《青梅竹馬的婚禮》: 第八節

行吓行吓，我同阿欣行到屋企樓下，我鼓起勇氣問佢：「係呢，阿欣依家有冇拍拖？」
 
「嗯？」
 
唔知道係佢真係聽唔到，定係唔想答我，佢有意無意咁迴避咗我嘅問題，不過我都冇再追問落去，因為知同唔知，我都冇可能會同佢一齊，以前嘅承諾，其實只不過係細路仔之間嘅一個玩笑。結果，我對依家嘅佢依然係一無所知。
 
縱然係咁，我並冇太過失落，因為可以見返佢已經係對我最大嘅賞賜，加上時間已經將回憶沖得太淡，到咗呢個年紀，人係應該明白到兒時嘅承諾係比白紙更加輕薄。有啲人可能永遠都唔會同你一齊，甚至連陌路人都不如，不過佢哋永遠會喺你嘅心中佔有一個位置，唔去諗果陣你唔會記起，但又永遠唔會忘記。
 
回憶過後，新郎哥已經帶住一班兄弟衝咗上三樓，鏡頭影住一間房，門外掛滿紅色嘅裝飾，字幕寫住：「新郎哥過五關斬六將……」
 




冇記錯嘅話，果間應該係我嘅睡房，以前喺大陸嘅每一個朝早，阿欣都會坐喺床頭叫醒我，時間一轉，阿欣已經廿一二歲，呢一刻喺間房入面果個，已經係著住緍紗、準備嫁人嘅阿欣，而新郎哥，好明顯唔係坐緊喺屋企嘅我。
 
「阿欣就快出嚟嘞！」賢姨同我講。
 
「喺大陸做新郎真係輕鬆，啲姐妹真係仁慈。」我望住賢姨，繼續講埋落去：「喺香港啲新郎可能要扮埋狗先有得入房。」
 
「唔係掛？」
 
「係呀！」
 




講吓講吓，新郎哥就爆開咗道門，鏡頭只係影到一個衣櫃，而衣櫃後面露出咗一襲白色婚紗嘅裙腳。
 
鏡頭慢慢移近，我終於喺低清嘅影像入面見到坐喺床上面嘅新娘，我屏住呼吸，驚覺阿欣面上一抹艷麗嘅妝容，竟然如此陌生，一頭啱啱為新婚而染嘅橙紅髮，輕輕紥起藏喺頭紗入面。
 
唔知係因為我從來未見過阿欣化妝個樣，定係新婚嘅佢真係太靚，我竟然一時之間講唔出讚美嘅說話。