀個機會我？真係多謝曬啵……

「嗨……」
「做咩咁既樣既你？」
佢一邊嘻嘻笑一邊問，大概以為破壞左我打算俾佢既驚喜，所以滿足咁笑掛，對唔住，要令你失望啦……

「無野，我地行啦……」
我勉強擠出一副笑臉。

「嗯！」




佢仍然陰陰嘴笑緊，如果你係係度期待緊啲咩，對唔住，要令你失望啦……

唔同學校自然唔同路，好快我地就分別，分開果刻，我隱隱約約見到Anna雙眸有一絲失望。

話左架啦……

翻到去學校，陸仔急不及待，問我今日既詳情。

「放學你去送隻公仔比佢，對白自己搞掂，其他我會搞……」
「okok唔該曬你呀青蛙仔！真係好多謝你！」





算是做了件好事嗎……？

咁橋有份功課要寫件好人好事，可以寫呢樣嗎？幫兄弟追自己女朋友。

算啦，唔好再諗啦……（潛台詞：算9數啦你，夠薑你咪寫落好人好事囉7頭）

午飯時間，Anna突然出現係學校門前。
嚇死我，仲驚過海馬公園十月全城哈囉喂（入面既夏蕙bb）。

好彩我係窗見到，我即刻叫陸仔將作戰計劃推前。

我？食小食部囉，仲可以點？見多一次傷多一次呀……

小食部唔少位置可以見到校門口情況，我坐左其中一個，我都唔想架……但係無位……





我見到Anna見到個公仔之後，又驚又喜。
驚，大概係因為陸仔竟然係「小蘋果」，仲送生日禮物比佢。（我叫左陸仔話比Anna知佢就係小蘋果）
喜，大概係份禮物佢真係好鍾意，呢個時候，我不禁苦笑起黎。

Anna收起左份禮物，即係隻狗狗公仔。

陸仔亦行番番黎，過黎同我食飯。

Anna仍然企起度，等緊人咁，我知道，果個係我。

我眼角好似濕濕地……