《港男FF妄誌》: [Day 6－夜空明月] PART 3

同Emma嘆左成個鐘頭早餐之後，都係時候返公司。

「係呢～你個Facebook喺上年既4月1日之後就再無更新喇喎～你係唔係開左個新架？」Emma應該喺道睇緊我個Facebook...

『唔係...只係無乜野更新姐～』我已經Logout左我個Facebook...

「點會無野更新呢～人生每日都係新一章～」Emma仲係好專注喺個Mon道...

『成日都要返工，邊有咁多野打上去。』我地呢D人好平凡，平凡到根本就無野好記。



「咦咦咦～你識影相架？」Emma應該睇到我D無聊亂影。

『唔可以話識既...只係亂影下姐...』我呢D真係連業餘都不如...

「唔係丫～都好靚丫～拍得上WILL CHO～」Emma左手托住個頭，右手一直碌...

『你唔好咁講添丫～人地WILL CHO係大師黎架～我呢D真係算得係乜。』我都係WILL CHO既Fans黎架。

「咁又唔好對自己咁無信心。就算世上只有一個人欣賞你，你都唔可以放棄。唔可以令欣賞你既Fans失望～」Emma對眼碌下碌下。



『嗰個Fans咪係我自己喇呵～』我擰擰頭...

「仲有我～」Emma望住我舉起手，點點頭。

Emma呢個女仔真係人太好。

好到令人唔知點好。

你或者會好希望身邊出現一個好似Emma咁既女仔。



但好老實講，出現左你會覺得好無助。

當你親身接觸到之後，你又會問點解自己女朋友唔係咁？

唔好話完完全全一模一樣，有小小佢既優點都好...

你又會慨嘆點解Emma唔係你女朋友...

又會問自己，憑乜野可以有好似Emma咁好既女朋友？

你係D咩人，你身邊就係D咩人。

女人就話可以飛上枝頭變鳳凰～

男人就只有跌落山崖變螳螂...



或者人就係咁，總愛自尋煩惱...

“叮叮 叮叮 叮叮”

公司電話響？！

『早晨，Good Bob Design。』通常新客先會打上黎公司...

「喂～你好喔～我想搵丫陳生既～」一把溫柔到Gay Gay地既男人聲由耳筒傳過黎...

『我係，請問有乜幫到你呢？』我要正經D先得...

「啊～你好喔～我想搵你地整個會場設計既～」把Gay聲真係好嘔心...



『係～咁先生點稱呼呢？』會場設計咁大單...

「我姓鄭既～叫我阿基就得架啦～」Gay？

『阿Gay生...咁我地做會場設計呢...』我都未講完...

「我睇過你地個網介紹架喇～大至上呢都明架喇～我係想約傾細節既～」Gay生已經急不及待...

咁好死連介紹都唔使？

『咁唔知Gay生幾時得閒可以俾我上黎貴公司傾D細節呢？』呢次真係對住個Gay佬有排傾...

「噢～我今日下午岩岩順路會經過你地公司～唔知三點你有無空～呢～」Gay生特別強調個“空”字...

睇睇個Schedule...



今日...下午...三點...

『三點鐘無問題。』難得唔使出去見客，仲有客自己上黎！

「咁就約你三點架喇波～」Gay生好似Mark女咁既聲...

『OK...OK...』我已經出緊冷汗...

「到時見啦～Bye～Bye～」

『Bye...』仆你個街！Bye你老母！

真係難撚頂...



老老實實，我為左兩粒米，俾女人用高踭鞋踩屎眼我可以忍！

俾阿婆強吻打茄輪我可以忍！

被迫舐肥西我可以忍！

做小白臉咬老軟扮謝繼聰我都可以忍！

但Gay佬...

我可唔可以唔掂丫...

唔係…

可唔可以唔俾佢掂丫...

菊花呢架野，斗零踭就話姐...

大碌小小都會失禁架喎...

唔好咁對我啦好唔好...

「飛揚～做咩面色咁難睇既～」Emma送上關心...

『無...諗緊菊花姐...』無喇無喇...

「菊花？」Emma頭上出現幾個問號...

話時話，都好耐無客上過黎公司...

上黎公司...

