《A》: 1

星期四晚九點九，我唔算最後一個收工，拎完文件入人哋房然後就拎袋出公司。




係公司樓下見到頭先間房嘅主人，佢食緊煙。








「食咗飯未？」




有咩好得過老世叫你開OT，仲要記得問候你有冇食飯，屌又唔見你幫我叫外賣，咁撚貼心真係多謝你啊。








對住咁可愛嘅老世，我係會揀咁回答：




「屎就有份食...








一陣簽埋你枱面份嘢交咗佢，我走喇。」




我轉身就走巴士就到，老世無覺得唔好意思，叫大大聲係街尾度嗌出嚟。




「聽日準時12點見人，執下個樣唔該你！」








無理到佢講啲咩，走到走巴士站啱啱有車，上巴士之後無乜人搵到位坐，想睇下電話點知聽到有人咳，焗住係個袋度拎個口罩嚟帶。




返工導致身體虛弱，得閒死唔得閒病，仲要個老世只claim酒水煙零食，就係唔claim醫療同湯水。




搵返口罩戴完之後想玩下電話，有一個信息彈出—








『你放工未？可唔可以傾...』




已讀不回，瞬間唔想睇電話，但之後又有信息彈出—




『聽日你嚟開會嘅話，一齊晏晝食飯？』








繼續唔開嗰個對話框自讀不回，按下面嘅對話框，錄音：




『聽日我唔去開會返Office，唔好再爆響口，見到佢上嚟或者留下等我，我即時辭職。』




以上對話致老世，突然有人拍我膊頭，又係啲唔想見到嘅人。








「你咁晏收工嘅？」




「窮咪遲收工囉。」




對方懶熟坐埋係同一行同搭住我膊頭：




「我哋見得返，又一齊搭車，係緣份嚟，可唔可以畀你電話我，再約埋其他...」




「孽緣都係緣份我知，到站喇拜拜。」




一落車就見到頭先傳信息咁我嗰個人，我瞬間覺得好疲倦，點解做人咁難，返完工都仲要面對人際關係嘅麻煩嘢。




「你未食飯，我哋去食咗嘢先。」




我好後悔點解要返嚟做嘢，咁短時間就被人認得返，仲要有手尾跟。




我想越位，但人哋高大行兩步就截住我，樓下保安裝下裝下咁，我睇起上嚟咁唔洗保護咩，出嚟保護我啊唔該！




安全樣就唔會被人即用即棄喇，我先係受害者。




「我有人係屋企留飯，唔洗勞煩你操心。」




「你自己一個住，呢個時間仲要煮嘢食會好攰，叫外賣唔健康，我煮畀你食。」




屌又邊撚個做臥底，我身邊都已經無人無物，係咪要我完全阻絕有人接觸我...




「大佬你畀我抖下喇，我唔想再見到人。」




「你有當我係人咩？」




屌你...

保安好似開始忍唔住想開門收睇，唔畀佢再扯住我隻手。




「唔當你係人就唔同你講嘢喇，唔好同我玩文字遊戲，我而家想自己一個返屋企瞓覺，唔好再煩住我。」




差啲就冇骨氣叫佢上去幫我煮嘢食，未知附近叫外賣邊間好食...




無及時離開嘅我，聽到我最唔想知道嘅消息—




「佢都返咗嚟。」




真係頂唔順笑咗出聲，行去拍佢膊頭：




「咁你仲唔過去搵佢？




你拋棄我都係為咗佢。




同埋你自己，我連成為你利用得唔到佢中間時間去關心嘅人，都覺得嘔心。




咁大個人，分下輕重，我嘅反感雖然你心目中佔嘅比重最小，但都係一種有份量、你需要花時間消化嘅感覺。」




行去問保安叔叔有咩觀後感，佢答唔出。




我都答唔出。




費事轉頭再望外面嗰個，驚佢答得出。




咁有事嘅人就唔係我，係佢。




咁我就要擔心佢，到時又要同人爭、同人拗。




不了，咪撚搞我。