《港男FF妄誌》: [Day 6－夜空明月] PART 2
“啪 啪 啪 啪”開晒D燈之後，又要開著部死人爛鬼電腦...
「我尋日已經搞掂晒E-mail裏面既所有工作～而且都無再彈返轉頭啦～」Emma坐定定托住個頭對我笑一笑...
『咁...咁快搞掂晒？！』我仲以為尋日無返工，今日做死我...
「OK啦～咁我地今日咪可以得閒D囉～」Emma向我打左個眼色...
用Mac機係唔係真係好咁多？
唔係囉！
係Emma太厲害！
呢D都係Emma既實力表現...
樣又靚、身材又好、人又友善、頭腦又聰明、工作效率又高、仲要係有錢女！
我同佢個Gap真係有幾千公里闊...
「係呢～尋日同你細妹去左邊道玩丫～」Emma一直望住我...
『無...佢學校搞左個天...才藝表演...我去睇佢咋嘛…』突然令我諗起差D同GiGi...
「你細妹就幸福啦～有個咁錫佢既哥哥～」Emma又伸長對腳...
今日可以望到Emma既腳指...
Emma今日無搽腳甲油，睇落都係一樣咁靚。
『都唔係既...』我又諗返起尋日同阿Wing做左D唔應該做既事...
「係呢～有無你細妹D相睇下？」Emma仲係一直望住我...
『你可以去我Facebook睇下～』點解我部電腦都仲未Load到入Windows？
「咁你Facebook係咩丫～」Emma將雙手放到去Keyboard上。
『[email protected]...』Load到入Windows又要等...
「Accept～Accept～」Emma好興奮咁。
『哦...哦...你等等...』我好似已經好耐都無開過Facebook...
真係好耐...
由幾時開始？
耐到我都唔記得...
我只係記得喺我唔想再接觸到“佢”既資訊之時，我就再無開過Facebook...
『Accept左...』我開到個IE之後就立即Accept Emma...
睇一睇Emma個頭像...
係前日同Emma去迪士尼既合照？
我帶住米奇老鼠耳同Emma一齊影既合照...
望一望個Like...
個...十...百...千…
『八萬…』我立即撳撚住自己個嘴...
八萬幾個Likes？！
痴線架？
邊道得黎八萬幾個朋友丫？
我之前Post乜柒上個Facebook都好，頂多都係得嗰兩、三個Likes...
唔係喎...俾Emma D追隨者喺街上見到我，會唔會追殺我架？
咁搞法...我真係有機會死左都唔知咩事架喎...
「嘩～你細妹好靚女喎～仲要用你同佢既合照做頭像～睇黎你地既感情都好好～」Emma一路望住個Mon一路講。
『下？係咩？我可唔可以過黎睇睇？』我企左起身，正準備行過Emma身邊。
「嗯嗯～過黎一齊睇～」Emma表現得好興奮...
我望一望個廿七吋Mon...
『呢張相尋日喺佢間學校影～估唔到佢會用黎做頭像～』阿Wing仲要笑得好開心～
「你細妹攬得你好實喎～佢一定好愛你呢個哥哥～」Emma指一指張相...
『OK啦...我地既關係都真係幾好...』有D好到過左火...
「就係一張頭像相都有成九千幾個Likes～你睇下你睇下個Caption～“邊個都唔可以掂我哥哥！”～你已被禁了～」Emma指住段Caption...
禁溝令...
睇黎阿Wing身邊既同學朋友我都無行了...
「D Comments都好正～呢個呢個～“世上又少左個靚仔揀喇～”～呢個呢個～“放低一蚊跟機得唔得？”～呢個都OK～“你放心～我會對你哥哥好好～我會令佢晚晚都可以開開心心瞓覺覺～”～」Emma一路碌D Comments...
『D細路女係鍾意講笑...』我都好想可以晚晚砌妹妹仔呀...
「你細妹D回覆都好正～“邊個夠膽搞我哥哥我一蚊都拎埋佢！”～仲有仲有～“姊妹都無情講！”～呢個正呀喂～“你係唔係想長眠？”～」Emma繼續睇阿Wing D回覆。
『我細妹係好鍾意講笑...』唉...我都想係講下笑...
Emma繼續睇阿Wing D相...
「你細妹真係好靚女丫～呢張呢張～“岩岩剪完頭髮”～又成四萬幾個Likes～D Comments話佢好似黃河～我都真係覺得佢好似Heidi～」Emma露出驚訝表情...
『係咩...』其實我都覺得阿Wing好似Heidi...
「呢張呢張～嘩～未剪頭髮之前都好可愛～好有初戀Feel～仲有呢幾張～身材都好標準～」Emma繼續碌...
硬係覺得好奇怪...
俾一個女神級既女仔讚我個細妹靚女...
咁即係我細妹比女神級更靚？
我都唔知...
的確阿Wing真係好靚女...
但...
