我係網上面識左個女仔: 第二十二章-戀情(3)

「大大大佬……唔唔唔係呀！」
係我吐出呢句時，拳頭亦衝左過黎。

「仲唔向左走向右走認！賤人！」
「你聽我講先！唔好打住！！」
估唔到呢句真係令下一個將至既拳頭停低，就好似差佬叫個賊唔好走，個賊真係停左係度咁。

「講啦！」
「Rummy借我過橋咋，佢想激你咋！Anna真係我女友，我趕住去解釋呀！仲有呀，Rummy好緊張同你呢段感情，你就對佢好啲啦，鬧咩交姐！」





跟住我就霸氣咁企番起身，掉低呆住既阿輝，去追Anna。

跟住我追到佢，同佢解釋清楚，再加多句我愛你，佢聽完好感動，攬住左我，再講句我都愛你。

如果件事有咁浪漫咁成功就好。

事實係，我搵極都搵唔到Anna，完全唔知佢走左去邊。

最後我死死氣翻翻屋企。





翻到去，電話又再響起，我有2個whatsapp。

Anna
「你唔好搵我住。」
「Anna……你聽我解釋啦！」
一個tick，而且我睇唔到佢上線時間呀status果啲……我估佢block左我。
算啦……遲啲搵機會再解釋……反正宜家講咩佢都唔會聽得入耳……

Rummy
「賤人！」




「又點呀小姐」
「為左Anna丟低我，仲同阿輝講埋你係假冒！Anna只係你假女友黎架咋！」
「同你講都晒氣，我講多次，Anna係我女友，真嘅女友！」
「唔洗再死撐啦！都話我hack左Anna FB！」
「唔好懶叻啦！果啲係之前嘅事，宜家我地係真情侣，但因為你條八婆宜家Anna誤會曬，仲block埋我呀！」
跟住佢就無聲出，費事傷人，我嬲到喊果時打出既八婆比我係send之前del左。