呃Like 呃出人鬼戀(完): 第三晚：平嘢真係有問題？依家點算！

返到屋企，我實在忍唔住繼續一張張咁番睇電話入邊相簿，嗰女仔越睇越靚，又清純，笑起嚟仲有個小酒窩；如果我將相改一改，然後放POST 上網，今次嘅Like 仲唔爆燈，而且，有可能嗰女仔見到自已嘅相俾人POST咗出嚟會主動搵我喎。

其實買機果晚我都覺得有問題，邊有可能有人放機放咁平先！一定係「老鼠貨」囉。話唔定，嗰女仔搵我，我仲可以上演一次英雄還機，之後仲抱得美人歸喎，嘩！依招煞食，就咁做啦。

我開番個改圖程式，揀咗一張相喺嗰女仔用左手㩒住額頭，然後向住鏡頭單眼微笑，真喺充滿青春氣息嘅自拍嚟改，我喺佢眼角加咗粒閃星，包包面果到加上三條粉紅色既可愛斜線，最後搞到成個背景都濛濛地，令到佢更加突出。

自已都有啲欣賞嗰製成品，廢話少講即刻POST 上網等人Like下先。

其實只係POST 咗唔夠一個鐘頭，竟然就呃咗成千個Like，我Facebook都只喺得五百幾個朋友，有幾多轉貼，有幾多朋友嘅朋友走入嚟睇真係計都計唔到，靚女果然幾時都有號召力。





依嗰時候，手機一震，有人打電話嚟。

我都唔駛睇來電，一接電話就話：「點呀！老麥啲相改成點先？」

「你個死仔，頭先仲扮憂鬱，返到屋企就咁好心情喺到改相，曬命得你。」老麥笑住咁講，好似放低哂頭先既內疚啦。

我都笑住答番：「唔喺，我無呃你，我真喺唔識嗰女仔架......好啦，好啦，講真話你知啦。」

「喺呢！肯認呢！搞出人命未先？」老麥好似等聽甜故咁，聲音異常興奮。





我爆完一輪粗，之後平靜番就話：「其實咁嘅，之前咪話我部舊機死左，咪飛去先達睇下有咩機換，點知部部貴到唔喺人買，谷住去買左部二機囉。」

「二手？嘩你都夠膽喎，你點知上手咩人用過？」老麥算係有錢仔，唔憂食，唔憂住，梗係覺得用二手唔好啦。

「鬼唔知咩，唔夠錢無計架，不過呀，估唔到今次又俾我執到部好嘢囉。老麥你估我買幾銀，估中請你食飯。」反正遲早會穿，自守好過被人督爆。

「要加大！再加甜品！」講到食，老麥己經進入狀態。

「估啦，我肯定你估唔中。」我冷笑挑釁。





「三千......唔喺......四千！四千！」

「錯哂！唔俾加甜品啦！」

「你條人渣......五千？咁不如買全新......唔喺平過三千呀？」

「就係，俾你估多最後一次。」

「二千九百九十九！果啲舖頭最鐘意定依種價。」無咗份甜品，老麥己經豁出去啦。

「錯埋！噓.....嗰餐無咗囉。」我笑到跳哂舞。

「唔玩啦，你買咗幾錢呀？有無咁平呀？」老麥突然收細咗把聲，開始有啲唔信。

我心諗如果老實話佢知部機竟然只係賣一千，怎至仲可以有價講，佢更加唔信啦，所以我就話：「只係賣二千咋！我都知，可能係老鼠貨，不過平機當前，你叫我點忍到手先。」





仲以為老麥又會爆粗大叫我有著數，點知佢靜左好耐，然後用有啲震嘅聲線話：「喂......如果係老鼠貨還好喎，最驚係唔知咩人嘅......遺物咋。」

氣溫好似突然低左幾度，我打左個好大嘅冷震。

遺物？死啦，點解我諗嚟諗去，竟然無諗到依嗰可能性。我真喺答唔上去，只喺呆左咁拎住嗰電話。

隔左一陣，通話另一邊嘅老麥可能見我咁耐唔出聲，好緊張咁不斷叫「喂......喂......喂喂喂？你講咩話？」

為左緩和番個氣氛，我扮哂笑咁答：「喺到呀，去左厠所啫。」

但係老麥好似聽唔到我把聲咁，依然不停咁：「喂......」

「喂......」





「喂咩呀，我咪喺到囉。」玩嘢呀。

「喂......」

「仲喂咩呀，仲咪到你搞事先。」我開始有啲怒氣，但係無諗到老麥之後竟然話......


「阿宅！你身邊條女咩人嚟架？講嘢鬼食泥咁，我聽唔清楚喎。其實你喺咪一直都係玩我呀？識到女仔怕咩認，唔駛作故仔喎。」我聽得出老麥真係發緊脾四，但係發生咩事先？咩身邊有嗰女仔？屋企得我一個人，何來女仔聲？

最後只係聽到老麥大叫一聲：「唔玩啦，你條X樣。」就收左線。

我呆左咁睇住已經收線既手機屏幕，都唔知有咩反應好，打番比老麥？未俾佢鬧夠咩！

我只係想平平地買部手機用，唔通平嘢一定無好？