呃Like 呃出人鬼戀(完): 第三十五晚：唔駛打都輸咗半？最後戰線！
界刀刀鋒慢慢咁插入手指頭，我見到有一小點嘅血珠流咗出嚟。
要故意整傷自己難免會有啲手震嘅，不過點都唔會震到好似天崩地裂咁誇張呀。
依家，成個布幕都喺到震動，連地下都好似一下一下心跳咁傳嚟脈動。
我收起界刀，向布幕外探頭一睇。
「哦！原來拍緊戲啫，唔怪得咁鬼嘈啦。」我縮番個頭入布幕。
等等？拍緊咩戲呀？依到喺東寶嘅地頭喎。
我再次向布幕外一睇。
「啊！唔喺玩到咁大呀？」我扯盡喉嚨，聲嘶力竭尖叫。
布幕之外，依刻已經唔喺後堂啦！竟然變成咗一個一望無際嘅沙漠。不單止咁，我仲見到有個石「巨人」，手執一支巨石柱由遠處一步步咁走埋嚟。而跟住巨人腳邊，仲有一個人。
我咪埋隻眼細心咁望，好似喺個女人，著住件鬆身嘅長袍，頭髮飛散，感覺有啲似思源，不過睇起上嚟就老好多。
似思源？佢就喺思源嘅師父？佢唔喺應該由思源對付咩？而依到突然變咗另一個世界，唔通又喺咩咒術？
「師太，我喺點都唔會將小雅個魂交番俾好，不如妳就當做好心，放過佢啦。」我拉大聲浪向住仍然不斷接近嘅師太大叫。
「我已經唔需要個魂。」師太回答。
正當我以為，師太可能俾思源勸服咗......點知......
「我辛辛苦苦計劃咗十二年，你地班人一個唔該，將佢徹底破壞哂。我已經唔需要個魂，我要你地所有人條命！老君敕令土神借法，石巨人同我殺哂佢地！」師太怒目橫盯，一手指向我，然後，石巨人就舉起石柱，開始奔向我依邊。
嘩？有冇咁屈機！點打呀，又唔喺旺達與巨像。
但喺小雅肉身就喺我後面，我已經唔可以再返入去布幕，無辧法，用我最擅長嘅「走啦」。
我向左手邊一轉，跑向完全無哂方向感嘅沙漠；而巨人亦都好專一咁轉咗個彎跟住我。
「師太！點解妳要為咗啲大財團，搞到要害死小雅！點解喎？」雖然我喺一直跑，其實我喺圍住師太咁轉。
「東寶？哼！東寶算喺咩。佢只喺我腳底下一攤爛泥咋。細路你都唔駛扮到大義凜然，每個人都喺自私架！」師太完全無意移動，只喺一路望住我。
「喺！每個人都自私，不過至少我從來無做過咩傷天害理嘅事！由細至大，我無做功課，都唔會去抄人；考試唔識亦都唔會去出貓；就算喺陸運會俾人屈咗去跑長跑，我都喺靠自己，沖咗成晚凍水涼，請個真病假架！」依個師太喺咪傻架，佢唔喺幫東寶做嘢？咁佢又喺為咗咩。
「走？你以為可以走得甩咩？喺我嘅咒法範圍裡面，所有虛幻都會變成真實，我所有咒獸，敕令全部都擁有毁天滅地嘅能力！細路......去品嘗一下我嘅憤怒，我嘅怨恨，然後死得有幾慘得幾慘啦。」師太喺長袖裡面，又拎出兩張紫色嘅符咒，向天一撒！
天空又降下兩個巨大身影。
「老君敕令火神借法。炎神祝融降臨！」
「老君敕令風神借法。風神飛廉降臨！」
「嘩！師太唔駛咁落本呀，玩到出神仙。」我默默咁問，今次仲有冇奇蹟呀？
＊＊＊＊＊＊＊＊＊＊＊＊＊＊
思源盡力想向前行，但喺雙腳都被師太嘅喪門釘打傷，稍一移動就痛到跪番低。
「思源大師，不如我孭妳啦。」潮哥已經想咗好耐啦，咀角都流緊口水。
「嗯，辛苦你呀阿潮。」思源面紅紅，趴喺潮哥背脊。
當兩個人走到出大路，繼續轉入小路向後堂進發，就見村口方向有三個人走緊埋嚟。
老麥，小宜同媽媽。
「喂喂，咩咁啱呀。」老麥打咗個呵吹，同潮哥打招呼。
「你地嚟做咩呀？阻住哂。」潮哥一副臭臉，無端端走出三個電燈膽。
都喺小宜眼利，睇到思源竟然肯俾潮哥抱住，不禁對住思源送上祝福嘅微笑。
可惜，相聚休閒嘅時間實在太短；四周傳嚟腳步聲，埋伏喺村屋之間嘅東寶手下，因為聽到嘈雜聲，開始出動搜尋入侵者。
「唔好理啦，我地依家要趕去救阿澤。師父如果一怒之下，向阿澤佢地施展果個術，阿澤就死梗啦。」思源緊緊攬住潮哥。
「咁就快啲啦。思源依家喺到，用黑暗護送我地過去後堂囉。」老麥輕鬆咁話。
「......對唔住，我已經無哂法力。」思源伸出手，想再次使出黑暗，可惜真喺再用唔到啦。
老麥，小宜正想追問。
「哈哈......唔好意思，都喺我一時衝動，思源大師嘅......已經俾我破咗......哈哈。」潮哥諗番起頭先嘅舉動，都有啲唔好意思，搞到句說話講到一節節。
「吓！喺依到？」老麥，小宜你眼望我眼，心諗：「大人嘅世界，真喺隨便。」
＊＊＊＊＊＊＊＊＊＊＊＊＊＊
「嘩！真喺有神仙呀！」我不停咁跑，不停咁跑，不得不承認，經過依個暑假嘅「鍛鍊」，我逃走嘅速度同技巧都有一定嘅進步。
不過，我始終都喺人，圍住師太跑咗三個圈，我已經攰到想投降。可惜，如果投降有用嘅話，未打我都已經投咗啦。
當石巨人嘅大柱撼落地下時，淺起嘅沙石，迎面而嚟，我唯有用雙臂併命咁護住塊面，但喺鋒利嘅石塊仍然喺我隻手到界出無數條血痕。
「真架！所有嘅嘢都變成真！今次唔喺幻覺，可以嚇倒我啦。好未......」我喘哂氣。
眼前三個足足有兩層樓高嘅神像，以魚肉眾生鄙視眼神睥住我。
明明只不過喺師太手中嘅一張紙符，喺依個空間竟然能夠變到咁強大，虛幻變成真實......我只不過喺一個人，點同三個神打？
如果有幫手嘅話就好啦，但喺又有咩幫手可以擁有與神為敵嘅能力先？
我腦海中浮現無數嘅影像，一個個由細至大陪伴我成長嘅人物，如果佢地都可以同我並肩作戰你話幾好。
…...等等！
虛幻變成真實！
虛幻變成真實！虛幻變成真實！
虛幻變成真實！虛幻變成真實！虛幻變成真實！
「哈哈......哈哈......哈哈......哈哈......哈哈......哈哈......」我突然笑到人仰馬翻。
「哼，竟然嚇到失心瘋，真喺無用，不過，唔好以為咁就唔駛死呀。」師太餘怒未消。
我嘅笑聲不斷，究竟我喺咪癲咗，連我自己都唔喺好肯定，但喺當我再次拎起依附咗小雅靈魂嘅手機一睇，啱啱見到時間由兩點十四分，跳到入兩點十五分嘅時候，我就明白......
原來，世間一切都早有安排。