《一位明星，在自己的「生前喪禮」上死了》: Chapter 9
Chapter 9
「咁即係 Vincy 你而家算係正式宣告，你既立場係：支持安樂死合法化？」
「我喺支持『病人自願既主動安樂死』，但『病人非自願既主動安樂死』我係反對既。
我認為有絕症既病人，係應該有權選擇，一個有尊嚴又唔痛苦既方式離去。
當一個病人，已經無辦法可以再醫得好，醫生能夠做既，只係不斷咁「拖延死亡」，不斷延長疾病所帶來既痛苦。咁既情況之下，其實真係『生不如死』。
與其咁殘忍令病人無意義咁受痛苦，不如基於人道立場，俾佢一個可以舒服而有尊嚴咁死既選擇。
如果因為法律唔容許既原因，係都要迫病人接受無了期既痛苦，我覺得係非常之迂腐、殘忍同不人道。
注意，『安樂死合法化』，唔係話規定所有絕症病人都一定要安樂死。
呢個係好多反對『安樂死合法化』既人經常講既邏輯謬論，特別係宗教人仕。佢地認為一旦安樂死合法化，醫生就會醫都唔醫，強制殺死晒所有絕症病人。呢個諗法簡直錯到離晒譜。
『安樂死合法化』只係俾絕症病人有一個選擇，重點係病人自己自願。如果佢地自願想咁做，可以選擇合法咁申請進行安樂死。如果病人選擇戰鬥到底，無人可以迫佢安樂死架喎。
好多病人其實係唔怕死，只係怕死得痛苦，同埋怕困喺醫院病床上漫無目的咁『等死』，等自己有一日終於因為唔知咩急病，醫生搶教失敗，先可以名正言順咁解脫。
頭先講過，『被動式安樂死』現時係合法架，而『主動式安樂死』係唔合法。
但係大家諗深一層，以病人既角度去諗，邊一種結束生命既方式比較痛苦？
『被動式安樂死』，病人死前仲可能要掙扎受苦一輪先死得去；而『主動式安樂死』，病人係可以喺家人朋友陪同之下，好好咁道別之後，自行服藥，死得好安詳，好有尊嚴，而且一啲痛苦都無。如果係咁，站在人道立場，『主動式安樂死』係咪比『被動式安樂死』更為人道？
最近睇過一本書，叫《死在香港》。書入面提到，原來我地中國傳統祝福語「五福臨門」，入面所指既第五福，就係『善終』，即係『死得好』。中國古代傳統都認為，能夠安詳無痛苦咁離世，其實係一種福氣黎架。
因為以上原因，我支持『安樂死合法化』。
但係，我認為一定要有嚴格既審批，例如醫管局可能設立一個『安樂死審批委員會』，由專業醫生、心理學家同社工等組成，嚴格審核每一個申請安樂死個案既實際情況，同時要考慮病人同家屬既狀況同意見。我亦認為病人需要相隔一段日子，至少兩次清醒地明確地提出安樂死要求，以防止決定只係一時衝動。最後，申請經委員會審議後，決定批唔批准進行安樂死。」
＊＊＊
「咁 Vincy 你本人會唔會選擇安樂死呢？」
Erica 戰戰兢兢的問這個問題，因為她知道，答案有可能對社會造成極深遠的影響。Vincy 這個患有絕症的名人，會否成為香港第一個公開宣佈自己會考慮安樂死的名人呢？
「呢個問題，我相信好多人，無論係出於關心我，定係純粹八卦心態，都好想知我會唔會選擇安樂死。
我有ALS 。喺外國， ALS 係其中一種最多人選擇『安樂死』既疾病。因為呢個病既徵狀，符合多數國家合法容許安樂死既情況：
一，醫學上，ALS 暫時未有能夠根治既方法，所以並無治癒既希望；
二，ALS 病人既生活質素，只會隨住病情加深而日益惡化，而唔會逆轉變番好。醫生能夠做到既，就只有減慢惡化既速度；
三，ALS 病人既神志係完全清醒，思考能力唔會受疾病影響，所以能夠喺神志清醒既情況下自己作出終止生命的決定。
而咁多有 ALS 病人選擇安樂死，係因為：
佢地根本無能力自殺。
ALS 病人手手腳腳都郁唔到，根本唔能夠自殺。ALS 病人如果想結束生命，係需要其他人幫手先能夠做到。
至於我本人會唔會選擇安樂死，我有兩個主要既顧慮：
第一，我係一個知名人仕，我既行為，可能會影響到好多人既生命。例如，可能有一位有絕症既病人，係因為我選擇同病魔戰鬥到底，所以都一樣頑強地生存落去。如果我選擇安樂死，呢個病人會點算呢？我要衡量下如果我進行安樂死，對社會大眾既影響會係點樣；
第二，我媽媽係一名虔誠既基督徒。如果我選擇安樂死，佢一定會極力反對，而且會好傷心。我除咗考慮自己既感受之外，亦都要考慮我媽媽既感受。
我會喺聽日個生前喪禮上，當住全世界人面前，清清楚楚咁宣佈我既決定。」
＊＊＊
「好喇，問番啲輕鬆啲既話題喇。請問你而家同 Rosemary 既關係點呢？」
「我地呀...... 哈哈...... 都算係幾好啦。佢為咗我個病，半年前專登搬黎住喺我同一棟大廈，佢經常黎我屋企幫手照顧我，等我媽媽唔駛一個人咁辛苦。同埋我地價值觀都幾接近既，佢有幫手做一啲我一路做緊既慈善工作，兩個人一齊為慈善出力，都將開心架，哈哈。」
正當 Vincy 答得甜蜜的同時，Erica 留意到，一路坐在旁邊微笑著的陳校長，聽到 Vincy 的回答後，雖然不是十分明顯，但面色的確是突然一沉。
「最後一個問題，你有無咩想同班歌迷講？」
「聽日，記得記得，一定要睇我既生前喪禮，如果可以既話就黎碼頭同成班歌迷一齊睇直播啦，黎唔到都記得睇電視或者網上直播。
喺生前喪禮臨結尾時，我會有一段說話，對每一個歌迷講，所以記得睇喇！」
＊＊＊＊＊