呃Like 呃出人鬼戀(完): 第十八晚：突發嘅螳螂捕蟬！黃雀在後？

我同小宜兩個都踎咗喺道，睇住四周圍啲猫仔慢慢食嘢。

「妳成日都嚟餵猫架？」我忍唔住問。

「一星期兩三次啦，有時間就會過嚟。不過，姐姐出咗事之後就少咗啦。」小宜眼神變得暗淡。

「其實呢，你知唔知小雅佢好擔心妳。佢成日見你手臂咁多傷痕，唔知你發生咩事架，點解唔同佢講喎？」趁依個時間，幫小雅問清楚先。

「有咩好解釋！點解你地個個都要我解釋依樣，解釋嗰樣啫！唔可以俾我做番自己咩。」小宜一下企起身，發脾氣要走啦。





「唔喺，唔喺， 我地都喺關心妳咋。」我亦都跟住佢後面。

「關心我？你又喺邊嗰呀？做咩要關心我？」小宜一個轉身面對住我，擺出一幅傲嬌神態。

「因為，我應承過你家姐，喺佢醒番之前，要睇住妳囉。」無錯，喺小雅返番去肉身之前，就由我代替佢好好睇住妳啦。

「啊！又喺應承過家姐？依家想點呀？究竟家姐佢叫咗幾多個人嚟睇住我先？」小宜好激動。越行越埋，而我都俾佢氣勢震攝，一步步退後。

「咩呀？喂喂喂，到我唔明喎，咩嘢好多人睇住妳？」我開始感覺到件事有啲唔妥。





「阿克囉！你唔喺阿克啲人咩？」小宜繼續怒睥住我，好似覺得我扮緊嘢。

「邊個阿克呀？我發誓呀，我完全唔知你講緊咩人。」阿克？令我蕪糊聯想起一個人。

「果晚出事之後，阿克就出現，仲話喺姐姐嘅朋友，嚟照顧我地。無錯，佢幫姐姐安排醫院，仲收得好平。不過，我唔鐘意依個人囉，幾時探病又要管，想問情況又話要檢查。最令我反感嘅......佢個眼神話我知，佢根本唔想姐姐好得番。」小宜雙手緊握，嬲到好似要打人。

「阿克？喺咪著到好潮，掛住哂啲銀鍊，隻手仲要有紋身果個潮童呀？」可以令人咁反應，我即刻諗起依個人。

「仲有邊呀喎，咪就喺佢囉。討厭死人。」小宜搖搖頭，好似想將依嗰阿克拋離記憶。





小宜一路蹬腳，一路走番過去執拾物品，而我就拎起電話想問小雅知唔知邊個喺阿克。

訊息都未打完，小雅就傳咗個訊息過嚟先。

「即開靈體偵測器。」訊息好簡短，我就知事態趕急。

二話不說，我開咗靈體偵測器，就見到有四個紅點，正慢慢咁向我依個中心點包圍過嚟。

包圍？唔通又喺醫院果啲人？又要嚟搶小雅？

「快走！」第二個更簡短嘅訊息。

唔諗得咁多，走為上計。

「小宜，點都好，求你信我一次，反正我唔夠妳打，妳就跟我走啦。」唔可以再拖啦，我衝埋去小宜身邊，就捉住佢隻手拉佢走。





「你做咩？」小宜俾我嚇咗一跳，正想出力掙扎。

「求下妳啦！有人追緊入嚟，佢地會對妳......對小雅都不利架。」我用兩隻手緊緊咁握住小宜。

唔知喺俾我嘅真誠打動，還是俾我發青哂嘅表情嚇親，小宜只是輕輕咁「哦」一聲。竟然俾我繼續拉住佢開始後巷逃亡。

靈體偵測器顯示前方兩個紅色正開始靠埋，所以唔可以走前邊條直路；後邊兩個紅色亦一左一右分開，睇嚟要一步步收窄範圍啦。

「小宜，依到你熟路，你睇下我地可以點走，先可以避開啲紅點。」我將手機遞俾小宜睇。

小宜仍然一臉茫然，未知發生咩事，不過見我咁認真，佢都細心咁思考。

「左手邊轉入去，果到仲有條小路，如果我地走得快可以避過包圍左手邊依個紅點架。」小宜點頭回答。





「好。我地跑啦。」我緊緊咁拉住小宜，穿梭喺水管同雜物亂放嘅後巷之中，雖然我無回頭望，但喺我地相連嘅手心之中都感覺到彼此嘅心跳得好快。

左手邊，穿過成功。

靈體偵測器顯示依家個紅點先過緊嚟。太好了。應該無俾佢發現。

我地兩個不停咁跑，轉埋依個彎就喺出口啦，出番大街就安全，至少可以逃走嘅路線多好多。

不過，避得開四個紅點，卻避唔開意外。意料之外......

前面個出口，竟然搭咗個竹棚，四五支粗大嘅竹桿將個出口幾乎封密，只餘番一個窄窄嘅位置，應該可以俾小宜行得過。

已經嚟唔切再返轉頭！

「小宜，妳要信我，妳一定要信我！拎住部手機，去搵妳家姐然後放喺佢手上面，千祈唔好俾人搶咗去。」我將手機放咗喺小宜隻手到，然後緊緊握住。





「究竟咩事？」小宜仲想追問，但喺無時間解釋，我將佢半推半拉，要佢喺個空位到離開。

後面已經傳嚟人聲。

「快啲走先！我會去妳屋企搵妳。小心呀。一定要好好保護部手機。」我再三強調，然後轉身張開雙手，邊個都唔可以喺到過去。

小宜一路前行，但喺仍然不斷回望。

「哎呀......」所以無睇清楚前面，撞喺一個人嘅身上。

「雪宜，點解你喺到嘅？」一個高大嘅人影正背向已亮起嘅街燈。

「阿克！你喺到就好啦，有好多人追緊我地。可唔可以幫下我朋友？」眼前依個人就喺阿克，果個佢非常之討厭嘅人，但喺依一刻遇到一個熟人，就好似大海中抱到一支浮木一樣，所以馬上向阿克求助。





「喺呀！有壞人追妳咩？」不過，阿克一眼都無睇過小宜，只喺慢慢咁伸手，拎起咗小宜手中部手機。