《A》: 5

新一杯酒嚟到我諗緊嘢無飲，佢驚我嬲，撞杯時嘅微笑帶有討好。




佢笑得好多元化，另一個得三個弧度，只有局促。








做人嘅危機感被發仔瘟沖散，唔知好定唔好。




我飲完之後，放鬆笑問：








「咁你而家知道我係邊個未？」




凝視佢所有細節表情，三杯酒精堆疊壓住理性，成功畀咗佢一次機會。








佢收起笑容認真回答：




「知道，係佢主動搵到我，再話畀我知你搭咩車、住邊，叫我做你嘅朋友。」




咁一早就返嚟我身邊嗰個，都係佢派先嚟...








我呢一世打唔過嘅人，永遠都係另一個同胎出世嘅仇人。




酒精無辦法將情緒轉換，只可以加入煲大當刻有嘅情緒。




「你係佢嘅人？定想睇下我定佢落魄啲？想聽結論。」








我等住佢講一貫會出現我身上嘅貶義，點知我聽到係佢陳述事實。




「你知唔知佢扮過你返工，我先覺得奇怪，點解佢可以咁樣做，你哋真係似到無人發現咩？




我識得你哋公司嘅人，所有人都分得佢同你，佢自嗨以為無人發現。








你哋老細、即係我哋師兄同佢哋落咗Order，由得佢嚟，唔好話畀你知，費事你聽到連工都唔返。」




佢無必要呃我，至少有八成係事實...




我思考另外兩成係咩，應該係我本來唔信人所致，萬一輸都留返兩成唔畀自己輸得太盡。








與佢無關，事實同事件經過都係，唔可以入佢數，人哋係過客，唔可以為我嘅人生負責。




由其係人哋眼中嘅小事，可以被全部人無視、包容到遺忘嘅人同事，都係小事。




「咁你而家同我係想建立正常朋友關係？」




我搶過佢杯酒飲完，再拎起我嗰杯乾埋，五杯。




完成任務，可以返屋企喇。




「佢確實想搞你，我可以幫你收集情報，抵消之前我無幫你嘅錯。」




佢叫停本來要上嘅最後兩杯酒，然後捉住我隻手抹乾淨，本來隻杯笠，原來佢知。




係我唔知，掂完又掂，黐立立。




我無抹走過，心態無改變過，所以到最後都係我一個人，無強行改變自己對過去嘅執着，導致自己陷入絕境。




只有剩返一個，先可以解決嘅絕境。




可惜我真係無咁黑心，連諗吓都覺得無謂，提起佢哋嘅晦氣程度，係諗吓都覺得自己要用碌柚葉洗腦。




佢應該要承受返佢畀過我嘅惡意，變老、變得更壞，變到佢自己都憎自己，成為他人嘅反面教材，先係佢今後生存嘅意義。




酒吧唔收卡，現錢啱啱用晒，佢爽快畀完錢就帶我返屋企。




自己安靜慣，有多一個靜埋一份，會有愧疚感。




強行裝上笑容向擔心嘅佢進行勉強式安撫：




「Sorry，你其實唔洗覺得唔好意思，係我要代嗰個唔生性嘅向你道歉，成日都拖啲外人落水。」




「你原諒咗我？」




佢半信半疑，我坦率點頭：




「你起碼有悔意，好過其他人，包括親人...」




衝口而出『親人』我都覺得有啲衝擊，咪係因為呢份矛盾，令到我一直放唔低要承受相應嘅痛苦。




深夜嘅街頭，有半禿嘅樹、半亮嘅燈，同半醒嘅我。




佢唔係畫面裡面，酒精融唔入佢嘅身形去我腦裡面。




另一個都係，我需要呢種自私嘅程度，保護自己，返到屋企。




「你都幾飲得...」




「食藥瞓唔到，尋求外力幫助...」




睇到社交強者被迫手撩我講嘢，真係辛苦晒佢，我仲要差人錢…




啱啱佢拎咗我電話存咗佢手機號碼入去，仲要幼稚到打通咗佢手機存好先畀返部電話我。










本來咩氣氛都無，唔知係咩原來促使佢起勢突襲。




「可唔可以畀個機會我...」