呃Like 呃出人鬼戀(完): 第二十六晚：思源終於返嚟啦！暫避風頭！

「死仔你隻手點呀？嘩！真喺爆哂喎。」老麥同小宜終於都醒番起我嘅存在，過嚟扶起我。

「阿澤......我......我唔知點解我會咁樣架，好對唔住。」小宜眼神清明，已經唔似頭先咁失常啦。

「我明架啦。最緊要大家都無事，小雅亦都無事就得。」我緊緊咁拎住部手機。

我本應想用 WhatApps問問小雅依家個情況，但喺，遠處忽然一陣風吹草動，嚇得一群麻雀飛走。

我地三個人同時向果個方向一望。





竟然發現有成差唔多十個著哂黑色西裝嘅大隻佬，快速咁衝緊埋嚟。

佢地班人咁造作，我點會唔認得，就喺醫院同後巷都遇過嘅人，東寶集團嘅手下。

「弊啦！俾佢地發現咗。點解我地會走到咁近道堂架？」小宜依家先留意到我地進入咗危險範圍。

就算同小宜解釋，喺佢帶我地入嚟有咩用。

我淨喺知道，又要再跑囉，我真喺好攰呀。





依家情況危急，根本無時間俾我處理傷口，血仲不停咁流，流到落去部手機到添。加上老麥同小宜又要放慢腳步就住我。

眼見後面班人已經越嚟越近，遲早會捉到我地。

我望住老麥，又望吓小宜，如果佢地拎住部手機走一定可以走得甩嘅。

不過，到頭來反而自己做埋人質有咩用！點解我四年前唔跟老麥去學拳啊？點解唔打少兩粒鐘機，做多啲運動！如果今次再有奇蹟出現，我發誓我以後都唔做宅男。

可能連個天都無眼睇，所以明明頭先仲陽光普照，依家眨眼之間，變得漆黑一遍。而且，仲唔喺普通嘅黑，喺黑到連光都可以吞噬嘅深淵黑暗。





人喺黑暗之中往往都會感覺到絕望，無助。但喺我依刻反而知道奇蹟真喺再次出現呀。

「思......」我興奮得想大叫。

「殊......收聲。」一把熟識嘅聲音喺虛無之中傳入我耳仔。

我感覺到四周維有好多人走過，仲隱隱約約聽到有啲爭拗聲「去咗邊？」「頭先仲見佢地三個人走過嚟喎。」「搜！快啲搜。」

我嚇得一身冷汗，果班西裝佬已經圍住喺我身邊，只喺我依家俾黑暗包圍，佢地完全見唔到。

過咗唔知幾耐，所有人聲都終於走遠哂。

我身處嘅黑暗亦開始片片散落，重見天日啦。

老麥同小宜原來一直都企喺我附近，而且我仲見到小宜緊緊咁拉住老麥唔放，互相凝望住對方。





唉......靚仔又好打，真喺著數咁多。

而我都無估錯，救我地嘅果然喺思源。

佢輕輕咁撥一撥長袖，慢慢咁行近我地......

然後右手快速咁縮入衫袖，寒光一閃，佢拎出一支長針筆直指向小宜嘅喉嚨。

思源動作雖快，但喺企喺小宜身邊嘅老麥都唔慢，佢反射性揮出虎拳亦都抵住思源嘅下巴。

「細路，好身手喎。」思源冷眼盯住老麥。

「姐姐，喺妳多手啫。」老麥只喺笑一笑。





「等等......兩位大俠，搞錯哂啦，都喺自己人嚟架。」我趕緊企喺佢地中間打圓場。

「無搞錯。依嗰女仔俾我師父落咗咒，所以......奇怪？點解......」思源露出一個迷惑嘅表情，最後都喺將長針收番埋。

老麥見思源收起武器，自己亦都收拳，不過佢都仲喺將小宜推埋自己身後面。

「破咗咒？嗰女仔嘅咒法俾人破咗嘅？你地邊個做架？」思源左右望住我地。

「鬼知咩！」我同老麥加埋攤開四隻手。

無論如何，跑到斷氣也好，隻手爆光也好，大家都總算平安全事。依家最重要喺先離開，搵個地方從長計議。

＊＊＊＊＊＊＊＊＊＊＊＊＊

當然啦，有老麥喺隊伍仲可以去得邊，所以佢提意，大家先搭東鐵落旺角，搵間地庫麥記坐低交代清楚成件事。





而且，老麥仲打咗個電話，話要搵多個幫得手嘅人嚟商量。

＊＊＊＊＊＊＊＊＊＊＊＊＊

落到麥記，老麥就唔客氣幫大家都買咗嗰加大餐，話要補充番啲體力先。不過思源就唔食得，佢喺食齋喎。

就喺思源靜靜地坐埋一邊等大家食嘢嘅時間，估唔到佢突然尖叫咗一聲，嚇到花容失色咁跌坐喺地下。佢指住對面塊玻璃上，貼住咗嗰人喺到，五觀扭曲，鼻孔漲大，仲噴氣噴到塊玻璃有兩個烘。

當然兩個女仔仲未知道依個變態佬有幾巴閉，對成件事有幾大幫助；但喺兩個男仔就明白......

「男人嘅自豪，唯我加藤潮！」

番外：
有人話，當你見到一個鐘意嘅人，就會見到佢發出一種耀眼嘅光芒。





潮哥，收到老麥嘅電話之後，就交低間舖俾啲伙記，自己行去地庫麥記。

佢今日唔知點解，個心跳得好快，預感有事會發生。

就喺佢行到落去麥記嘅時間，有一道萬丈光芒由玻璃後面射出嚟。

潮哥忍唔住，將塊面貼向玻璃，越貼越埋。終於佢遇到一生中唯一嘅太陽。