《港男FF妄誌》: [Day 12－現在過去] PART 3
梳洗好，整理一下個人，確保無D乜野唔正常既地方凸左出黎之後，入返間房...
「飛揚丫～我可唔可以幫你揀衫丫？」Emma雙手放後，搖下搖下個身問我。
『哦...可以...可以...』其實我又無乜所謂既...
我打一打開個衣櫃，好彩D孖煙囪同我D出街衫係分開放喺唔同既櫃架姐～
Emma好細心咁逐件逐件揀。
唔覺唔覺，原來自己都幾多衫架喎...
有D係Ashlynn買既，有D就係阿Wing買既...
其實Ashlynn都有送過唔少衫俾我，只係我又唔係咁好意思收...
諗下諗下...其實Ashlynn都為我做過幾多野...
而有時仲要係我辜負左佢一番心意...
好似話Emma手上睇緊嗰件衫咁，係有一次佢話要我喺屯門拎D野出美孚俾佢(要拎D咩，我已經唔記得左...)，我極唔願意之下發晒老皮拎出去。
見到Ashlynn既時後仲要黑晒口面，交低佢要既野俾佢之後，頭也不回咁走左去。
到左夜晚，佢話入左黎屯門，話想俾D野我。
Ashlynn拎住袋衫，話其實下午既時候係想俾個驚喜我，點知我就發晒皮四咁走左去...
嗰一刻，其實都真係好滾動...
Ashlynn真係有真心為我做過唔少事...
但我而家就連嗰陣時要拎D乜野俾佢都唔記得...
你話我幾無心肝...
諗深一層...都唔可以怪Ashlynn會選擇離我而去...
「就咁襯啦～」Emma把甜美既聲線，將我由自責中帶返黎現實世界。
我望一望，Emma已經將一套衫褲放左喺阿Wing張床上面。
一件心口有袋既白色Tee，加一條黑色既七分褲。
「平時見你著恤衫西褲見得多…尋晚見你著便服，感覺好新鮮～所以我就想咁樣襯...OK嘛？」Emma含羞答答咁擺下擺下身體。
『OK丫～好好睇～』我拎一拎起件衫...
呢件衫就係Ashlynn嗰次話要俾驚喜我既其中一件...
望住呢件衫，唔知點解，內心無左嗰份恨意，反而有一種...內疚感...
「飛揚...飛揚？」Emma喺我身邊叫一叫我...
『嗯嗯...咁我...換衫先喇...』Ashlynn為我既付出...
「嗯～咁...我出去廳道等你啦～」Emma轉身步出房，閂埋百葉門...
我不但俾唔到物質Ashlynn，就連愛...我都俾唔到...
係我虧欠左Ashlynn...係我辜負左Ashlynn...
攬住件衫，眼淚快要由心裏湧到眼裏去...
呢份傷痛唔係因為失去Ashlynn，唔係因為戴帽，而係因為我對Ashlynn唔住...
Ashlynn為我所做既一切，我都忽略晒...
我一直都只係埋怨Ashlynn唔俾多D時間我抖下，休息下...
而從來都無認認真真理過Ashlynn既感受，喺佢既角度諗...
我太自私喇...我浪費左Ashlynn對我既愛...我浪費左Ashlynn既青春...
對唔住...Ashlynn...
冷靜一下個人，平伏一下心情，抹乾眼淚...換好套衫...
「靚仔晒～」Emma雙眼發光咁望住我。
『邊係呢...』Emma實在太誇獎我喇...
「咁我地行咯～」Emma勾一勾起佢對粉紅色既平底布鞋仔，著好鞋之後行埋我身邊翹住我...
『嗯嗯...呀！等等！』差D唔記得添！
我拎出一個木盒，喺個木盒入面拎出一舊啪啪紙，再拆開裏面D綿花...
『支筆係你爺爺架～麻煩你幫我俾返佢丫～』我手震震咁拎住支犀飛利...
Emma望一望：「哦？乜原來佢漏左支筆喺你道丫？唔聽見佢講既...OK丫～我幫你交返俾佢丫～」
Emma接過我手上支犀飛利後，放入佢個手袋仔入面...
見到Emma收好左，我都放心D...
