呃Like 呃出人鬼戀(完): 第十晚：一波未平一波又起！調查開始！

聽完小雅嘅事，我大概可以推敲出依家嘅情況。

一年前小雅俾嗰賊襲擊喪生，然後唔知點解佢嘅靈魂附咗入手機；聽佢講，原來部手機易手過好多次啦，但喺次次個機主都好快咁放番出去，梗喺啦！邊個頂得順「午夜兇鈴」，總之最後就俾我買咗返嚟。

我地兩個都靜咗好耐。

正常嘅，當親耳聽到死者同你講述番嗰被殺經過，我真喺唔知點回應好，唔通講節哀順變咩。

而小雅都無再講落去，可能佢覺得己經夠啦，人都死咗仲可以點喎。





最後，都喺我頂唔順先開口：「小......雅，好對唔住，妳唔好介意我咁問，其實你千方百計要聯絡我，咁妳想我幫你做啲咩？」

我聽到佢飲泣咗兩聲，然後吸了口氣話：「你唔好誤會，我絕對唔喺叫你幫我報仇或者搵個兇手，我只喺好想返一返屋企！我好掛住媽媽同妹妹，仲有......我想睇吓自己個墳。」

又喺喎，都成年前嘅事，小雅嘅身體一定己經落咗葬。

我諗番起好耐之前，曾經睇過啲靈異節目話，「果啲嘢」仍然留喺陽間一定喺有心願未了，如果小雅仲困喺手機嘅原因只喺想返屋企，咁簡單我無理由唔幫。

「我明白啦，咁就包喺我身上，等聽朝我就帶你返屋企見家人。」我爽快咁答應。





「多謝你......多謝你......多謝你......阿澤，我真喺唔知點報答你！你真喺好好......點解我地唔可以早啲遇到......鳴......」小雅喊得好大聲，我希望佢今次流嘅喺開心嘅眼淚。

「得架啦！雖然我地有緣無份，不過估唔到喺咁嘅情況下識到嗰女仔，又遇到咁嘅奇遇，都夠我一世回味。小雅，無論將來點都好，妳要幸福。」點解突然我可以講出啲咁肉麻嘅嘢， 其實我心知肚明，過咗今晚就再無機會。

「我......」小雅只喺不停咁喊。

「好啦！好啦！聽日我一定要早啲起身！所以依家要瞓啦，小雅早抖，我地聽日......再見啦。」一時衝口而出搞到氣氛咁尷尬，都唔等小雅講嘢我就即刻收線。

「聽日......再見......」我嗰心真喺好矛盾呀。





＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

又喺新一日嘅來臨，依家時間喺朝早八點。

除咗返學果時，我都未試過咁早起床。

我拎起放咗喺床邊嘅手機，用WhatApps傳咗訊息俾小雅，我記得佢話過「凌晨兩點十五分」以外時間佢都唔可以通話。

「早晨，小雅。」

「早晨呀，阿澤你好早呀。」

「梗喺，今日喺你嘅大日子。」

「多謝你。」





我覺得小雅仲對琴晚果番說話有啲唔好意思。我即刻轉嗰話題！

「喺啦。我諗過呢，如果我突然衝去你屋企，實嚇嚫妳家人，不如咁啦，你俾伯友個電話號碼我，我先打去同佢講聲我喺妳朋友。」原來我都幾有急才，咁快轉到嗰咁合理嘅話題。

「哎呀！我太過心急，竟然無諗到依點，阿澤你好叻。電話喺：XXXX XXXX。」訊息後面再加多一個伸脷可愛公仔。

「梗喺！哈哈.......妳等我一陣，我打俾伯友先。」然後我將手機切換去電話功能，好快咁輸入號碼。

一切都好順利。

不過，聽筒卻傳來一個錄音訊息：「你所打嘅電話號碼已經停止服務，請檢查之後再打嚟。」

奇怪？唔通打錯？我再核實多次小雅WhatApps內容，然後再一個個數字咁輸入，不過依然喺同樣嘅錄音......





奇怪？唔通小雅記錯？

「吓？停用？無可能架！」我話番俾小雅知嗰電話號碼錯誤之後，佢馬上回覆。

「你冷靜啲先，都過咗成年，會唔會妳記錯？又或者伯友想轉下號碼，換嗰心情啫。」我唯有咁安慰佢。

「阿澤......唔會架......媽媽喺點都唔會轉依個號碼。因為......個號碼頭四個字喺我生日日期，而後四個字咁啱又喺我妹妹嘅生日日期。我媽媽仲成日笑住話.......咁樣想扮唔記得我地兩姐妹生日都唔得啦。」

咁有紀念價值，又真喺無可能會轉喎。

「屋企一定發生咗咩事！點算好？我好驚......」接住喺一個痛哭嘅感情符號。

「唔好擔心住，你俾嗰地址我，我依家就衝去你屋企！放心，無事嘅。」雖然我嗰訊息喺咁寫，不過就喺有種不祥預感。

唉，依個唔喺簡單任務咩？點解又開始複雜起上嚟。