會客室？！

『仆…』街喇！

我立即衝入會客室...正確D黎講係雜物房...

呢間會客室之前已經無乜幾何用，肥豬老闆為左慳返D錢，就連Call清潔公司都唔使清潔呢間房...

再加上Emma黎左之後，所有雜物都堆晒入去...

而家間房真係又亂又大塵...

「做咩丫飛揚～」Emma行到我身後...

『等等有客會上黎...但間會客室...』我望住一堆雜物...一面茫然...

你叫我點用黎見客丫...

「睇黎要執執佢先得喇～」Emma開左會客室盞燈。

『但執去邊？』我地公司咁細...

唔通搬出去塞喺我地D位道咩？

「執去肥豬間房咪得囉～反正佢今日都唔返架啦～」Emma轉身開左老細房道門...

『會唔會唔會咁好...』話晒都係老細房，放雜物喎...好無大無細姐...

「唔緊要啦～」Emma開始搬D雜物。

『喂喂喂...重丫！等我黎！』我一手接左Emma手上既雜物。

我同Emma一件一件咁搬D雜物到老細房。

Emma弱質纖纖咁，但都好落力。

我就唔係好捨得要佢搬重野...

所以我都係叫Emma搬D細件D既就夠。

始終女仔係要黎憐愛...

「好～搬晒喇...乞嗤...」Emma細細聲打左個乞嗤。

『哈哈～好大塵呢...乞嗤...』我都忍唔住...

「嘻嘻～你自己咪又係打乞嗤～睇黎要抹下塵先得...嗯...等我一陣...」Emma轉身行左出公司...

Emma想去邊呢？

過左一陣間...

Emma左手拎住一塊毛巾，右手拎住一部汽車吸塵機返黎。

「我問隔離賣清潔用品既公司借左D display過黎用～」Emma同我打左個眼色。

『咁都得？』難道靚女真係著數D？

係既...

同Ashlynn一齊既時候都有留意，Ashlynn可以R到好多著數返黎。

買野又可以平D，又多D野送...

買野飲又大杯D...

買串魚蛋都多幾粒...

只要目標係男人，電一電佢，俾佢望下大髀，烏一烏低身俾條溝佢睇下，甚至貼近少少俾佢聞下體香，男人個腦就會閉塞...

男人...單純為女色而生既生物...

所以話男人係單細胞生物係無錯～

接過Emma手上既汽車吸塵機之後，我就跪喺地下吸地毯...

呢間房塊地毯除左年頭搵過人黎消毒清洗外，半年都無人理過佢...

會唔會已經生晒蚤架喇...

我一路吸...只可以盡吸...

而Emma...

Emma跪喺梳化上抹緊梳化...

Emma個身向前趴一趴...

我呢個角度...係Emma既後面...

我望到Emma條白色短裙擺下擺下...跟住Emma身體既節奏擺下擺下...

雪白既大髀...搖下搖...

我只需要再踎低小小...再踎低多小小...

見...見到喇...

白色短裙搖動下...白色Lace底底若隱若現...

底底喺屁股間攝下攝下...

Emma呢種屁股既擺動...

輕微既前後擺動...

就好似...

推車咁...

好誘人既姿勢...

我已經望到條JJ都硬一硬...

Emma既屁股、底底、大髀、小腿、涼鞋都吸引住我視線...

我真係好想行埋去Emma身後，捉住佢條小蠻腰抽插幾下...

唔好話有無得抽插...

我怕就係隔住條Lace底底磨幾下都忍唔住要射...

條JJ越黎越硬...

我隻手已經不自覺想伸入條JJ道...

好想...

好想同Emma...

唔得！

唔可以做錯事！

Emma係一個好女仔！

我唔可以佔佢便宜！

冷靜D！

繼續吸塵！

我一路吸，好專心咁吸。

再無望去Emma嗰邊。

有時我都唔可以唔俾個Like自己～

正所謂孤男寡女，仲要係個Office道，仲要面對Emma呢種女神，係男人都姦左先講啦～

不過我就仲可以控制得到自己，將獸性鎖起黎，我真係男人中既XO～

同Emma一路打掃間會客室，Emma好努力咁抹～

抹到塊毛巾都係塵既時候，Emma又會去洗手間洗一洗塊布。

我又一路吸，吸下D角落，吸下D牆邊～

呢種感覺就好似返返去中學時，打掃班房...