大佬...一陣真係要告我盜竊，我真係請唔起律師架...
Emma翹住我手臂，恩恩愛愛咁喺條下等人屋邨行下行下...
前兩日差唔多喺呢個鐘數，我仲趕緊巴士返工！
今日？有Emma把臂同遊～簡直係兩碼子的事～
『Emma～今日你又想食D乜呢？』點解我又咁自然咁加左個又字架呢？
「嗯～～～我想食魚蛋河～」Emma用食指掂下掂下自己個嘴仔。
『魚蛋河？岩喇～我知呢頭有一間魚蛋河好正～有時放假都會同細妹去食～』真係唔講得笑～間魚蛋河好食之餘，仲夠晒整潔乾淨～咁岩就得咁橋岩晒Emma～
「嗯嗯～帶我去帶我去～」Emma搖下搖下我隻手臂。
『跟我來～我知道路～』我就興致勃勃咁帶住Emma行～
講開又講，自從領匯大翻新之後，呢頭真係無乜好野食...
以前都話有D茶記食下～
仲記得十幾年前，做仔嗰陣時，有間叫南華既茶餐廳，我同豪爺一放學就去嗰道，叫杯C0T就坐足成個下午～
嗰道D C0T真係靚到丫...D色好似紅寶石一樣～
有茶味又有檬味～
而家真係飲唔返...
唉～往事只能回味～過多幾年，真係日日都想當年喇...
人生就係咁，有嗰陣時想珍惜都珍惜唔到，無嗰陣想回味都回味唔返...
『除左想食魚蛋河之外，你想飲D咩丫Emma？』一入到去麵店，就搵到張同個西裝友搭檯既位坐。
個西裝友一見到Emma，差D驚嘆到連麵都噴埋出黎。
咩叫魅力四射？
其實早喺Emma一踏入麵店，成間麵店不論係西裝友、麻甩佬、學生哥、店員、老闆甚至乎係師奶，都眼定定望到Emma實一實。
咩魅力四射，驚艷全場？
又難怪既～
Emma身上生散發出黎既高貴得黎帶點清新，脫俗得黎帶點親切，真係非一般人類所能觸及...
「我要飲可樂～」Emma笑瞇瞇咁望住我...
『唔得！無益！唔健康！揀過第二樣～』呢個Emma丫，仲係唔識死架喎...
雖然話黎完M姐，但平日都唔可以飲咁多凍野架嘛…
「唔～好啦好啦～俾我飲啦俾我飲啦～一啖啦～一啖啦～」Emma又扁晒嘴咁捉住我隻手臂搖下搖，嗲下嗲...
『好喇好喇...我叫罐可樂...俾你飲啖...你再叫一杯暖野飲～』點解我咁易心軟架？！
「好野～飛揚對我最好～咁...我要杯熱檸賓啦～」Emma拍拍手，扮小朋友。
『唔該～一碗魚蛋河...一碗牛腩粗...一杯熱檸賓...一罐可樂～』個靚仔侍應望住Emma仲多過落單...
「兩個都多青丫唔該～」Emma向靚仔侍應打左個眼色。
個靚仔侍應就連筆都跌埋...
執筆既時候仲要𥄫一𥄫Emma對修長美腿，𥄫到面都紅晒～
少年，你太年輕了～
我𥄫左Emma對腳咁耐，都未試過有一次會𥄫到面紅～
不過又好難怪既～
Emma對腳靚成咁，仲要著短裙Show Off～真係Dry丁腳都射到虛脫～
講開又講...
『Emma～你都鍾意食多青架咩？』我一邊抹筷子，一邊問Emma。
「OK架～」Emma坐定定，做個乖乖小朋友。
『女仔多數都會走青架喎～你咁得意既～』我再抹得乾淨D。
「但我覺得多青都唔錯～我幾鍾意陣味～」Emma咬一咬唇。
『係丫？咁你又知我鍾意食多青既？』我望一望Emma。
Emma碌一碌大對眼望住我...
「我...我有睇過你Facebook，唔記得你幾時有影過一張勁多青既牛腩麵丫嘛～嘻嘻...」Emma估估怪怪咁...
