《A》: 4

「好食，有冇外賣？」




我開始專心食自己叫嘅嘢食，驚佢再夾嘢食畀我，嘢幾好食，唔可以成日嚟幾可惜，所以想搵一個折衷嘅方法。








「呢度唔接外賣，不過可以預訂檯同嘢食，上網睇完佢哋餐牌打嚟落單，預埋搭車時間，一坐低就可以食。」




我係咪表現得太明顯，點解佢會咁樣答我？








好耐未試過有人，唔需要我一句一句問個答案出嚟，好快就可以解答我嘅疑問。




係唔鍾意佢會偷偷地夾我啲嘢食，雖然我唔食嘅三色豆，但會唔會太無距離感...








我哋唔算有太多交情...




食到咁上下，等緊甜品上嗰陣我問：




「我想問一陣呢頭有咩車可以返去？」








佢愣一愣：




「呢度可以行返去，當散步，我哋屋企其實好近。」




佢講咩都得，我都唔知自己係邊。








「咁一陣麻煩你帶我行返去。」




佢有啲唔開心，好似我唔記得咗啲嘢，好緊要咁。




「咁快講走？我哋仲有下場，你食夠嘢未？」








嗯...好緊要...




都唔理人死活，你社交能力就話易啫，可以不停同人吹水，我呢啲唔慣社交嘅人，食一餐嘅時間已經應對得好勉強。




去到喝嘢嘅地方，佢有揀過，嗰頭幾間酒吧，有唔同人同佢打招呼，佢都禮貌同人講聲唔好意思。








佢好擅長同人建立人際關係，係我好缺乏嘅技能，突然欣賞到佢，同埋都理解到點解有人想巴結佢。




只要喺佢度有好感、好名聲，再幫手講兩句，所有人都會撐佢所支持嘅事。

最後去咗一間好靜嘅清吧，一入到佢已經幫我問有冇無氣嘅飲。




我差啲唔記得，仲有一個比佢早嚟到我身邊嘅人，趕唔走嗰件。




佢哋都好似，兩個都會夾硬要你接受佢哋各自嘅好意，但我唔知同唔敢接住佢哋嘅好意，驚有後果。




「可唔可以知點解你會想同我有聯絡。」




另一個我問嘅話，佢會諗多咗然後就將自己嘅一切想法、做法加諸我身上。




呢一個我問佢唔會諗多，只會想我知道佢更多，暫時唔敢迫我去理解或者認同佢。




「人大咗，睇嘅嘢同感受到嘅人唔同。




你嘅存在一直都係好特別。」




講嘅時候佢笑容有啲苦澀，唔知係因為其他人定係我，『特別』都有好多涵義，如果我問等於在意，同時要為佢願意吞吐嘅感受承擔責任。




「你會唔會係認錯咗人。」




我慢慢飲完第一杯，味道唔錯，選擇將意思含糊推諉，希望佢將我哋各自喺過去、各自心目中嘅定位再定義。




想等下一杯酒，所以有繼續對話嘅需要。




「我都唔知，但我無同其他人一齊排擠你，我連你係邊個都分唔到。」




佢幾真心，我都諗返轉頭，以前就係以我同佢要完全一樣，唔畀人認出。




如果以前呢個係人生目標，咁我成功咗。




又好彩被迫醒咗，我有『做自己』呢個人生目標，好難㗎。




入晒血，入晒肉，望鏡一樣樣。




我每日嘅目標，係要做自己—




可以差，可以頹，係唔可以壞。