《A》: 2
第二日準時12點出現係office，戴住耳機無留意周圍環境，直接行入自己房。
入到去發現所有要開會嘅人都係齊度，點解一間細過傢俬舖陳列室嘅房，可以坐到咁多個人...
我張梳化...
仆街又要清潔完先用得！
「我哋啱啱開完會，而家夠鐘Book咗枱去食飯...」By我老細。
「我啱啱食埋嘢先返，你哋去食～」
我懶得揭穿佢哋，扮下嘢有禮貌拒絕，條友仔搵埋班同佢一樣唔洗點做嘅人，嚟搞我呢啲需要返工做嘢嘅人。
一班有錢人形移動壁報板，梗係覺得佢哋心懷不軌到一個合法嘅地步，佢哋應該會將我盲婚啞嫁指婚畀某人。
可惜，我好彩，無可能發生。
某人見到啲幫唔到手、等緊食花生嘅豬隊友唔出聲幫手時，佢只可以靠自己。
「咁你今日晏啲陪我去倉睇嘢？」
等到某人尷尬出招，我當然係笑住口咁畀說話佢聽—
「大哥，我係屬於呢一間公司，你嘅倉我呢啲外人去睇唔啱數。」
「你咪去囉又無乜嘢搞，會我哋又開完，你得閒喇...」
最可愛嘅當然係我老細，我名義上嘅老細趕得切幫口，真係對朋友好用心，咩老細都係員工喺廢嘅返工第一條鐵則。
而我呢啲員工只能夠改變自己：
「我唔屬於你間公司咪去囉，好喇吓你班友！」
老細開始慢慢開門撤退，開門大大聲講畀其他員工聽：
「你去啦好唔好～
我哋要Hea一日去睇演唱會，今日呢度無人想做嘢，你死咗條心唔去睇演唱會就去睇倉～」
門外面大家都好開心，係我一個人唔知咩叫開心，唔止係返工後，可以係做人前。
簡單都做唔到，快樂就自然感受唔到，無嘢係必須，快樂同生存都同樣，可以對現實麻木同失望，停下本來嘅腳步。
但唔係被人強行控制，同自己因為現實而悲觀改變得出嚟嘅結果，所有決定嘅前題要係自己掌控完，經歷透、玩透人生同世界規則之後，真係覺得夠皮先去選擇結局。
思緒回籠，見到老細仲係度同班細嘅一齊起哄，火都嚟。
「你班正...」
「正常人嚟嘅，同你一齊做嘢嘅一定係正常人～」
某人開懷接過我話頭，完全無當我嘅火氣係一回事。
如果佢一早就咁對我就好，我會好好珍惜。
而家佢咁樣做，同對其他人做嘅效果一樣。
令到件事、佢本人，同我嘅感受都唔重要。
「你去食完飯再通知我，喺度處理少少嘢先。」
「好。」
收火收得莫名其妙，一如當初愛火噴射到街知巷聞，都一樣咁莫名其妙。
莫名其妙愛上一個人，被迫失去愛嘅一個人，再被愛佢但唔愛我嘅人，夾埋剝奪我可以愛上人嘅能力。
霸道到連愛其他人都做唔到。
咁我只可以收起所有愛嘅功能，去愛自己。
當佢等我出現時，好似以前返學放學時見到怕醜嘅佢一樣，係地點、裝扮同身份嘅變化。
有我眼中以往嘅迷人，同埋而家嘅無奈，我無辦法去解決出問題畀我嗰個，所以我同佢之間係完全無可能。
「去倉度睇嘢係藉口？
係嘅話，咁就去其他地方。」
「好。」
用乖巧呢個詞語去形容佢不為過，以前嘅佢都係咁，安安靜靜、又對住咩人唔啱嘴形唔會駁嘴。
佢好順手咁幫我拎住把遮，普通朋友幫手拎遮如果太明顯拒絕，咁就係我無私顯見私。
「你有冇帶身份證？」
「有。」
公司附近行兩步就有嘅銀行，唔係返工時間，就係拎唔到籌，今日放半晝就可以慢慢等。
我哋兩個後生爭唔贏凳仔，企埋一邊嗰，佢終於忍唔住問：
「做咩嚟銀行嘅？」
我唔會承認我心血來潮想做一啲嘢，由本來嚟銀行簡單處理帳戶，到進階嘅想法。
「放半日假唔嚟搞銀行嘢等幾時...
