《青梅竹馬的婚禮》: 第九節

四眼新郎哥一見到新娘之後，就立即喺度唱：「愛你一萬年……愛你一萬年……」即使走音錯Key，但一眾兄弟仍然大叫：「唱得好！唱得好！」
 
「果然係好兄弟！」我心裡暗讚。
 
新娘坐喺床度，婚紗尾端露出一雙腳，新郎立即跪低幫新娘著起高踭鞋，起晒格嘅影像當中，我隱約見到新娘流露出幸福嘅表情。
 
「係呢賢姨，阿欣同佢老公拍咗幾耐拖？」我問。
 
「都有六年啦，高中三年，出嚟做嘢三年。」賢姨邊數手指邊回答。
 




賢姨話音剛落，新郎哥又唱：「今天你要嫁給我啦……今天你要嫁給我啦……」跟住兄弟們又擊起一陣此起彼落嘅掌聲。
 
老實講，如果佢知道我係邊個，佢一定唔夠膽喺我面前唱歌。
 
不過見到新郎哥如此直率戇居，我覺得佢應該可以俾到幸福阿欣。
 
新郎哥開完演唱會之後，就帶咗新娘落二樓拜堂，望住一對新人著住西式婚禮服，但又一拜天地二拜高堂咁，的確有啲違和感，不過依家並唔係研究「中西文化共融的利弊」嘅時候。
 
「係呢，賢姨，男家屋企係做咩㗎？」今日嘅我，總係問題多多，好似仲緊張過賢叔賢姨咁。
 




「佢屋企做生意㗎，有幾層樓同幾架車。」從賢姨眼神之中唔難睇得出，佢對呢個女婿幾滿意。
 
拜完堂、灑完米之後，新郎同新娘就上咗果部棗紅色四人車，鏡頭影到新娘眼框已經紅晒，我唔係女人，唔知道離開娘家嘅時候係咩心情，但我清楚知道，新娘嘅眼淚當中，夾雜住喜悅同不捨。
 
鏡頭一轉，新郎同新娘已經抵達咗酒樓，驟眼一睇，席間都擺咗十幾圍酒，新郎喺台上面謝過來賓、謝過父母、謝過新娘之後，將支咪遞咗俾新娘，但新娘已經喊到講唔到嘢。
 
如果我可以出席呢場婚宴，至少仲有機會衝上台唱《阿牛》，但現實係你我分隔兩地，我連你嘅喜帖都收唔到。

之後，一對新人循例宣誓、交換戒子、接吻、拋花球、下台敬酒……呢啲場面我已經見識過不下十次，但心緒如此複雜嘅，可以話係第一次。