[中篇]隱藏係香港地底既秘密──點解要我去發掘？: 書塚

可惜的是，列天欣一句話立刻打消了我這個不切實際的可怕想法。
 
「上一批人帶唔走，你估我地都帶得走咩？」她沒好氣地說道：「呢口石棺就算切開三部份淨係攞一部份走都冇乜可能呀。我諗你堂哥都淨係需要上面啲花紋姐。」
 
堂哥在此時用一把小刷子掃去雕刻表面的灰塵，然後從背囊裡拿出了幾張紙，試著把那些雕刻拓印下來。我又問道：「呢啲係咩花紋黎架？」
 
「袐籙，天師道既一種密碼。」堂哥用鉛筆斜斜地在紙面掃畫，那些花紋逐漸顯現在紙上，有些像希臘字母，有些扭曲得像某種表情，數來約有二百來個，一時半刻都應該拓不完。
 
我看了看手錶，現在已過凌晨。以往看恐怖電影，凌晨總是會有什麼怪事發生，但現下看來什麼事都沒有，我也心安了點，看來也不用等到天明就能回到家。在這裡過夜，即使堂哥說是個虛塚，終究有種恐怖陰森的感覺，讓我起了一身雞皮疙瘩。而且剛才外頭遇到的事，至今想來還是覺得害怕，但願那所謂新娘的丫環不會進來這座墓裡。
 




趁著堂哥在拓印花紋，我和列天欣坐在地上休息，喝了些水，還各自吃了一排巧克力。列天欣用電話拍了些墓室的照片，我笑著問道：「係度影相，你唔驚翻去睇相時見到啲野咩？」
 
列天欣若無其事地把電話放回書包裡：「我冇你咁細膽，我先唔驚呢啲野。」
 
「係喎，講翻起，你上兩次係去咩人既墓？」
 
列天欣用食指抵著下頜，沉思了一會，說道：「冇記錯既話，一個係宋朝既節度使，一個係明朝既吏部右侍郎，名我唔係好記得清楚，因為我主要留係耳室度整理啲野，冇跟埋爸爸同佢既朋友去到主室。通常主室都會擺啲野黎記述墓主人既生平。」
 
「聽落兩個好似係大官……算啦，我冇讀歷史，唔識呢啲野。咁我地今次呢個肯定係富貴人家啦，有錢起埋咁既虛塚。不過你話主室會有野記錄生平，點解呢度冇既？比上一批人攞走左？」
 




堂哥此刻停下了手上的工作，回應了我的話：「唔係上一批人拎走。呢個虛塚亦唔係屬於一個人，準確啲黎講，佢屬於一本書。」
 
列天欣聽了他這句話，突然顯得異常激動，猛地站起身來，捉住堂哥的手臂：「你講緊既係唔係《錄圖真經》？」
 
堂哥頜首，輕輕巧巧地掙開了她的手。列天欣仍然熱切地急聲說道：「乜佢唔係你地姓寇既手中咩？真正既藏書地點係邊？你地確定左未？」
 
這下就只我一個完全搞不懂狀況，開口正想問話，列天欣卻回過頭來向我拋下一句：「陣間同你再講！」又轉向堂哥，好像在等待他回話。
 
堂哥過了良久，才慢條斯理地說道：「我地本身唔姓寇，而係姓張。《錄圖真經》確實曾經係我家族手中，但係明朝已經比人搶走左，我地呢一代都仍然搵緊。」
 




列天欣的目光落到石棺的袐籙上頭：「上面係咪有講真正既書塚係邊？你而家翻唔翻譯到出黎？」
 
堂哥搖頭：「我而家做唔到，呢個世界上已經冇人識得袐籙點樣解，我要拓印落黎都係為左研究點樣破解呢種密碼。」話畢，他也不管她臉上現出非常失望的表情，轉過身去繼續他的工作。
 
列天欣失落地嘆了口氣，重新坐了下來，大概是感覺到我正好奇地盯著她，便說道：「我地講緊既《錄圖真經》，係北魏新天師道既宗師寇謙之所寫。我曾經聽講過有人有佢既拓本，但係我爸爸去查證後發現只係偽作。據講，只要搵到《錄圖真經》，就可以搵埋《三皇經》，有左呢兩本經書，我地先可以抵抗到茅山上清派既人。」
 
我似懂非懂地點頭。就這樣看來，似乎是有兩本很重要的經書，總之堂哥一家和列天欣父親都想找到。我突然想起一事，問道：「你呀爸點解想搵到既？你地唔係六壬神課既傳人咩？同天師道、咩茅山上清派有咩關係？」
 
「唉，講就有排講，總之我地算係同一陣線架啦。」列天欣好像有點不耐煩，揮了揮手：「幾百年既事好難一下子講清楚，有機會我再同你講啦。」
 
此時堂哥已差不多拓印完石棺蓋表面的袐籙。我正想著終於完成任務，可以回家去了。怎知堂哥把那幾張紙收到背囊後，回過身來，木無表情地說道：「幫一幫我手，我要推開塊石棺蓋。」