《學校裡面, 只能有一班生還》: 外傳五話：《棋子》
大概在一個年份已經無從稽考的日子。
「終於得咗啦...」有一班人眼神閃爍著, 看著一個接一個由地板連接著天花板的試管。
「咁計劃亦可以差唔多開始。」其中一人說道。
可惜, 部份場內的人並不知道, 面前一堆有著共同目標的人, 裡面其實已經風起雲湧...
大家也各懷鬼胎, 不過這不重要。
「月先生, 今次真係唔該晒你, 冇你地家族既財力, 我地好難可以實現到呢個咁遠大既計劃。」一人欣喜地跟另一人說著。
「最穩陣既方法, 係先搵一小撮人做實驗先。」他答道。
「唔洗擔心, 我地已經決定搵邊一班做呢個實驗。」另外一人點著頭, 狡笑說道。
這樣的對話, 別人聽到簡直會心寒至極。
一堆豺狼, 說著泯滅人性的說話。
「到真正實驗嗰一日, 班學生團結起上黎都好麻煩。」有一人提著憂慮。
「嗰陣中六應該study leave緊。」另一人答道。
「好簡單啫, 等我搞啦。」有人開腔, 自信滿滿地說道。
最簡單讓一群人不團結的方法...
莫過於離間, 分化。
而實行這兩項因素的條件...
就是使他們有利益衝突。
在某一年的會議室內, 那年還是中五的黃社人, 部份正在裡面吵得面紅耳赤, 聲量大得連同走廊裡的教員室也聽得清楚。
「總之我地prefect係點都唔會退讓。」領袖生長Kelvin翹著手, 安然坐在椅子上說道。
「我地學生會一樣立場。」是年學生會會長豉油也這樣說道。
「點解唔可以搞一個行政會? Prefect係執法機關, 評議會同學生會就係立法機會, 以往一啲仲裁例如學生投訴都會係評議會處理, 咁實在太唔公平。」有一個有著雄渾聲線, 別人都叫他作「老大」的人, 正指著豉油跟Kelvin來罵。
「你估你真係大佬咩, 比面你先咁叫你咋。」Kelvin毫不客氣, 這樣回著嘴。
「唔好當我傻啦, 你地反對既原因咪又係驚有一個分薄你地而家擁有既權力, 咁你地同個689有咩分別呀? 」老大憤怒地拍著桌子, 怒視著他們兩隊人馬。
「冷靜, 我地議事論事, 唔洗郁手郁腳。」同是學生會幹事的天娜, 幫著口。
「大佬, 你唔好當我地傻就真啦, 你估我地唔知你係自己整個咁既野出黎, 再獨攬大權咩? 你精我地都唔笨架。」豉油斜笑著。
「我勸同學你無謂白費唇舌, 你呢個提議就算上到去校長到都冇用。」那年還是由老師擔任評議會主席的李sir, 同樣抨擊道。
當然, 老大的理想被prefect, SU, 評議會, 這三個直接影響利益的團體阻撓就是肯定的事, 情況就好像某電視台不獲發牌。
同樣, 這樣的撕裂亦相當容易被入位。
「點解...」有一天, 老大被某一個老師召見, 去了一所並無甚麼特別的房間。
「你唔需要理會點解呢四個人點解唔係人類, 你只係需要知道....」一名老師狡笑著, 看著老大。
「盡情地為自己報仇就可以。」
「點解你咁肯定我會幫你? 」老大不忘套著來者動機。
「你有得揀咩? 」老師嘴角揚了揚, 瞥著老大。
就是這樣, 一個五人組合就這樣形成。
「原來你地唔係人類黎。」老大向著中六Sherman, 說道。
「我地一直都係等緊嗰一日, 到時我地就自由身, 可以用自己隨意既身份, 隱姓埋名咁生活。」科特答著。
一直以來, 間諜就被安插在學生當中。
一名中三, 三名中六。
可是最悲慘的是他們並不清楚, 自己只是一枚枚將被用完即棄的棋子。
「聽講中三中四各有一班人都好勁。」回到屠殺中六人的時間, 剛結伴同行的Oscar跟Jehoshua聊著天。
「必要時或者可以投靠佢地既, 直覺總係覺得佢地當中有人可以救到我地。」Jehoshua微笑應道。
「係咩? 」突然, 他們眼前冒出了一個人。
一個散發著龐大殺氣的人。
「佢地叫咩名呀? 」一個男生正在向著他們衝過去。
「咁你呢? 」Oscar還是不忘暗忖道。
「來者科特。」
「吓....」Oscar看似避過科特直殺過來的一刀。
「點解...」忽然, 他看著前方消失了的人影...
