呃Like 呃出人鬼戀(完): 第十五晚：成為傳說嘅瞬間？請看番外！
我每行近一步，長髮女人呼吸就越急速。到最後我同佢只差十步左右。
「求你......拎開佢，唔好再行埋嚟。」長髮女人終於都頂唔住向我求饒。
雖然咁樣要脅一嗰女人實在好衰仔，不過無論如何我都要套到料。
「好！你唔想我再行埋嚟都得，不過你就要乖乖咁聽我話，我問你咩，你就要答咩。唔好出古惑，如果唔喺我叫小雅播啲四仔，果啲仲激呀。」我繼續扮演邪惡角色，不過己經停咗步，仲用手遮住咗嗰屏幕。
「啊......啊......好。」長髮女人肉隨砧板上，變得好聽話，羞怯嘅表情睇起嚟都幾靚添。
「小雅，麻煩你較細聲少少先。」我請小雅幫忙，啲呻吟聲實在令我太分神啦。
「哼！」小雅仲嬲緊，搞掂咗一嗰，之後仲有一嗰要氹。不過小雅佢都已經將音量收細。
「話我知你叫咩名？依家小雅肉身究竟喺放喺邊？仲有邊嗰指使妳嘅？講！」睇得警匪片多，我學哂佢啲語氣，俾嗰下馬威先。
「......我叫思源......之前都講咗我收錢做嘢，師父叫我做咩都要做。至於隻嘢嘅肉身放咗喺邊我真喺唔知，更加唔會知邊嗰喺老闆啦。」依嗰叫思源嘅女人，真喺非常驚同我有眼神接觸，望一望我，又即刻扭轉頭，唔似講大話，不過無理由就咁放過佢。
「敬酒唔飲飲罰酒！機會我俾咗你。」我故意拎開少少隻手，現出半嗰屏幕畫面，再行近兩三步。
「吖......唔好......我真喺就嚟唔得，你信我啦，我無呃你，我師父淨喺叫我今晚瞓喺果張病床到等，如果有野入房就收咗佢，其他嘅我唔知......快啲行開......」思源嬌喘連連，好似真喺就快到啦。
本來依嗰畫面可算喺男人至愛，不過我實在睇唔到落去。我拎開咗部手機，慢慢咁向出口離開。
「等......等......你就咁放過我？」估唔到思源竟然叫住咗我。
「有咩辦法啫，要我動手對你做啲咩，我又唔敢；而我喺絕對唔會俾小雅妳。總之，我希望妳唔好再嚟搵我地麻煩。」我回頭，見到佢開始平伏番啲，慢慢企喺身。
「小朋友！你真喺想救番嗰女仔？」思源講出咗一嗰我最想知嘅問題。
我急急跑番去佢面前，當然我好君子咁將屏幕緊緊握住。
「梗喺啦！唔通，你知點做？」我諗，我依家嘅表情比佢頭先仲興奮。
思源眼神睥咗一眼我部手機，然後重重咁嘆咗口氣，感覺好似完全放棄再搶。
「手機入邊隻嘢，一早已經過哂尾七，竟然無俾鬼差拉番地府或者煙消雲散，依嗰情況簡直聞所未聞，我相信喺因為佢臨離魂之際被攝咗入手機，所以先可以保持中陰身咁長時間。」思源不斷思考，不斷解說，好似佢都唔肯定。
「咁影相算唔算攝呀？」我好奇咁問。
「算，影相喺一嗰攝魂嘅好方法。」思源點點頭，覺得我講得有道理。
咁又令我諗番起手機入邊最後嘅自拍照，只喺影到一隻遮住咗鏡頭嘅手，隻手應該就喺小雅，而背景嗰男人果然就喺兇手。
「不過，咁嘅情況要令一嗰魂體準確返回自己肉身......太困難啦。除非......用血作引導。」思源好認真咁幫我諗辦法，我地嘅關係未免轉變得太快，但喺咁亦都證明咗佢對件事確實一無所知。
「又喺血......」潮哥果番話又喺腦入面浮現。
「詳情我都唔知點講。算喺答謝你，我嘗試喺師父口中問下。不過，都要睇下我有無命去搵你。」思源首次露出苦笑。
無命？唔喺搞到咁大鑊嗎？
「你都喺快啲走，老闆派嚟嘅手下應該就快搵到嚟。」思源向出口揚一揚手。
到最後完全咩線牽都套唔到。而今日都已經夠驚險，都喺返屋企休息吓，一定可以再諗到辦法。
我正要轉身。
「等等。」又俾思源叫住。
突然，思源扯住我件衫，好大力咁拉我埋去。
我眼見佢嘅面容越嚟越接近，好近，好近，唔通佢想臨走咀我一啖多謝我？唔得架，依嗰喺我嘅......
思源略帶濕潤嘅櫻桃小咀已經距離我嘅脣邊不足一吋。
依？無掂到？哦原來只喺想鍚面，都好喎俾女仔鍚面我都未試過，哈哈。
依？無掂到？思源將口移到我嘅耳仔邊，然後講咗一番說話。
「... … … ...」
「咩話？」我一時太震驚，竟然將佢推開。
「凡事難盡緣，針無兩頭利。我講嘅都喺事實。」思源又回復冷冷嘅語氣。
「咁？」果番話令我思想錯亂，一時都唔知自己想問咩。
「返去自己諗清楚，搏哂命值唔值得先，我會再搵你。」思源無再理我，由升降機返回醫院。
「凡事難盡緣......針無兩頭利」我只可以細味依兩句說話嘅意思。
番外：
時間仲喺那晚凌晨時份，港鐵未開，所以我只可以搭上一架由旺角開往油塘的紅VAN。
全車人都用睇怪獸嘅眼神望住我，任何可以用嚟辱罵人嘅嘢我都可以隱約聽到，令我不知所惜。
「小雅......」我細細聲咁講。
「咩事呀......」小雅有啲晦氣。
「小雅......可唔可以呢......熄咗條片佢，依家架車好多人呀。」由醫院走出嚟之後，小雅竟然一直播緊條片無停過。
「哼！唔得喎，唔喺你叫我播咩。」小雅擺出事不關己嘅態度。
我嗰頭垂得好低，盡低，眼角泛起淚光。
因為我清楚明白，到咗聽日，我就會成為傳說。
而高登巴打，絲打亦都無令我失望，各大搶眼標題打爆哂各個討論區。
原來做好人，真喺無好下場。