<網上交友的第一次> 憑感覺愛上你: 第十章：為何是他 （1）

由細到大，都係屋企人同我過生日食蛋糕，啲friend最多都係出去飲杯野，食餐飯，當係陪我慶祝。直至識到Katy，Ada，

Jessica，我先真正知道邊啲先係真正嘅朋友，佢地對我嘅關懷，令我終於感受到朋友嘅重要性。知道我就嚟生日，佢地都願

意拋低男朋友而陪我依個唔係識咗好耐嘅朋友，果然我地真係好姊妹！











 難得有好姊妹同我慶祝生日，我當然要揀套靚衫去，何況落蘭桂坊係咪唔應該著得咁普通呢？露胸露腰免談，著條新買嘅洋裙

就最適合不過，裙嘅長度去到大髀中間，圓領無袖，深寶藍色做底配以淺色嘅印花，沿住條領縫條厘士邊帶有些少吊墜，猶如

一條頸鏈。去到地鐵站，Katy同Jessica都對我條裙讚不絕口。

我：『係呢，唔見Ada嘅？』





Katy：『個衰妹唔知做咩，琴晚返到屋企開始 fe li fei lei，又不斷咁嘔，今朝帶咗佢睇醫生，咁我咪叫佢留喺屋企抖下囉』

（話說Katy同Ada係一齊住）

Jessica：『佢一個人喺屋企得唔得架，會唔會突然暈咗無人知？』

Katy：『我打過比佢男朋友，叫佢嚟照顧Ada架啦』

我：『咁都好啲，又會無端端病成咁嘅』





Jessica：『佢不嬲身子弱架啦！』

星期日嘅夜晚，條街固然熱鬧多人，依條街果然吸引到唔少旅客，港女最鍾意嘅鬼仔亦多不勝數，睇慣鬼佬嘅我對佢地毫無感

覺，可惜。話說電視劇集上見得最多嘅醉酒佬，反而我見唔到，但係網上傳言嘅蘭桂坊靚仔靚女多的確係事實。Jessica所講

嘅bar，我地亦已經去到。星期日，啲位爆晒亦在所難免......

Katy：『不如去第二間啦，依到都爆晒』

Jessica：『度度都係咁架啦，睇多陣先』

Katy：『我同Kelly喺門口等你，你自己入去慢慢睇』

Jessica：『係你地驚多人咋話，睇咪睇！』





—————————————————————————————————

Katy：『你想唔想喺依度呀？唔想嘅可以去第二度睇下』

我：『唔緊要啦，如果有位咪坐囉，費事掃Jessica興啦，佢想喺依度嘛』

依個時候，Jessica喺遠處揮手叫我地入去

Jessica：『入面有張長枱，3個男仔，坐淨3個位，啱啱好table for six』一路講，一路繞住我隻手

我：『下，搭枱？』

Katy：『咪嚇Kelly啦，咩table for six啫』





Jessica：『無野架，行啦，當係識多個朋友囉』

行到去，果3個男仔望過嚟，其實我有啲驚，其中2個好熱情咁say Hi，另外一個話怕醜又唔係，只係無咁熱情。佢地都係啱啱

坐落無耐，Jessica最鐘意識仔，一開口就自我介紹，跟住問佢地叫咩名。

『我叫Kenneth，依張係我卡片』分別遞比我地3個

『我叫Martin，我地3個都係同一間公司到做』同樣分別遞比我地3個

『我係Wilson，不過我身上得一張卡片』

佢遞咗比Jessica，因為咁啱Jessica坐喺佢對面

Jessica：『公關助理 王偉廉，你地都喺廣告公司做？我地都係喎』





Martin：『係？你地邊間？』

當Jessica同佢地傾緊偈嘅時侯，我忽然諗起啲野，”公關助理 王偉廉”......總覺得好似邊度聽過咁，突然間果日喺地鐵站比人撞

到嘅情景出現喺腦海之中，久而久之諗起果個袋，一個我遺忘咗嘅袋。果刻，我即刻二話不說越過Katy嘅身，喺Jessica手中

搶走張卡片，我再望一望，果然係同一張卡，果時成枱人都比我嘅行為嚇親，我擘大隻眼望住Wilson…..

『你係咪跌咗袋野？』

依個時候Wilson好驚訝咁話『係呀！』

言談之中，Wilson話果袋野係準備比客，如果搵唔返佢要自己出錢買過個，Kenneth同Martin 都話佢好好彩，我都估唔到竟然

會比我撞返失物嘅主人。我同Wilson講，袋野我擺咗喺公司，之後我同佢約定聽日放lunch時間喺我公司樓下比返佢。件事擾

攘咗一陣，Katy講返其實嚟係要幫我慶祝生日，Jessica都差啲忘記，當然我都係。我地各自嗌咗杯野飲，點咗啲小食，仲買

咗個蛋糕一齊食。第一次嚟蘭桂坊，估唔到咁快就識到人，仲要同我慶祝生日，真係份外開心。Jessica同佢哋好好傾，Katy

間唔中都講埋一份，我同果個Wilson就最靜，比較少出聲。不過話時話，果刻真係唔知點解果個Wilson有啲面善，好似唔知邊

度見過咁，但係又諗唔出........快樂不知時日過，大家傾到11點幾就散band，果個Kenneth仲話有機會再約埋一齊。