「太慢。」科特已經走到Oscar後方, 一刀把他的後頸齊口割開。
「我有遺言講....」Jehoshua自知不能逃脫, 這樣問道。
「中二有一個叫景希既人係我最好既朋友...如果你見到佢....只係需要同佢講我死咗就okay....」他帶著一點怯著的語氣, 說道。
「盡量。」一聲清脆的刀聲, 劃過了走廊之間。
時間回到東翼殺戮戰, 中三VK4502A已經重生, 正跟著老大他們進入東翼...
進行最後的屠殺, 目的是清除有機會阻礙數據收集的人。
「VK, 你戰鬥力仲有幾多? 」老大在黑暗裡潛行著。
「要真正落場先知。」Vk言談之中流露沒有把握的意思。
「加油。」科特這般說道。
於是, 他們就進入了東翼大堂。
大堂之內, 基本是一片漆黑, 靜謐得連眾人的呼吸聲也聽得一清二楚, 同時亦使人極其不適。
「咁快? 」老大喊著, 他們亦敏捷地避過忽然冒出的火球。
「中五玩火既咩? 」雪曼忖著道。
「金主召喚, 能量既轉換, 有火出到黎唔出奇, 但好難先會做到。」有數名中五現已居於樓梯上方, 並不怯懼眼前那批並不是人類的所謂「中六」。
看來, 雙方也有著覺悟。
「我地唔係人類喎, 你地唔驚咩? 」丹拿用著天真的語氣, 向著上方的人說。
「即管睇吓邊個驚邊個! 」一名中五男生喝著, 同時一隻長得像英雄聯盟裡的吶兒召喚獸, 在大堂裡凝視著他們。
是變大了的吶兒, 不是原本型態的吶兒。
「咦? 啱啱有啲人過到黎話Gary你變咗機械人原來係真架? 唔係話比Cory收咗皮? 」其中一名中五這樣揶揄道, 便看著那隻召喚獸。
「收拾佢地。」他下著指令。
「睇吓繞唔繞得過佢地, 殺咗佢地先就唔洗理隻怪物。」老大輕語唸道。
「嗯。」身型細小的丹拿自知最適合擔當這樣的任務。
「VK, cover! 」只擅長在幕後做炸彈還有色誘的雪曼, 也意識到自己不適合當前線。
VK熟練地拿著剛才在北翼時的武器, 向著召喚獸「咑咑噠噠」地掃射, 硝煙彌漫。
丹拿此時亦找了一個空位, 迅速地跑了上去。
「噹啪! 」刀劍相接, 有一名雙手變成利鋸的中五, 以迅雷不及掩耳的速度向著丹拿施襲。
「冇可能... 點解會咁強...」丹拿被這突如其來的一擊怔倒, 連忙重新架回姿勢。
「太慢。」兩名中五此時在上方躍下來, 借助衝力向著丹拿揮斬。
「咑咑咑咑。」眾人留意到VK4502A的槍管掃到他們這邊來。
「掩護! 」各人同時也閃的避, 蹲的蹲。
「太蠢啦。」一名中五在VK重新向著「吶兒」發動槍勢後, 這麼喊道。
因為他留意到老大他們, 在這個時候竟然互相聚得非常接近。
「吼! 」召喚獸發出龐大的一聲巨響。
「散開呀! 」老大察覺到有不對勁, 可惜已經為時已晚, 或許他會後悔自己為何低估中五的實力。
「呯! 」中五的目的, 就是讓召喚獸衝入去, 其後自爆。
就像自殺式炸彈襲擊一樣, 配上鐵釘和鐵枝會使其殺傷力更強大。
而中五他們亦已找到位置匿藏, 確保自己不會被爆炸波及。
黑煙, 紅光彌漫...
中六的棋子....就是這樣....死掉了嗎?