[中篇]隱藏係香港地底既秘密──點解要我去發掘？: 列天欣

當我腦海裡浮現堂哥的名字時，我就知道是我的第六感提示。此時Ms Tsoi饒有興致地問道：「咩風水野？咩禮堂單野？」
 
我還在想怎樣打發過去，列天欣便衝口而出：「Miss你冇聽人講過咩？暑假時學校裝修啲意外，係呀臨諗方法解決左架！」
 
我瞪了列天欣一眼，她向我吐舌頭，擠出個鬼臉：「反正同Ms Tsoi都唔會亂up出去架啦，分享下你同你堂哥啲威水史唔好咩？」就是這樣，她這個長舌婦便把上次禮堂的事大略跟Ms Tsoi說了一遍，當然，她還是會顧及我有可能因為觸犯多條校規而倒大霉，刪減了大量情節，最後看起來，就成了我在學校覺得不對勁，而找到後頭斜坡的源頭，請來堂哥破法，最終解決問題。
 
「唔講係真事，我都以為你講故仔添。」Ms Tsoi笑了笑：「你堂哥同呀叔係天師道既人？」
 
「係呀，我堂哥係嫡系子孫，所以有得學道，睇黎我呀爸同我都幾好彩。」我吞下最後一口飯，說道。Ms Tsoi挑起兩眉：「點解覺得好彩？學道唔係幾好咩？」
 




「吓？我覺得一啲都唔好，睇我堂哥果個樣，成碌木咁，我至唔想好似佢咁木口木面。」
 
Ms Tsoi若有所思地點點頭，瞥了眼手錶：「差唔多夠鐘翻去喇，大家行得未？」
 
我們便乘她的車回到學校。下午那兩課都是英文，我沒心思聽書，只在想第六感的提示。我該去找堂哥嗎？但找他做什麼？難不成直接跟他說：有冇睇新聞呀，我覺得佢地話搵到古墓好有趣呀，不如一齊去冒險啦！
 
想想都覺得低能。我彷彿看到堂哥聽完我的話，一言不發地用看白痴的眼神盯著我看了一陣，然後轉身就走的場面。還是打消這個念頭吧，什麼古墓，什麼風水格局，關我嘟事！想著想著，又莫名其妙地感到異常好奇，那兩座古墓奇怪地對我有一種極強的吸引力，我無論怎樣都無法將其逐出腦海。就是這樣，兩堂英文課我就在痛苦的心理掙扎中度過。
 
放學後出了校門，我從褲袋裡摸出電話，卻見whatsapp有一條堂哥發來的訊息。我趕忙打開一看，上頭只有四字：速至我家。
 




我正躊躇間，感到書包被人狠拍一記，回過頭來卻是列天欣。我怒目相向：「你搞乜呀！今日冇啦啦同Ms Tsoi講咁多野，而家又黎整我書包？」
 
「咁躁底既，你m到呀？」列天欣竊笑著，探頭看我電話：「你堂哥叫你去佢屋企做咩呀？」
 
「我鬼知咩，得果一句。」
 
「我跟埋去得唔得呀？」列天欣兩眼放光，一面狂熱。我沒好氣地說道：「No way，我都冇諗住去，鬼叫佢唔講清楚發生咩事。」
 
列天欣撅了撅嘴，忽而眼睛骨碌碌一轉，伸手搶過我電話跑開老遠。我慌忙抓住她書包，只見她手指飛快地在熒幕上移動，卻已經替我回了話：「我要同一個同學黎，佢唔黎，我都唔黎。」
 




「你做咩幫我回佢呀！」我奪回電話，正想跟堂哥說是朋友玩我電話，怎知對面先發了話：「好」。隔了十來秒，對方又說：「半個鐘頭內要到，快」。
 
「拿，咁我可以跟埋去啦！」列天欣湊在我肩頭附近盯著熒幕看，笑得十分燦爛：「收埋你堂哥咁耐，今次終於有機會見到佢，睇下有冇機會做個訪問黎準備今年神秘學學會既年報先。」
 
我見她死纏爛打，也拿她沒辦法，便道：「你跟黎就跟黎啦，講明先，唔好煩住我堂哥，佢未必會理你架。」
 
「得啦，佢叫我地快啲，就快啲出發啦！」
 
我和列天欣乘上了往堂哥家的火車。事實上，他家離我學校並不算遠，就在大水坑，乘馬鐵的話廿來分鐘就能到。他家是間三層高的村屋，以往我到他家玩，多數在地下那層，只有少數幾次上過一樓他的房間，至於二樓是怎樣的，我就無從得知了。
 
列天欣倒是興奮異常，她在火車上問長問短，努力從我口中挖出更多關於堂哥小時候的事。我才懶得理她，寧願做個「低頭族」，閱讀著網絡小說。她見我不肯理她，狠擰了我上臂一下，也跟著做個「低頭族」。
 
在大水坑下了火車。我和列天欣並肩而行，她把她隨身攜帶的筆記本抱在懷中，東張西望，雀躍非常。我指向遠處一棟村屋：「果個就係我堂哥屋企喇。」