經歷過九世輪迴生死般的我總算溝到女了，但係。。: 五 完美暑假。
做過所有試後活動，原來又來到了夏天，是暑假的開始。
今日係暑假既第十二日，講真呢個暑假真係好悶，日日都係係屋企打機，打完機就自己落街食飯，返上屋企再打過。就連打機都冇朋友同我打，單機打機呢種感覺我諗得毒撚先會明，有時我諗緊我究竟衰咩。。。我其實都有幾個朋友，不過佢地都掛住溝女冇同我打機。。就算係打機佢地都會同囡囡打，唔同我打，好似杯葛我咁。。。打開臉書。。全部都係閃光彈。。其實呢種孤獨感真係好強，起碼足以令我呢個死毒男葡萄先啦。好啦，咁我唔睇Facebook咪睇下IG，我仆你個街個個今日都去海洋公園。。。而我就獨自係召喚峽谷度過左一日。唉，咁就一日，暑假單機既感覺真係難受。就係呢個時候，我見到阿Yee同一個鬼仔既自拍，攬頭攬頸。。。
Caption:Knowing you is my pleasure.I will be loving you till the end <3
"阿Yee都有得拍拖..."我心想。。
唔知點解，一種心酸既感覺從我心底湧上黎。。係醋意。。。？點解我會呷醋。。。？唔通我不知不覺間中意左阿Yee。。？呢幾個問題我由沖涼諗到訓教都比唔到一個答案自己。仆街。原來我一直對咁cool既阿Yee有feel。。點解連我自己都察覺唔到？
暑假已經過左一半
除左打機，其實我一直想搵樣運動做下，順便減下肚腩。我換左一套籃球衫，帶住粒籃球(唔好問我點黎)，就落街射下波。我通常都係食完晚飯就落屋企樓下籃球場打波，貪佢冇人嘛，嘻。轉身射個三分波，唉屌，又唔入，我啲波真係屎。今晚十射一中，我罰自己唔入一球就做五下掌上壓，咁樣強制自己keep fit應該有用既。
球的趺盪伴着我的汗水而下，轉眼間，球衣已經濕透。
又是一個籃球的晚上，做掌上壓的次數代表我的球技愈來愈進步。我沾沾自喜地繼續練習，後面有把聲係到大叫，唔知係到嗌緊邊個呢。
＂喂，傻系！＂迷之聲。
我擰轉頭一睇，係一個黑炆炆短頭髮紮住All back 頭既女仔，我係到諗緊佢係邊個既時候，唔小心望到佢件波衫，寫住香城官立中學，我當堂就嚇左一跳，原來佢係我學校既女子籃球校校隊。
＂拿，波呢，就唔係咁打既，睇野啦柒頭。＂說罷她就投進了一球姿勢超正宗的三分球。
我係斜角望過去，原來都有波有路，點解要做Tom Boy喎，我在心底責問自己，如果似返個女仔我都會考慮下佢哈哈。
＂我係米姐，你以後就咁叫我啦，柒頭皮。拿，我就住開呢頭既。＂呢句柒頭皮簡直就好似一把刀吉入我個心一樣，因為我打波個樣真係好撚柒。
＂哦。。你叫我阿朗啦，你係咪讀香城中學？＂我帶點恐懼去問佢，因為佢真係好霸氣。
＂係阿，唔洗講咁多野，我宜家收你做兵，每晚九點半係到等。＂佢二話不說一刀直入最尾一個髮夾灣。
我唯有答應佢。
八月二三日。十點二十三分。
我以一個Cross over扭過米姐，再一個海底撈月，"咻"，上籃成功。
＂拍，拍，拍。。＂米姐拍手讚我，＂唔錯唔錯＂
＂米姐你小心教識徒弟冇師父啊，哈哈！＂我自滿地說。
＂我相信你一定仲有大把前途，加油啊，柒頭皮。＂
我背着濕透的球衣拍着籃球回家，晚晚如是。我問佢拎左電話號碼，以便問佢打波既一啲技巧(其實係想同佢增進感情)。
一日復一日，暑假快要完結了。
唔知中二既生活會點呢，會溝到女嗎？定係做返毒撚？希望我唔會患上中二病啦。