<網上交友的第一次> 憑感覺愛上你: 第三章：能否兌現承諾？

那年嘅聖誕，我返咗香港。我踏出機場，已經感受到香港嘅生活氣息。我已經長大，我唔需要家人接我機。我會好享受自己一

個人搭飛機，一個人回家。攞下貼身袋，拎出香港身份證，然後行過E道。喺等待行李到達嘅果一刻，心情係相當興奮，因為

我終於回到屬於我嘅地方。行出閘口，即時見到好多人等候佢地嘅家人，愛人或者朋友，我都唔覺得自己好孤獨，因為我享受

『終於長大』果種感覺。當我以迷茫嘅心態搵緊巴士站出口嘅時候....

『Kelly！』





有人叫我？我左望右望，突然我見到有一個人正行緊過嚟，見到佢，我已經呆咗。佢對我微笑，但我笑唔出。一見到佢，我諗

起好多野，『冷淡』『無視』『已讀不回』，各種總總既回憶，令我情不自禁流咗一滴眼淚。

『Kelly….』

『Hi，點解你會係度嘅？』我強裝咁微笑

『我....接朋友機』





『係咩，咁你朋友呢？』

『佢....』佢望一望後面『um….』

『估唔到我地會係依度見面，咁我唔阻你啦，有機會再見』我再次強顏歡笑

『Kelly！』佢跑到我隔離，搶咗我嘅喼幫我攞住

『其實...我係黎接你機』





『下....』我承認當時我唔識比咩反應，亦唔知講咩好

我地喺無講任何野之下，去咗巴士站

『Wilson，我返大圍』

『我送你返屋企』

果刻我個心好亂，可以話係百感交集，我明明已經忘記咗佢，點解佢會突然出現返，重要係真人見面。我企係佢隔離，一副疑

惑嘅表情望住佢.....

『點解你要咁對我？』

『有車喇，上啦』





佢無視咗我嘅問題，喺車程上，我地一句話都無講過，而我一邊望住窗口，一邊諗緊好多好多野。

『到喇，落車啦』

佢幫我攞下行李，然後佢送到我屋企樓下。

『我到喇』

『咁好啦，我返屋企喇，byebye』佢隨即轉身走人

『Wilson！依家咁早，你應該未食早餐，我屋企人唔係屋企，不如你上嚟，我叫我工人姐姐煮啲嘢你食，當係我多謝你送我返屋企。』

『下...咁呀』





『唔好咁婆媽啦，跟我入嚟喇』



以上嘅野，你覺得會係真？唔好咁天真啦，一個男仔佢無端端唔睬你，你仲會覺得佢會喺你唔知嘅情況下比surprise你，仲會

送你返屋企？現實無可能發生，以上橋段若果出現喺劇集亦會比人鬧唔真實。以上嘅情節對話，係我之前仲同Wilson關係好嘅

時候幻想出黎嘅。

果年嘅聖誕，我的確返咗香港。的確自己踏出機場，自己返屋企。我只有3個星期嘅時間，同朋友行街睇戲食飯，真係好開

心。一班好耐無見嘅朋友，重逢嘅感覺係好奇妙，真係好難得大家都無忘記大家。時間淨返一星期，其實我周不時都會留意佢

嘅Facebook，高登嘅狀況。佢果年retake，終於考入到大學，佢聖誕應該會有好多活動，亦都會識到好多朋友，我諗...佢應該

忘記咗我地當初嘅承諾。試問我依啲微不足道嘅人，佢點會記住呢，何況我同佢係素未謀面嘅『朋友』。我，只不過係佢生命

中其中一個過客。喺佢失意嘅時候開解佢，同佢傾計，自問自己只係付出咗少少。佢即使真係忘記我，我都唔會怪佢。由此至

終，只有我睇得佢重，連我自己都唔知點解我會咁。當然，依個聖誕假期我無搵過佢。雖然佢曾經成日叫我做儍妹，但我傻唔

晒。既然佢唔搵我，我亦無必要搵佢。去海洋公園，請我食魚蛋，一齊去睇戲，一齊影相，帶我去見識蘭桂坊。


承諾，就在這個聖誕節消失。