《一位明星，在自己的「生前喪禮」上死了》: Chapter 8
Chapter 8
(Vincy 訪問繼續)
「點解你會想搞一個自己既生前喪禮呢？」Erica 問。
Vincy 很凝重，很認真的沉思了一會。
「『生前喪禮』呢個構思，其實我細細個既時候已經覺得好正。中學時代英文堂要睇一本書《Tuesday with Morrie》，中文叫《最後十四堂星期二的課》，入面作者個教授，正正又係患有 ALS 漸凍人症。呢本書教咗我好多關於生命既睇法。而我第一次接觸『生前喪禮』呢個概念，就係呢本書入面個教授為自己舉辦既「living funeral」。
個教授話：喺喪禮時，死者既親戚朋友會講出對死者既感受同懷念，但係死者已死，佢根本就聽唔到呢啲說話。咁點解唔喺死者死之前，搞一個『生前喪禮』，趁死者仲在生時，就講俾佢聽呢？
後來，香港有公眾人物搞過『生前喪禮』，例如黃夏蕙夏蕙姨，同一位患有皮膚癌既專欄作家陳偉霖，但可惜傳媒好似無太多關注。
橫掂我又唔擺得幾耐，所以我諗：等我又黎搞番個先！
死，有輕於鴻毛，有重於泰山。
我會死，我有 ALS ，醫生話我而家大概淨低半年至一年命。
作為一個薄有名氣既歌手，我相信：
我既死，對我既歌迷黎講，一定會造成好大既心理衝擊。
咁我諗：
既然係衝擊，點解唔諗方法，令呢個衝擊變成一個正面既影響？
利用我既死亡，去教育我既歌迷：
『人，係會死架。
既然人會死，我地就更加應該好好咁生活，好好咁活好自己只得一次既生命。』
《最後十四堂星期二的課》入面有一句：「Everyone knows they will die, but no one believes it. (每個人都知道自己會死，但沒有人把它當一回事。)」
我希望我自己既『生前喪禮』，會係一次大型既死亡教育，亦係一次生命教育。」
Vincy 停了下來，再度沉思了十多秒。
「咁當然，搞『生前喪禮』仲有一個比較個人既原因。
或者可以話我係自戀。
我好想知道，當我死咗之後，世人會點睇我，點樣評價我既一生。
我好想知道，當我死咗之後，第二日報紙會點樣寫我既生平呢？
電視拍『永遠懷念 Vincy 特輯』時，會講啲咩呢？
我既歌迷，會點樣紀念我，佢地既生命，有無因為我既存在而改變過呢？
佢地爸爸媽媽，會話啲仔女做咗我粉絲之後，係努力上進生性咗呀，定係變咗個壞人周圍殺人放火呢？
以上一切，我都想喺真係死之前，可以親眼睇到。」
「咁生前喪禮之後，Vincy 你仲會唔會有無咩計劃？」
「主力都係養病囉。我係有計劃既，但都係一啲私人既計劃，例如身後事既安排呀，財產既分配呀，我本自傳既出版呀，呢啲我唔會公開做架喇。
我好希望生前喪禮過咗之後，大家真係當我死咗一樣。
我唔會再出現喺公眾面前架喇，死咗仲出黎行黎行去，想嚇死人咩？」
＊＊＊
「好喇，跟住一個比較嚴肅同敏感既問題：Vincy，你個人對『安樂死』有咩睇法？你贊唔贊成『安樂死』應該合法化呢？」
「我真係認真花時間研究過『安樂死』問題，不過我只係一個歌手，唔係法律專家，有錯請觀眾隨便更正。
首先要定義咩叫『安樂死』先。坊間好多關於『安樂死』既討論，其實都係因為對『安樂死』既定義太過含糊，所以先會造成好多溝通上既誤會。而我覺得社會上應該諗方法避免呢類誤會。
所謂既『安樂死』，有兩種分法：
自願與非自願；被動與主動；
自願與非自願既分別好明顯，就係『病人係咪自願』進行；
被動與主動，係指進行『安樂死』既方式，係『主動地用人為方法，例如注射，無痛地結束病人生命』，還是『被動地除去用黎維持病人生命既機器同藥物』。
呢兩種分法，結合一齊可以產生四種型式既『安樂死』：
1) 自願，被動 ；
2) 自願，主動；
3) 非自願，被動；
4) 非自願，主動。
『被動』既『安樂死』，其實而家醫院好多時都已經發生緊，而且其實係合法既。《香港註冊醫生專業守則》入面寫明，『停止給垂死病人提供依靠機械的維持生命程序或撤去有關程序，並非安樂死』。
當醫生以專業判斷認為對病人進行進一步治療都已經唔會有效，可以根據病人既根本利益、病人及病人家屬既意願，停止或撤去維持生命既治療。呢個做法係合法既。
醫生做決定時，會尊重病人既意願。如果病人已經好明確表示想停止用呼吸機，甚至清醒時簽咗張「預設醫療指示」，表明自己意願，講明當自己患末期病症、昏迷或陷入植物人狀態時，醫護人員唔好為他們插喉或者輸血搶救，咁醫生係應該尊重呢個意願。而如果病人無指示，但神智已經唔清醒，醫生就會睇病人家人既意願。
所以，『被動』既『安樂死』，並不須要『合法化』，因為本身已經係合法同埋有充足指引。
好喇，咁即係只有『主動』既『安樂死』，先至需要被『合法化』喇。
『主動安樂死』，即係由醫生處方一啲致命既藥物令病人無痛地死去。
但唔駛講，如果病人係『非自願』既，就即係『謀殺』喇，咁就唔係叫『安樂死』喇。
所以，講咗咁多，可以用一句總結：
而家社會需要討論需唔需要合法化既，只有一種安樂死，就係『病人自願而且主動的安樂死』。
而對於『病人自願而且主動的安樂死』，我陳詠詩既個人睇法係：
我支持安樂死合法化，
我支持病人有權利申請合法安樂死，
但係，申請完政府要有嚴格既審批過程，要有法例嚴格規管，避免病人濫用安樂死。
我，陳詠詩，支持立法會盡快認真討論安樂死議題。」
(待續)