[七月玩命系列]《百鬼故的詛咒》: 第一章 百鬼故

傳說當有一班人圍成一個圓圈一齊講鬼故的話，講到第一百個鬼故嘅時候，就會有怪事發生。你，敢唔敢試？

一個寂靜的午夜，一班青年正於海邊圍成一個圓圈。

「鬼故大家應該聽唔少架啦，但有冇聽過當一班人圍埋一齊，講夠一百個鬼故嘅時候，會有怪事發生，甚至，可以接觸到靈界？」此番說話出自一個「mk」一詞彷彿為他而生的男性，阿生口中。提出講鬼故的建議，都不過因為想借同場女性因受驚的時候而可以籍機「抽水」。

「但，如果真係好似你所講咁，接觸到靈界，咁咪好危險？」帶著四方眼鏡，給人一副「毒」得無可救藥的感覺的人，阿恆提出疑問。

阿生即時反駁道：「淆底就走啦，冇人迫你玩架。」





同時，與阿生同行的兩個mk兄弟，阿南和阿傑附和著他：「係囉，唔聽就死開啦，阻住個地球轉。」貌似出於義氣而支持兄弟的二人，說穿了都不過因為害怕此話一出會破壞他們一心部署的「抽水」大計。

而與阿恆同行的阿強則於他耳邊提醒：「佢哋人多，唔好同佢哋嘈啦，何況，佢哋講到底咪又係用下體嚟諗嘢，邊會有恆心講夠一百個鬼故先得架。」

阿生眼見阿恆再沒有反駁之意便繼續道：「冇人反對冇人走架啦麻，咁就開始講架啦。既然我發起嘅，咁就由我開始先啦！」

「有睇過死亡筆記嘅應該都知，同死神交易可以得到死神之眼，從而透過對眼就可以得知對方嘅真名同壽命。但有冇諗過，人類可以同鬼進行交易？只要你進入任何一間樓層會出現四字尾嘅酒店，再住入04號房，係夜晚12點前準備兩支煙同火機入廁所。入去之後，鎖起道門，再點著一支煙，即使平時唔食煙嘅人都要扮到真正食緊煙咁，到咗12點，啲煙會係鏡面前凝聚，然後就會出現一個人影，呢個就係同你交易嘅鬼。」阿生一邊繼續故事，一邊微微觀察其他女性的反應，以確認他們的專注力依然落在自己身上。

「當個影成形嘅時候，就將自己自己帶入去嘅另一支煙交俾隻鬼，再點著佢，直至支煙完全燒完之前，可以向隻鬼問及所有有關未來嘅嘢，代價就係，當佢手上支煙燒完之際，佢就會將你對眼搶走。」





「吓？完啦？你知唔知咩叫鬼故架？」參加了訓練營的其中一個女生，mary毫不客氣地質疑阿生。mary雖非擁有令人讚嘆不絕的美貌，但爽朗的性格加上豐滿的上圍，則深深吸引著阿強。

「你咁叻，咁第二個你嚟講囉。」阿生不服氣地答道。

mary爽快地答道：「好呀，你唔好驚到賴尿先好呀！」

「呢件事，就發生係大概一年前，石硤尾嘅其中一條村。作為一個舊區，石硤尾嘅公屋最高亦只有12層，即使跳樓自殺都未必可以成功死去。當時其中一座得8層嘅公屋嘅天台，有一個女仔跳樓，好巧合地，佢落地嘅一刻，就係正一個返緊學嘅女學生面前。但受到咁大驚嚇嘅女學生只係請咗一日假，但就係呢日之後，呢個女學生嘅動靜，愈嚟愈似當日跳樓嘅女仔，甚至有人話，佢連腦嘅記憶都係嗰個本來已經死咗嘅女仔。結果一個月後，呢個女學生係同一個地點，同一時間跳咗落樓。呢件事之後，嗰個死亡地點都成為街坊嘅禁地，所有人都怕踏入呢個曾經染滿鮮血嘅地下，會步佢哋嘅後塵。」

當mary將故事說完，在場的人無不感到一股寒意從背後湧到全身，甚至隔了一陣子才能回過神來。





「第三個不如等我嚟啦。」當阿恆聽完mary令人如此心寒的故事後，體內的靈異激素份外活躍，巴不得將自己所聽過，最恐怖的鬼故與大家分享。

「就係地鐵啱啱通車後幾年，某一日嘅下晝6點半，一個正值最繁忙嘅放工時段，油麻地地鐵站嘅月台上，突然有一個女學生係眾多人嘅眼皮底下跳咗落路軌……」

突然，阿生打斷阿恆的話：「車，聽過啦，悶唔悶啲呀你，俾啲新意啦！」顯然，阿生仍對阿恆差點破壞其好事一事壞恨在心，隨時等待著阿恆出錯好讓自己乘機報復。

但另一名同營的女生，阿昕突然說：「er…我未聽過，可唔可以繼續？」阿昕可算是同營中最秀色可餐的女生，標緻的五官，及腰的長髮修長的雙腿。她也是那mk三人組共同的，最優先的目標，此時她無心的一言，令阿生對阿恆更恨之入骨。

眼見那mk三人組的聲線沒落，阿恆就繼續他的故事：「當時咁啱有架列車駛入月台，收唔切制，就咁撞咗落個女學生到，將佢卷入車底。幾分鐘後，消防同警察趕到，將列車吊起搜索屍體，結果，一無所獲，甚至連一滴血跡都冇。」

阿恆有意無意地說：「聽過呢個鬼故嘅人應該只係聽到呢到就完係咪？但呢個鬼故真正恐怖之處，係後面。當時消防人員同警察都一致認為全部目擊者係同時產生幻覺，不過後來係地鐵嘅閉路電視所錄低嘅影象，確確實實係影到跳軌一幕。」

說到這裡，連阿恆都開始感到一絲寒意，但最恐怖的卻是阿恆以下的話：「當日被影到跳軌嘅女學生，係確有其人，而且，佢當時親眼見到自己軌嘅一幕，嚇到即刻跑返屋企，將呢件事講咗俾屋企人同最好嘅朋友知，但佢哋嘅反應都係認為呢個女仔有幻覺，冇加以理會，但就係呢件事之後一個星期，呢個女仔被發現死係屋企張床到，死因不明。」

慢慢，眾人開始投入這個靈異遊戲，鬼故愈說愈有，終於到第九十八個鬼故……