『係咩？其實我平時成日都唔記得叫多青～好多時都係我細妹幫我叫先有得食多青...』其實每次都係我細妹叫多青之餘，仲會俾埋佢D青我。
我既記憶力真係超弱...
「係咩係咩？你細妹對你真係好喇～嘻嘻...」Emma仲係古古怪怪咁既樣...
其實我都覺得有D奇怪...
點解Emma好似知我咁多野咁？
我地真係唔係話識左好耐...(不過就過份親密咁囉)
乜我真係有Post過咁多野上Facebook咩？
乜Facebook真係咁無私隱架咩？
雖然話無事不可對人言～
我諗我Post得上網既，大多都係出得街既～
而唔出得街既，大多都係Ashlynn自把自為咁幫我Upload上去宣示主權...(唔知點解，女人真係好鍾意咁做...)
不過...硬係覺得怪怪地...
怪怪地唔係俾人知到咁多關於自己既事...
奇就奇怪在，點會有人會咁關心自己D無聊事...
對於好多人黎講，一張多青既相真係好白痴！
絕對白痴過臨飛之前，都要喺登機閘口前面，影一影個班機顯示屏Post上Facebook，話俾人知你飛去邊～
特別係SL去旅行嗰D！
真係唔怕俾老細Check到，都怕同事報串啦～
講真丫...俾Emma留意唔係唔好…仲好興奮添～
我丫～平時我D相丫～我D廢噏文丫～就連我D Friends都唔會做下樣俾個Like我～
你話我平時幾咁無存在感呀！
難得有人會記喺心裏喎～梗係興奮到好似識飛一樣啦～
不過係有D唔敢相信，我呢D平凡到唔起眼既人，都會俾天使留意到姐...
「可樂，熱檸賓。」個靚仔侍應放低D野放得特別慢，走嗰陣都仲要𥄫多Emma幾眼...
「Hunny！做野啦！掛住𥄫！唔使你做呀？！」坐喺收銀既老闆都忍唔住，要出聲鬧個靚仔侍應～
男人老狗改個女人名，抵你俾老細鬧～
「可樂～可樂～可樂～可樂～可樂～」Emma就一於好少理，好似隻雛鳥咁吱吱叫。
『等等先～唔好咁心急～』我抹乾淨罐個可樂，插埋支飲管落去...
『嗱～一啖…一啖…一啖...喂...喂...喂喂喂！好奸架你～』Emma起勢咁啜...
「嘿嘿～」Emma咪咪嘴笑…
望住Emma燦爛既笑容，快要把我溶化了...
唔係…唔單止我...成間麵店既男男女女老老幼幼，都俾Emma既天使笑容溶化了...
特別係同我地同檯既西裝友，直頭成個呆晒，麵都唔識得吞落肚...
Emma實在太厲害...
老實講句，而家呢個社會裏，好多人都只會葡萄只會恨…
總係唔抵得人地既好～
睇人仆街最開心～
但Emma既驚人魅力，係會令人發呆...令人定格...
呢D係唔係就係天使既技能：時間停頓？
我幫Emma篤下篤下D檸檬，又攪下攪下...
『嗱～飲過可樂就要乖乖地飲返D暖野架喇～』我唔會再心軟架喇...
「唔該～」Emma好有禮貌咁點點頭。
天真爛漫既Emma，又變返一個大家閨秀既Emma了～
所以話，我真係唔係咁捉摸得到Emma...
Emma總係大方得黎又帶少少任性...
好奇怪...
唔係…抑或係我從來都無好好咁了解下Emma呢？
唔係…我同Emma都唔係話識左好耐咋嘛～又點講得上了解呢？
唔係…雖然話我同Emma唔係識左好耐，但Emma就好似好了解我咁...
甚至比我自己更了解自己...
又返番去原本既問題...
點解會咁架呢？
點解會有呢種感覺架呢？
有人話過：「最了解你既人唔係你既情人，而係你既敵人。」
我既敵人？
Emma咁了解我...唔通係因為我係佢既敵人？！
但我又有乜野值得成為Emma既敵人呢？
嗚呀！你搞到我好鬼亂呀Emma！！！
「飛揚～飛揚...飛揚！」Emma搖一搖我...
