我係網上面識左個女仔: 第三十四章-這不是導火線(8)

我仲有兩日時間，去享受Anna做我女朋友既時間同感覺，跟住就要放開一直拖住既手。

呢兩日，平日我地做既野，突然變得好特別，咁當然係因為我知道我將會係最後一次享用呢份甜，酸中帶苦既甜。

五月四號，我地去左果間茶記。

「你呢兩日怪怪地咁既……」
「下……有咩……？」
「做咩成日望住我，以前唔覺你咁留意我架！」
「你靚呀嘛！」




我帶住微笑咁講，呢個微笑背後，收埋太多野，最後一日既不捨，見到你未來將會幸福既安慰，唔洗再面對阿爸既愉悅，一個難做我卻做左既決定。

「口花花！」
佢扮生氣，如果聽日你都嬲得落我就好啦……記住要嬲我……

「係啵，你知唔知聽日咩日子呀？」
佢突然用個好得意既樣望住我。

「聽日？六月五……」
我皺起眉頭，扮作思考得好辛苦。





「我地相識一個月呀？」
「唔係呀！我地四月尾識架！」
「第一次見面紀念日？」
「唔係呀！我地五月十二號第一次見呀！」
佢好似又有啲嬲。

我望望表。
「哇！我今日有野做，夠鐘喇，唔陪你啦，唔好太掛住我！」





為左唔好令話題繼續落去，我都係要走，想望多陣都唔得……

「喂喂！我聽日生日呀！！喂！」
呢個時候，我已經走遠，絕對可以扮聽唔到。

whatsapp又響起，我估係Anna同我講佢生日，我熄左電話，一路行，個心好痛。

決定左，就無得返轉頭，一切好快就可以完結，傷呢樣野……比啲時間佢，自己就會結疤復原架啦……時間會沖淡一切……

我返左屋企。

又係訓係床度，望住個千年不變既天花板，哈哈……到最後陪住我到最後，陪住我經歷咁多野既竟然得番天花板你……真係諷刺……

哈……一滴淚就咁流左落黎。





我亦無心情去左抹左佢，眼淚在心裡流？錯曬，眼淚梗係係眼到流架啦，心……流既係血，好傷好傷。

不知不覺我好似訓著左。