<網上交友的第一次> 憑感覺愛上你: 第十四章：要人情不要錢

我面前嘅Kyle開始變得陌生，佢好少同我分享佢嘅事，點解一路以來我都無發覺到？普通一般情侶鍾意分享大家背後嘅事，即

使無共同話題，亦都可以由家人，童年回憶講起。我從來無深入了解Kyle屋企嘅事，除咗只係知道佢屋企係做生意之外。連

Kyle讀過咩幼稚園，小學，中學，我都唔知，我都無問，究竟係我問題嗎？因為我無問，所以Kyle以為我唔想知，所以佢無

講？不過我有主動同佢分享我嘅事，只係佢好似無乜興趣聽，永遠以一句『我愛你』終斷我嘅分享或者聽完隨即起新話題，好

似唔想知再詳細嘅事咁。奇怪，我地嘅關係好奇怪，或者Kyle依個人好奇怪，定還是係我奇怪？我好肯定Kyle仲係愛我，只係





我同佢之間慢慢生出一封牆。依封牆並唔係透明，但亦唔係實色，看似睇唔透，但亦唔係完全睇唔到對方。就似磨砂玻璃一

樣，看到，但好蒙；看清外形，但內心看不清。


準時放工係一件好事，代表我可以返屋企同家人同枱食飯，但我又唔想咁早返。家中父母嘅臉上永遠帶住歡笑，每次食飯嘅話

題永遠離唔開我同Kyle。

『Kyle對你好唔好呀？』




『你地會唔會結婚架？』
『今日又同Kyle去咗邊度玩呀？』
『我煲咗湯記住拎比Kyle飲呀』

心情低落嘅我真係無法對住佢地假笑，我亦唔想我嘅不樂令佢地擔心。雖然我唔係失戀，唔需要一個人飲悶酒，但係酒吧的確

係我唯一想去嘅地方。返到屋企擺低啲野，同屋企人話約咗friend，之後就落酒吧。自己一個坐係bar枱飲杯野，其實一啲都唔

苦悶，望住bartender以一手專業嘅手法整杯嘢飲，就好似睇小丑玩雜耍，或者睇魔術師變魔術一樣，係相當有趣嘅一件事。





時間一分一秒咁過，坐到10點鐘就諗住返屋企，我望一望個電話，原來Kyle call 過我，

whatsapp亦有5個message 


見到Kyle send比我嘅whatsapp，我即刻call返佢，不過今次輪到佢無聽，我唯有send返whatsapp覆佢



 當我諗住埋單嘅時候，一件只會喺電視劇發生嘅情節竟然發生喺我身上，咁大個女真係未試過咁瘀....

我攞起手袋，當我搵緊銀包嘅時候，我先醒起頭先返屋企擺低咗個銀包，散銀包入面嘅銀仔亦已經用淨3蚊。我不知所措，成

個人直情呆咗，我個腦突然出現一啲畫面，就係要幫手洗廁所嚟擒返筆錢。無辦法，電視劇情通常都係咁，要怪就怪自己睇戲

睇得多，搞到依家自己嚇自己。當我諗緊應該搵邊個嚟救我嘅時侯，突然有人行過嚟，之後放低啲錢喺個俾錢兜到。我擰轉右

邊，原來係Wilson。

『我幫你比啦，你好似唔記得帶銀包，係咪？我見你不停巢個袋咁』

『唔該，我遲啲還番比你』我冷冷淡淡咁講

『少少錢，唔駛喇，你欠我一個人情仲好過』

『我唔要欠你人情，總之我比返錢你就得啦』

『我有權唔幫你比架bor，你當然要欠我人情』Wilson狡猾笑住咁講

『咁你想點？』





『上次我見你好似嬲我當年突然無再聯絡你咁，你唔再嬲我就當你還咗依份人情』

『乜依啲叫人情咩？』

『總之你再見到我就唔可以咁嘅樣啦』

『我咩樣？』

『惡樣』

『邊有！』

『你睇你，嘟到個咀咁仲唔係嬲？』





『得啦得啦，當年嘅野都過咗去，唔嬲你囉，走啦，byebye』

當我擰轉身走嘅時候，我醒起我已經無錢搭車走，我死死氣地行返Wilson面前

『喂！我無錢搭車呀，可唔可以借10蚊嚟』

『欠我一個人情啊』佢遞咗張20蚊紙我

『乜你咁怪架，要人情唔要錢』我接下佢比我嘅20蚊

『錢易賺，人情唔易賺嘛』佢狡猾咁講

『得啦，欠你一個人情囉』

『咁夜使唔使我送你返屋企？』





『懶好心！唔駛喇，我識自己返屋企』

『haha你唔識返屋企就慘囉』

『無聊！我指我自己返屋企得啦，唔駛你依個衰人送！』

衰人，我記得以前我亦成日話佢係衰人，估唔到又令我記返起往事。唔知點解頭先所發生嘅事送走了我原先嘅不樂。Wilson依

個人真搞笑。諗返Wilson頭先講嘅野，佢嘅表情，令我不禁笑起上嚟。