『係係？係咩事呢Emma？』我失魂落魄咁，俾Emma嚇左一嚇...
「無事嘛？你面色有D難睇喎...」Emma打量我幾眼...
『無無…咩事都無...』我既面色有邊一刻好睇過...
「魚蛋麵，牛腩麵。」靚仔侍應放低兩碗好似湯碗咁大碗既麵後，眼甘甘咁望住Emma行埋一二邊...
嗱～我無講錯架，真係成碗湯碗咁大碗！
唔係好似平時搵鳩人笨柒嗰D碗大湯多，但料就極少嗰D～
眼前呢兩大碗...D麵又多，D魚蛋同D牛腩多到...成個碗都係！
「嘩～好大碗丫～仲好多魚蛋添～飛揚果然無介紹錯～」Emma望住碗麵，雙眼發晒光咁...
『係咯係咯…真係好大碗呢...』平時又邊有咁大碗丫...
慌佢地唔係因為見到Emma呢個絕世天使，個個都立即俾佢冧到暈晒浪，加多D料俾我地咩...
所以幾時都話，有個靚女喺身邊幾咁好～
又一次足以證明Your face, your fate係世界既真諦～
同Emma一齊食野，可以欣賞住天使既食相，真係凡間難求～
「係呢～飛揚等等有咩做丫？」Emma一邊咬下咬下粒魚蛋，一邊問。
『今日約左人上山過夜影星空...』我又咬下咬下食極都唔會食得晒既牛腩...
「上山影星空？同邊個去咁浪漫丫？」Emma露出一副古古惑惑既眼神...
『邊係浪漫呢...同個老朋友咋嘛…』同阿月一齊既話，我唔敢諗浪漫...
「女仔黎既？」Emma打量一下我...
『嗯...』點解Emma好似睇穿左我個心咁既呢？
「唔...黎個人...對你黎講...好重要？」Emma眼定定咁望住我...
呢一刻，我唔知點解釋俾Emma聽好...
我好似...一直都...唔敢話俾人聽...阿月對我有幾重要...
我好似...從來都無...喺人前承認過...
「係你心中既青鳥...你既公主...」Emma既天使面容，帶上一點點黯然神傷...
『嗯...』我點一點頭...
Emma靜左一陣，我亦都靜左一陣...
氣氛總係有D嚴肅...有D怪怪地...
我好似有D唔係好知點咁...
一提起阿月，我個人就好似失晒魂咁...
「佢真係咁好咩？」Emma無奈咁講一句...
『下？』我唔係好明Emma既意思...
「真係值得咩？」Emma繼續無奈咁講一句...
『下？』我仲係唔係好Get得到Emma想講D乜...
「一個離棄過你既人，真係值得令你為佢失去自己咩？」Emma一面哀愁咁樣問我...
天使既哀愁…
『ER…』我仲未講出我想講既說話...
「佢根本就無資格得到你個心！」Emma帶著一絲絲不忿望住我。
『你錯喇！唔係佢拎走左我個心！』我呢句說話，講得有D大聲...
大聲到四周D人都將注意力由Emma身上，轉到我身上...
Emma都有D俾我嚇左一嚇...
『係我...唔願離開...』一直都只係我無辦法離開...
一直都...一直都...
「對...對唔住...」Emma有D不知如何是好咁既樣...面上仲帶有一點點委屈...
Emma…
『係我對唔住先岩...對唔住Emma...我唔應該向你發洩我既情感...』我唔可以咁對Emma...
我唔可以要Emma感受我深心既傷痛...
「唔～」Emma擰一擰頭，「如果你發洩左出黎會舒服D既話，我好樂意感受你內心最深處既情感。」
Emma一直情深意濃咁望住我…
聽完Emma咁樣講一講，我定晒神咁望住眼前既Emma…散發出光芒既Emma...
試問一生人之中，喺世界上，有無可能遇到一個好似Emma咁，好到完美無缺既女仔？
此女只應天上有，人間能得幾回聞...
Emma...你真係好似一個會發光既天使一樣...
天使…
如果話每個人都有一個守護天使喺佢背後，咁你面前既人，會係邊個咁幸運呢？