我從來都只係用哥哥既角度覺得阿Wing靚...
自己既細妹點都係最靚架啦～
但如果我唔係阿Wing既哥哥...
阿Wing真係好吸引...
我相信我一定會俾阿Wing勾走...
一世都會做阿Wing隻兵...
「你細妹咁靚，一定好多男仔追啦～」Emma對眼仲係發晒光咁望住阿Wing D相...
『係掛...尋日去到學校俾佢攬住既時候，四方八面勁大殺氣殺埋黎囉...』真係令人抖唔到氣...
「嘩～你仲返到黎都算係奇蹟～哈哈哈～小心人地男朋友仔唔放過你丫～」Emma指一指住我個鼻...
『咁又唔驚喎～佢話佢無拖拍喎～』我俾阿Wing D靚相吸引住...
「無拖拍？咁靚女都無拖拍？」Emma有D懷疑。
『嗯～不過佢話佢有深愛既人～』你自己夠晒靚女啦，咪又係無拖拍～
「咁你有無見過嗰個人係點樣架？」Emma繼續追問。
『我都未見過喎～』阿Wing真係好靚...
「相都未睇過？」Emma繼續帶住懷疑追問。
『相都無俾我睇過～』好活潑...好燦爛...
「嗯...或者係唔俾得你睇呢～」Emma甜絲絲咁講。
『下？』我唔係好明咩意思。
「可能因為俾你見到你會唔鍾意～」Emma繼續甜絲絲咁講。
『即係話我細妹鍾意左個壞男孩？』男不壞，女不愛？！
「唔係～唔係～唉～少女心事你唔明架喇～」Emma繼續甜絲絲咁講...
『你唔講又點會明呢？』我質疑咁問Emma。
「所以話你唔明囉～少女心事就係要你估架嘛～」Emma仍然繼續甜絲絲咁講...
點解女仔咁鍾意人地估架呢？
好玩D？
興奮D？
覺得你估到既話先叫做了解？
定係無咁尷尬？
咁就算估唔估中都好，男仔都一樣會尷尬架姐...
咪會好多男仔扮估唔到囉～
女仔又唔會開估架喎～
咁咪錯過左囉～
我真係唔明呢個世界D人諗緊乜...
我輕輕說一句生日快樂，埋藏千斤愛意。
我們面對最愛時，總要把真心收藏於最隱蔽的地方。
總怕愛得越真，傷得越深。
「渚薰講過“AT力場就是任何人都擁有的心之壁。”～」Emma對我打左個眼色...
竟然喺我呢個Evangelion達人面前講心之壁？
『你要知道，渚薰既同步率之所以咁高，唔係因為佢係使徒。係因為...佢解開左佢自己既心之壁，去溶入別人內心～』都係唔好講得咁複雜～Emma會唔明～
「咁你解開左未？你未...你內心深處有一件寶物被厚厚既AT力場保護住...你唔係自由天使，你係司力量之天使Zeruel...」Emma望住我對眼...
「你知道嘛～眼係靈魂之窗～你可以透過眼睛睇到出面既世界...」阿月指一指自己隻眼。
喺夜空明月下，我同阿月坐左喺公園...
四周都好似好靜...
就連街燈都比較暗...
『小學雞都知啦～』呢個阿月講埋D咁白痴既野，又想玩咩花神？
「咁你又知唔知道當你望緊人地既時候，人地都可以由你眼中睇到你既內心？」阿月莞爾一笑。
『下？』阿月想講乜？
阿月貼近我，貼到我面前：「問我...“你愛唔愛我”...」
「飛揚～喂喂喂～」Emma既甜美聲線將我帶返黎現實...
『Sorry...我...諗起D野...』點解又會諗返起...
「唔緊要～我都好鍾意俾你咁樣望住～」Emma甜絲絲咁笑左一笑。
『係咩係咩...』我以為唔會再諗起...
「你細妹真係好靚...又青春...又可愛...」Emma帶住羨慕既眼神望住阿Wing D相...
『其實你都已經好靚...好迷人...』我眼定定望住Emma...
Emma聽完我咁講之後，視線轉到我眼裏...
四目交投...
成間Office都好靜...
好似比以前得我一個人嗰時更靜...
靜到好似可以聽到對方既心跳聲...
聽到對方心裏面諗緊咩...
『你幫我做晒D野，我應該要報答返你既～我請你食早餐～想食D乜我叫外賣～』我行返埋自己位...都係保持距離比較好。
「不如我地出去食啦～」Emma跟住我行左過黎...
『不過...返緊工架喎...』雖然話肥豬未返...
「唔怕啦～隻肥豬今日唔會返架喇～」Emma已經拉住左我隻手...
『係姐...但有細路電視...』我指一指天花上面黑色既半圓球體...
「就係有呢舊野我先唔想喺道～」Emma谷起塊面豬登...
『係姐...但...』我都仲未講完...
「行啦～」Emma就拉住我走出公司...