『明明有六個人放左學要黎打掃班房，而家又得返兩個班長...』我一路拖個地，一路埋怨。

「算啦～我地兩個都做得黎啦～」阿月用濕毛巾抹緊長檯。

『呢個係責任既問題！』我仲係心心不忿！

「責任，係個人。我地盡左我地既責任咪得囉～」阿月專心咁抹。

『但而家既情況係我地盡左我地既責任之餘，仲要盡埋人地既責任喎。』無人既班房又快要變成城市論壇。

「頭先我唔係講過喇咩，我地兩個都做得黎～咁其他人咪多餘囉～定一或你想我地兩個先係多餘？」阿月又濕一濕塊毛巾，扭一扭。

『唔...』阿月講得好似好有道理...

假如兩個人足以完成其餘四個人既工作，又或者四個人可以完成我地兩個人既工作，咁就係好似唔需要咁多人...

之但係...

『假如有多四個人既話，我地無咁辛苦囉！』呢個先係重點！

只見阿月停左手上既工作，識真咁打量左我一眼：「Acedia，七罪宗...如果你真係存有呢種心態...我會對你好失望...」

「飛揚...飛揚～你就快吸爛塊地毯啦～」Emma拉一拉我，將我由回憶拉返黎現實...

『So...Sorry！』我立即閂左部吸塵機，企返起身...

「你無事嘛？」Emma眼定定咁望住我。

我眼定定望住Emma，一時間俾唔到反應...

Emma一雙大眼睛真好迷人...

好似BB一樣咁白咁滑既肌膚...

小嘴半開半合...好似正要吸走我靈魂...

『無...我無野...可能踎低起身見頭暈掛...哈哈...你件衫...』我望一望Emma件白色連身短裙...

喺肚既位置俾D塵整到灰左小小...

我輕輕力幫Emma拍一拍...掃一掃...

Emma眼定定望住我...

『Sorry丫Sorry丫！我唔係有心...我見有D塵...』我做乜非禮Emma丫？

點解我忍左咁耐都無去侵犯佢，就係衰好心？！

我真係無心非禮Emma架！

都係自己諗得太多以前既野！

諗到個人都迷晒！

「唔緊要～我要唔該你至真～」Emma對我笑一笑。

Emma...

你太體貼喇...

「間房抹好晒喇～應該可以用黎見客架喇～」Emma喺室會客室轉左一圈。

短裙輕輕飄起，美麗動人...

與Emma身處同一個空間，我覺得好自卑...

點解世上可以有一個咁完美既女仔？

點解世上可以有一個咁多缺陷既我？

我成日都話，上帝造人既時候，就好似玩某D MMO咁，喺創造既時候可以調教能力。

你有一百點能力點，就睇你點樣去分配。

有D人鍾意放晒去外表，有D人鍾意放晒去智慧，有D人鍾意平均分配。

你鍾意點分都好，總之就有一日點俾你分。

但真正既人生有少少唔同...

唔同既係你呢一百點唔輪到你話事。

呢一百點係由上帝幫你安排...

你可能想唔使咁聰明，唔好太樣衰，健康最重要。

但上帝可能就係要你好聰明，但好樣衰仲要有長期病。

你可能想唔使要聰明智慧，就係好運就夠。

可惜上帝可能就係要你又聰明又有智慧，但黑足一世...

雖然係咁，但我都好感恩，因為始終都叫做有一百點丫嘛～

之但係面對Emma黎種...

係唔係用左金手指架？

點解佢好似唔只一百點架呢？

點解佢好似個個能力都有一百點架呢？

點解令我覺得上天咁唔公平架呢？

或者好似好多人所講：「有人類既地方就唔會有公平。」

『Emma...辛苦你喇...』我帶住憂鬱既眼神(朦豬眼)望住Emma。

Emma定一定神，笑一笑：「唔辛苦～」

Emma...

你呢種比天使更完美既女仔...

究竟要幾多Level先可以高攀得到...

「不過我有D餓啦...」Emma摸一摸自己個肚仔，伸一伸脷。

雖然話女神唔屙屎，但都要食野既...