<網上交友的第一次> 憑感覺愛上你: 第一章：網上交友
↵之前，我喺高登追緊一個故，『點解家姐要返屋企開房』。有一段時間，高登作家興起作『家姐』故，喺熱潮低下，我亦順勢潮流，
click咗入去睇。故事內容初頭無特別，屬於男女關係嘅愛情故，但係發展落去，有一part係講Girl Love，依個情節吸引我繼續睇落去。
故事內容唔多講，家姐返屋企同個女仔開房只係故入面嘅一小part，真正嘅主角，係樓主－ 發奮上腦。雖然文不對題，我對故事嘅發展
越來越有興趣，畢竟，我仍然相信依個故部分係真人真事。依個樓主初頭係幾盡責嘅，晚晚準時出post，即使忙，亦有拖無欠。到有一日，
佢喺post到話要暫停寫故，因為佢要為嚟緊嘅AL retake作準備，所以需要時間溫書。我地作為讀者當然感到失望，不過我地仍然係理性，
心知佢嘅處境，亦都為佢AL而打氣。而且，我地亦相信佢嘅承諾，喺故後會為大家繼續出文。
4月尾，剩下嘅應該只有English Speaking，唔少網民亦開始追文，但係樓主亦遲遲未出現。我比較好奇樓主嘅事，可能係受
佢嘅故影響掛，我決定click入佢嘅Profile睇，留意佢最近喺高登嘅足跡。跟住，我留意到一個post，係佢最近開嘅，『忽然好
想了結生命』。佢寫下一篇關於佢自己嘅事，大概都係離開中學後冇乜同朋友聯絡，被舊情所困等等....好快，有好多網民留言
開解佢，有啲仲話大家做個朋友。我，係其中一個。我寫下留言，『你寫埋個家姐故，我即刻做你朋友』，依個無心嘅留言，
造就咗大家成為朋友嘅橋樑。
2日後，我喺高登收到人地比我嘅PM，原來係 發奮上腦 ，佢同我分享佢嘅事，我亦回佢我嘅事，基於大家亦有相同嘅地方所
以容易產生共鳴，更何況，原來我同佢係同一屆AL考試生。初頭，佢以為我係巴打，就不斷話多謝巴打聽佢發噏風，經過2
次嘅說服，佢先相信我係女仔。佢當然驚訝啦，仲話原來高登真係有絲打，而又有女仔話同佢做朋友。
傾咗幾日，佢話高登限PM唔方便傾計，問我可唔可以用line傾。我個人認為，交朋友唔應該有戒心，所以我比佢我嘅user name，
叫佢add我。佢住喺香港，佢亦知我住喺英國，依段Distant friendship我覺得好有趣。基本上，我同佢係日日text message。大家嘅對話
由每日訓醒一句早晨/醒咗啦開始，結束於早唞/我要訓啦。毫無疑問，我地係假long d。對話內容亦帶出曖昧嘅感覺。
佢係金牛座嘅男仔，有時我覺得佢講嘢都幾sweet，唔知呢，可能係佢氹女無數掛。
同陌生人傾偈，我都係第一次。大家add咗對方，第一句以Nice to meet you！打招呼。唔覺意見到佢嘅profile相，雖然得半邊
面，不過睇落都唔差呀。之前我仲諗緊同緊我傾計嘅男仔會係點嘅樣，會唔會好毒架？定係書呆樣？依家總算揭曉。不過好快
佢就delete咗，好彩我早知佢有此計，我早就已save低佢幅相，免得唔記得佢係咩樣。講咗咁耐，我最在意嘅係佢個故嘅來龍
去脈。
同佢傾傾下，發覺佢係個幾有理想嘅人，依種人，我欣賞！
不過，無論一個人幾有鬥志，幾有目標都好，人總係有脆弱嘅時候，當心情差落，接近抑鬱嘅時候，難免會亂諗野。你有冇諗
過想跳樓？有無諗過啲人點解咁易想輕生？因為自我感覺蒙蔽了一切。點解有啲人會齋諗唔跳？因為自我意識大於感覺。當
然，從第三者角度黎睇，為情自殺係一件非常愚蠢嘅事，但係當事人嘅情緒所引致嘅自殺傾向，無人會理解得到。無經驗，零
了解，無體驗，零明白。不過你肯講，我一定聽！
我同佢可能係啱啱識，好多話題可以講，鍾意聽咩歌？想去邊度旅行？今晚食咩好呢？大家都非常之好傾。有套電影
『Her』，係講述人工智慧系統可以幫人類做不同類型嘅野，包括做朋友，大家傾下偈咁。只係，戲中嘅男主角選擇咗同人工
智慧系統做情侶，佢地嘅下場，當然唔可以長久，試問人類又點可以同電腦系統拍拖呢？我同Wilson嘅情況有少少相似，無
錯，佢個英文名叫Wilson。
https://www.youtube.com/watch?v=R2KZFq5mewQ
I love the way you stand by me
Through any kind of weather
It feels like nobody ever knew me until you knew me
'Cause I never thought I'd feel all the things you made me feel
Wasn't looking for someone, oh, until you
睇完歌詞，確實令我好感動，咁大個女真係未試過有人會憑歌寄意送首歌比我聽。從果一刻，我已經將Until You作為屬於我同
你嘅歌。每一次重聽返，我就會不經不覺間諗起你。有時仲會係到諗，會唔會總有一日能夠兌現chrous餘下嘅歌詞。不過，將
來係點，我唔能夠想像，亦都唔敢想像。我發覺我成日搵佢，真係驚佢覺得我煩。
曾幾何時，我喺Yahoo打佢個高登名 發奮上腦 ，我發現咗佢喺高登其中嘅一個post關於佢食煙嘅原因。原來，果時佢為咗能
夠接近佢當時嘅女神，佢不但每日陪女神去自修室溫書，為咗增進大家之間嘅關係，佢竟然學食煙。每次一休息嘅時候，佢就
會陪女神出去外面煲煙。講真，為女神而學習食煙，我都係第一次聽。作為討厭食煙或者吸入二手煙嘅我，我嘅另一半一定唔
可以有依種習慣。但係，如果你真係鍾意咗一個吸煙嘅人，咁點算呢？你有冇諗過，如果你鍾意嘅人為你而戒煙，係一件非常
感動嘅事？先唔好話係你鍾意嘅人，如果你身邊有人為你而戒煙，自己應該覺得好感動吧？你要知道戒煙並唔係一件容易嘅
事。