平日睇高登見D巴絲們返工打完卡落去食早餐就見得多～
自己就真係未試過～
『你想食D咩？』其實Emma鍾意食D乜，我真係睇唔透...
一個上等人應該會食D我地下等人永遠都接觸唔到既野...
好似話朝早要飲牛奶要搵隻牛黎即揸丫...
屋企出面個花園係葡萄園，要食就即摘丫...
雞蛋係岩岩生出黎...
就連煎條腸仔都要個大廚喺身邊煎丫...
上等人丫嘛～乜都要浮誇D架啦～
但Emma就好唔同...
平價刺身又食...
垃圾漢堡又食...
我覺得好親民...
但我又接受唔到呢個事實...
總係覺得好似委屈左佢咁...
「我想食茶記～」Emma搖一搖我隻手...
茶記...
一個上等人識得用“茶記”呢兩個字，你話幾咁唔真實...
『茶記...咁太興好唔好？』話晒都係上晒市，又搵埋Tony Stark賣廣告～
「OK～我都想試下佢個冰鎮奶茶～」Emma點點頭。
『個冰鎮奶茶飲完今晚都唔使瞓～』
「係唔係咁厲害丫？我唔信～」
『真架～我嗰次飲完之後真係精神到可以打十個～』
「唔信～唔信～唔信～」
轉幾個街口，去到太興。
「兩位隨便坐～」一個靚仔好有禮貌咁歡迎我地。
睇佢眼甘甘咁望住Emma...
明既～男人丫嘛～
『睇下食D咩～』我遞左個Menu俾Emma...
Emma望下望下個Menu：「嗯...我要個B～」
『一個B餐，一個C餐，兩杯冰鎮奶茶。』其實個個餐都差唔多，真係同無得揀無乜分別。
「一個B餐～一個C餐～兩杯冰鎮奶茶～請兩位慢慢等等～」個靚仔侍應好有禮貌笑晒口咁全程望住Emma講...
唔講以為去左高級法國餐廳...
旺角呢間D服務好D架咩？
點解我地屯門嗰間咁差既？
關咩事丫～
只係因為見到靚女姐～
Emma靚成咁，係男人都扯啦～
正所謂“Your face, your fate”...
望住Emma個身震左一震...
係佢個身震，唔係我下身震...
呢間太興真係有D凍...
『Emma～著住佢～』我除左自己件西裝褸，遞左俾Emma。
「唔該～不過...你唔驚俾你女朋友聞到你件褸有第二個女仔既味咩？」Emma一邊褸住一邊問。
『佢都唔知去左邊～』Ashlynn...
「下？唔知去左邊？」Emma追問。
『係丫...佢話要飛喎～但又無話飛去邊...又無話飛幾耐...』成日話男人無交帶，女人咪又係一樣...
「咁你唔擔心架咩？」Emma疑惑咁問。
『佢久唔久就係咁架啦～過幾日就出現返～』的確Ashlynn久唔久就玩失蹤...
Emma諗左一諗，又望一望我：「你愛唔愛你女朋友？」
『愛，梗係愛！』唔愛又點會一齊？
Emma更加疑惑咁講：「根據弗洛伊德所講，人喺清醒既時候保護機制特別強...如果你話愛，即係唔愛...如果你越答得堅決、快速，即係話你內心既力場越厚...心之壁丫...」
『哈哈哈...原來弗洛伊德就係渚薰～終於都補完成功～』Emma睇得太多EVA喇～
「我講真架...你...唔係真係咁愛你女朋友...」Emma眼定定望住我...
我唔係真係咁愛Ashlynn？
我立即拎住部電話出黎，搵左張Ashlynn最靚既相隊俾Emma睇：『我女朋友，成個連詩雅咁既樣我點會唔愛佢？』
Emma望左一眼：「我靚唔靚？你愛唔愛我？」
聽完Emma咁講，我成個人靜左...
呆望住Emma...
我估唔到Emma佢會咁問...
問我愛唔愛佢...
「如果係單單因為佢靚而愛，呢種唔係真正既愛...真正愛一個人包含好多好多好多，絕對唔係只係因為佢靚...睇黎你唔係好知咩叫愛...」Emma憐憫咁望住我...
愛...
「你根本就唔明咩野係愛！」
我唔明？
如果我唔明...
我就唔會等左你八年...
「飛揚...飛揚...Sorry丫～我係唔係講錯野？」Emma捉住我隻手，搖一搖。
『唔係...唔係...』我對住Emma勉勉強強笑一笑...
「Sorry...」Emma表現得非常難過...
『真係無野喎～你同我之間唔需要講Sorry～』點解我會咁講架呢...
只見Emma呆一呆，再對住我點點頭，好溫馨咁笑。
Emma...
我唔知我係唔係愛上你...
或者正如你所講，我唔係好知咩叫愛...
但我相信，就算去唔到愛情，亦都不下於友情...