星期六日瞓晏咗又嚟唔到搞...
啊我呢啲窮人未有資格去做優財客戶...」
「唔好咁講，我哋有時間，可以慢慢等。」
唔小心搞到氣氛尷尬，佢又好委屈咁，係佢退化到好似以前咁，定我過去呢段日子走遠咗...
呢啲咪叫唔夾囉。
始終係晏晝時份少啲人，等一陣就有職員可以幫手：
「你好兩位今日想嚟辦理咩項目？」
另外一個都望住我，我有啲唔敢望佢，正臉回應職員，我未得到過人哋允許去做以下嘅動作，我承認係普通朋友身份嚟講係過份咗。
「我想開聯名戶口，唔該你。」
隔離嗰個捉住我隻手，我唔理佢，職員見到佢咁樣都有啲警剔。
「你哋係咩關係？戶口用途係？」
等到呢度，佢最多都係捉住我隻手，唔夠問我問解，佢應該更驚失去咗可以一齊完成一件事嘅資格，咁我就唔理佢繼續嘞。
「佢係我契哥，我無屋企人，佢幫我理財。
唔直接轉錢畀佢，開戶口我可以查返啲錢，冇詐騙成份。
開咗之後麻煩你將我帳戶裡面嘅錢三分之二轉入去聯名戶口，唔該晒你。」
佢聽完放開我隻手，無再講過嘢，人哋叫佢答嘢就答嘢，簽嘢就簽嘢，完全安靜。
直到我哋出咗銀行門口，佢拖我上車之後先講嘢。
「你知道你係度做咩...」
好難明咩？
我輕鬆地真心向佢解釋：
「唔可以畀條命你，又唔可以畀個人你，畀錢贖抵消返畀你，開唔開心？
人你又唔會得到，起碼得到錢，有人咁樣對我都開心...」
「你要點樣先信我，當初無出賣你，同埋我真正鍾意嘅人係你...」
終於迫到佢暴躁鬧我，好奇怪睇唔慘佢扮乖扮慘，反而想睇佢真心鬧我放鬆一下。
睇到佢爆完我又好迷惘，究竟佢諗緊咩，對我嘅未來諗多咗，覺得自己諗唔通透，所以迷惘？
我都未對自己覺得迷惘，幾時到你？
「我有錢畀你，仲要唔高興，唔係要我畀埋『棺材本』你啊嘛？
你哋班人，得饒人處且饒人...
唔好再逼我諗、或者行返轉頭，我夠膽保證—
邊個再踩我底線，我會用返佢哋對待過我嘅方法，十倍奉還。」
收起氹細路嗰套，回歸本性，是人性本惡，佢嘅善改變唔到我同其他人，佢份人正直到連善變都做唔到。
差唔多到放工時間，我都唔想落車迫巴士，見到佢仲係心有不甘想諗嘢反駁，只能夠生硬地轉移話題。
「去邊定各自返屋企？」
「去倉。」
佢情緒回復穩定但低落，坐佢車都幾穩陣，我返嚟無去好多地方，喺佢架車度望外面根本認唔到路。
實際意義上嘅物事人非，不過好彩我唔鍾意、亦都無需要周圍去，搞清楚屋企附近有咩舖頭同設施就得。
去到郊外咁滯，多草多樹多蚊蟲嘅地方，有一間格外白淨嘅倉庫，一睇就知唔係放貨物嘅地方。
一打開門入去，好乾淨，又白賴晒咁，唔知以為係我舊時住嘅地方。
黑鼆鼆都係我以前住過嘅地方。
兩個都唔係好地方。
行到入去後面，我見返啲一切都未發生時嘅嘢。
我嘅創作，我嘅作品，代表我之前嘅人生。
我睇住佢逐塊白巾掀起，其實係有感動，如果我都仲係創作時期嘅自己，有人咁愛惜我嘅作品，你話幾好呢...
