《noA》: 8
『放我出去啊—』不斷播放，如果唔係聲線有尖有啞、有長有短，以為係錄音。
警檢企圖打擊我嘅心理防線，利用同樣、聲線，場景，我見到十幾年前嘅自己。
我慶幸十幾年之後，我見到嘅係老過當時嘅自己、蠢過當時嘅自己、同埋崩潰過當時嘅自己
，另一個醜陋嘅版本重蹈覆轍。
如果唔關我事，我一定心涼都極點，可惜我都係另一個被呆係病床上嘅嫌疑犯。
係咪想利用佢，以為我會混淆過去，現在，同埋無人可以預測嘅未來？
唔知係咩人係我身邊講：
「佢唔係真癲，你都唔係真傻，你甘心輸畀佢？
呢度唔係判十年，係判一世。
我哋想知嘅係事情嘅全貌，只要你無做過，講出嚟，對你好。」
本來對現實麻木嘅我，開始有啲反應，係咪仲有反應。
「一陣無錄影、錄音，你哋認真傾吓。
勸下佢，人哋無前科，贏梗。」
唔知佢同咩人講，但佢講嘅『前科』令到我再度消沉。
雖然對人失去基本信任，唔應該渴求有人理解，但一次又一次嘅接觸、試探，背叛，點解要咁樣去對我，可唔可以當我係人，都會對每一個路過我生命嘅人失望難過。
「你痛唔痛...
有咩我需要幫你準備？
唔好放棄...」
我一直空洞嘅眼神，終於有理由去望，會關心我嘅人。
佢捉住我失去溫度嘅手指，再幫我整理好衣領、頭髮。
我終於見到我識嘅人，程予原。
今次係咪無再企喺人哋度...
「你有冇見過佢？」
可能係我把聲太沙啞，佢聲得好辛苦，辛苦度本應喉嚨痛到喊嘅我，變成佢幫我流眼淚。
「有。」
其實等佢回覆之際，我痛出嚟嘅汗，仲多過佢啲眼淚。
真心真意嘅眼淚，唔好笑同阻住佢流出嚟，收埋係心滰乾，之後會痕痕癢癢，會再沿住水漬堆滿成湖，最後成個人因為眼淚而有入無出。
「佢講咩？」
「佢話係所有嘢都係你做...」
佢摸住我塊面凝視我，應該係擔心我會激動，所以用撫摸嚟安撫我情緒。
「你信唔信？」
佢等到失去十幾年嘅撫摸，我想得到十幾年前無嘅說話。
「唔信，兇器最完整嘅指紋佢有幾個，你得半個指紋。」
佢終於堅定信我，唔理有冇包含對我上一次嘅信任，今次信我就夠。
我嘅沉寂多年嘅睡火山爆發，地震裂湖底，水多到撲滅咗火山。
無諗過有一日，堆積嘅水漬有入有出，事隔多年終能自取自救。
「咁我而家係因為所謂嘅前科，所以處下風？」
今次我唔再係好似上一次咁孤立無援，佢會幫我，我唔可以放棄，至少我唔可以放棄佢嘅信任，係我前十幾年無得到過嘅嘢。
當年嘅我係被人用親情設局陷害，唔係基於信任，兩者唔可以相提並論。
「同埋精神問題...」
被佢提起我最唔想面對嘅指控，點解啲人識得歧視我，永遠唔諗吓去檢視另一個人。
既然我有，佢都有機會，先天遺傳，後天誘發，我哋同胎，基因至少有一半一樣，點解永遠只係我身上面搵原因。
更何況我無，當時嘅報告都係偽造，我只係替罪羔羊。
我終於發洩完，冷靜講述經過：
「有冇同佢做過腦部檢查...
佢將佢老母當成我嚟斬，因為我最後見到佢斬嘅時候係叫緊我個名，然後佢『醒返』發現我出現阻止佢嘅時候，先意識到佢斬錯人。
之後佢將我拉上車，開車到高速公路斬我炒車，前一段佢無意識發生，後一段佢一定有意識同計劃。
只怪佢太錫身，佢死唔去，我都死唔去...」
佢細細力捂住我把口，阻住我講落去。
佢其實一直都唔夠膽望都摸我嘅傷口，佢驚我痛，但我睇到佢戥我痛...
我真係好痛...
當年嘅我委屈到唔可以講痛，因為我『有病』，因為所有人都覺得，喺我真正意義上需要承受嘅『抵死』。
如果當年嘅人唔包括佢就好，我而家篡改歷史，修改我心裡面唔再留刺嘅過去，要令而家嘅自己回望有佢嘅時候更加身心舒暢。
「車庫閉路電視同車裡面嘅錄音、錄影都壞晒...」
佢好懊惱為我搵唔到證據同突破口，我雖然情緒發洩過後嘅放鬆令到頭痛難熬，諗到一個最根本嘅問題。
「我講咩都無人信...
不過聽人咁講即係佢有預謀...
佢老母係咪之前刺激咗佢？」
佢回想咗一陣，唔知啲時間用咗喺斟酌啲用詞喺事情定人物稱呼：
「應該係Auntie將佢收起咗屬於你嘅嘢搵到，整爛晒想拎去丟，點知畀佢發現咗。」
我沉默時佢無打擾，半响過後我拋下一個問題：
「如果我放過佢，佢會唔會放過我...」
佢秒速回答：
「你想點做都好，唔需要自責，你無錯。」
佢可能唔似其他人咁識表達好多，但佢會直接放我需要嘅答案我，佢初見定而家都係一粒藥力無過期嘅定心丸。
「咁我錄口供，麻煩你幫我請律師。
錄口供嘅條件係必幫佢做腦袋檢查，我要佢無病無痛、清醒咁去面對佢嘅錯誤。
同佢做完檢查，畀我睇咗報告，我再錄口供。」
食完專用定心丸嘅我，靜候藥效到，務求另一個人可以被病我除去。