[廣東話小說] 天工號 第一季: 3

3. 
上到南華會, 我地長期包左一間房打波, 一入去, 就見到孫運打緊波 
「喂! 叫杯野飲先啦」孫運一路講, 一路拉q好大力打向堆紅波度 
我叫左杯野飲, 就拎起支q棍, 孫運同我講: 「老規距, 邊個輸請食飯啦。」 

我地兩個就一路打, 打左幾round, 我忍唔住問佢: 「你又話有野搵我?」 
「唔急啦, 一陣食飯先講。」佢好似有d野咁, 唔知點解我有d緊張。 
「講啦快啲。」孫運走埋自己個袋度, 伸左隻手入去拎d野。 
見到咁, 我都放低d Q棍, 偷偷將隻右手伸左入袋入面。 





點知佢拎出黎既, 係一份文件, 封面係一隻狗形狀既標誌。 
我將右手拎番出黎, 問佢:「咩黎架?你冇幫球會做野喇咩?」 
孫運拎住份文件, 神秘咁講: 「生化科技。」 

我好奇怪, 生化科技關我咩事, 更加唔知關孫運咩事 
孫運行埋房門口, 將度門反鎖, 然後講: 「如果你問我, 我都唔係好識解釋, 總之係一種可以醫絕症既藥。」 
「醫絕症?」我忍唔住笑, 我開始覺得孫運痴左線: 「如果咁勁既藥. 點解要搵你?你諗住同我賣藥呀? 我似知婦孺?」 
「你唔好理你, 我需要一筆錢去搞, 你會唔會幫我?」 

我突然知道孫運點解會搵我, 應該話佢搵得我, 依筆錢一定唔小數目 




sorry, 我頭先話我做相機生意, 可惜\唔係普通相機 
我間公司, 其實一直係幫中共做軍事武器, 我做既, 係衛星相機 
係一種相機, 可以用衛星直接向地面發送微波, 再直接由最近地點既訊號接收, 再送番衛星電腦, 掃瞄做全息映像。 
有依種相機, 任何敵方軍情都會知道, 當然我知既都唔多, 技術層面既野我唔需要知道。 
我有時都會滿足自己求知慾, 例如有一次, 因為我想知, 所以發現左北韓入面, 原來一粒核彈都冇。 
好多人都以為, 咁高科技既技術, 一定需要好大間公司運作。 
但係永遠冇人諗到, 愈秘密既事,愈少人知愈好, 所以北京將依個工程俾左我依間得幾十個員工既公司做。 
我擁有依間公司既淨資產, 係200億, 依件事, 只有孫運一個人知道。 

「要幾多錢?」我直接問, 基本上一二千萬, 我都可以隨時俾到孫運。 




孫運苦笑左一下, 講:「對方唔係要錢, 佢地想要你抵押你間公司俾佢地。」 
我呆左一呆, 大叫: 「唔得, 冇可能!」 
孫運突然跪低: 「我知你一定唔肯, 但係求下你」 
「你知唔知, 就算你講十億, 我都可以俾你, 我根本唔當投資, 就當我真係俾你。但係要我間公司, 我真係玩唔起, 孫運你係唔係痴左線? 我知你份人貪心, 但係貪埋我間公司? 你傻左呀?」