但而家嘅我睇返啲作品，我只係覺得好可悲，我無能力再成為嗰一個自己。
「啲嘢仲係度？賣唔到好價錢就丟咗佢，仲要放係度晒倉租、打理同冷氣錢...」
我一步都無行前摸，以往親手打造嘅作品，今日幅幅件件皆陌生。
「唔係無人要，我買返嚟，係你嘅，我會收好，唔會浪費你嘅心血。」
佢想拉我行前睇，但我無被佢拉郁，我只可以低頭輕笑：
「咁我啲錢唔夠你彌補你份我唔需要嘅心血...」
佢將啲錢用錯咗地方，助長咗啲壞人，呢份佢以為畀到我嘅感動，其實真係好雞肋，咁耐以嚟，唔止錢唔到我手，關心都係，對我一啲好處都無。
佢見我無佢想要嘅反應，都終於泄氣放䠋：
「你唔要，自己打爛丟出去。」
佢一句就刺激到我諗返起舊時：
「唔洗喇叫人掉出去就得，費事親手打爛，到時反口被人拎到指模，咁啱有證人，到時又成功被屈～」
我笑咗出聲，有一種走舊路嘅重疊，以前發生過嘅，而家又想再發生，我再無多一個十年可以浪費係人哋設嘅局度。
佢捉住我膊頭大聲吼叫：
「你要點樣先可以放過自己，所有事都過去，你都出返嚟、過嚟新嘅人生。」
睇到佢仲唔明發生緊咩事，心諗呢啲人真係好幸福，成世人唔識做人，都可以生存咁耐，條命真係生得好。
「我成日都放過自己，係你哋個個都逼我放棄自己。
每一個人都要提醒我，過去，有一個人傻尻咗，屋企同外邊都被人陷害、設計，最後仲要承受與我完全無關嘅後果！
點解你哋唔肯放過我？」
本來好聲好氣，到後來我都有啲唔甘心，係佢哋唔肯放過我，我都好委屈。
結果係有另一把聲係倉門口講嘢：
「點可以放過你，你係我屋企人，你係我分身，我只係放你出去，經歷唔同嘅人生。
你唔屬於你自己，你屬於我...」
佢終於今次選擇擋係我面前，唔畀對方行近我。
而對方當然唔會當佢係一回事，佢越過晒我哋，行近觀看作品。
佢緊張詢問對方：
「你點解係度？」
人哋漫不經心咁回答：
「我嘅作品放係呢度？應該捐出去...
唔係連被人欣賞同鬧嘅機會都無，廢物都要有空間畀人鬧先可以成為一件真正垃圾。
同佢一樣，仲可以喺度嘅原因，係要成為襯托我優秀嘅垃圾。」
仆你個臭街...
唔發火當我係病貓...
沉住氣，笑住回應：
「你咁多年都無變，仍然咁蠢...
你嘅世界除咗我，無其他嘢可以睇到咩？
你都幾失敗，我連你都唔想見到，連你要唔到嘅人都唔想要，你睇吓你...
垃圾都不如，無人想要，拎上手糟質都嫌無聊。」
睇到人哋個腦轉唔切，想衝過嚟打我，以往幫佢嘅變成擋佢嗰個，我就心涼。
不過都係唔好畀人哋當佢係二五仔，我會畀落台階佢。
「好彩我無打爛咋...
你幾時先聰明少少？
快啲去安慰人喇...」
我慢慢行出倉庫，唔理佢哋後面點樣拉扯，佢到我腳步聲遠離時心急大聲講—
「我無同佢夾埋，我無同見過面、聯絡過，我係企你嗰邊...
你信我、你信我，我唔佢點知呢個地方！」
中間應該有出拳，有人倒地，贏家衝上嚟捉住我，嗯...
望吓倒地嗰個，眼神好兇狠咁望住我，哇好驚啊...
「你哋之前嘅嘢關我春事咩，唔好阻住我去食飯！」
平等地鄙視每一個阻住我去食飯嘅人，不知所謂。