轉新工唔小心勾引咗個同事: 十八、拖拉
Matt話陪我搭車，當係分開前最後一次送我返去，想對得耐啲。
「其實點解當初你會對我有興趣？」喺巴士上，我忍唔住問佢。
「覺得你得意，又細粒，傾落又幾夾囉。」佢微笑，似係諗返起我哋一開始係點認識。
「但係我結咗婚架喎，你唔驚架咩？」我都係不解，點解一個單身男人唔正正經經搵個都係單身嘅女人，反而去撩一個已婚婦人。
「如果你都唔驚，我有咩好驚。」佢都有道理嘅，呢個世界好似憎恨淫婦多過討厭姦夫。女人有所謂「婦道」要遵守，但男人咸濕可以歸咎於天性本能。
「但點解你唔搵女朋友？你明知同我一齊都冇結果。」
「咁可能係我唔需要有結果呢，拍拖咁麻煩。」講到尾，搭上我都因為只係想玩，唔想定性。
「如果我單身呢？你會唔會溝我？」我想確認佢其實係有鍾意我嘅成份，唔係純粹出於鳩痕。
「會掛，唔知呢。」Matt攬住我。
喺呢一程車上，Matt講咗佢以往拍拖嘅經歷，解釋點解佢而家享受單身。簡單啲講就係前女友管得佢好嚴，唔鍾意佢對未來冇計劃，太安於現狀，擔心大家嘅關係唔知點發展。於是Matt離開咗香港去working holiday，返嚟之後唔想拍拖怕歷史重演。
我哋嚟到我屋企樓下，係時候要道別。
「唔好送喇，返去啦。」我放開原本拖住佢嘅手，唔想佢送到上樓。
「有咩事就搵我啦。」佢張開雙手攬住咗我，唔知第日仲有冇機會可以喺呢個溫暖嘅懷中歇息。
「嗯。」我將放喺佢背上嘅手鬆開，唔可以再心軟。
佢再一次低下頭錫我，比以往一般用力，我好怕再錫落去我就會改變心意。好彩，佢喺我未回心轉意前就停低，拍一拍我頭再轉身離去。
之後，我哋真係維持住普通同事嘅關係，只限喺公司相處合作。我盡量唔喺辦公時間以外搵佢，唔想俾佢假希望，亦係避免自己再沉迷。我哋冇打探大家嘅生活過成點，冇特意問候對方開唔開心，保持距離處理呢段關係最好嘅方式。
「你同Matt冇嘢嘛？」今日得我同Chris食飯，Matt話佢約咗人唔join。
「冇嘢啊，做咩？」我奇怪點解佢會咁問，明明我同Matt已經好疏遠喇喎。
「你哋之前唔係好啱傾架咩？呢排好似怪怪地咁嘅？」呢個八婆真係觀人於微，咩都逃唔過佢法眼。
「冇啦，人哋返學忙掛。」我聳聳肩，取笑Chris太過八掛。
「佢點止返學啊，溝緊女添啦。」溝緊女？佢有女朋友咩？我一臉狐疑。
「我噚日晏咗走，佢可能唔知啦，我去完廁所見到佢同admin team嘅新同事一齊走，好鬼close咁。」
「嗰個Kathy？唔係嚟咗一個月咋咩？」
「一個月夠佢落手啦。」諗深一層，我當初都係入職一個月左右，Matt就採取主動，睇嚟佢揀女落手係有pattern。不過唔緊要啦，佢有女朋友都係好事，我可以專心工作。
自從Chris咁講，我喺公司嘅時候都有暗暗留意Matt同Kathy嘅互動，的確係有啲唔尋常，但Kathy有時又會刻意冷淡，可能佢哋仲處於曖昧階段。
兩星期後嘅一個晚上，正當我喺屋企準備瞓覺，我收到一個電話。
「喂……」係Matt打嚟。
「喂？」咁耐冇私下聯絡，一搵我就打俾我，事態好似有啲嚴重。
「我有冇阻到你……」好彩今晚得我一個，如果唔係都唔知點解釋。
「你講吖，做咩啊？你ok嘛？」佢聲線聽落有啲頹廢，我開始擔心。
「我想見你……」
「你講俾我聽咩事先。」
「原來……佢有男朋友……」唔駛問都知，個「佢」係講緊Kathy。冇錯，呢個傻仔又一次舂咗個頭落一個已經有伴侶嘅女人度，不過今次係個女仔刻意隱瞞。正當Matt以為今次會得米嘅時候，咁唔好彩俾人哋男朋友當場撞破。雖然唔係捉姦在床，只係去街斷正，但係都足以令對方動怒。
「你有冇受傷？」Matt身型有返咁上下，我唔係好擔心，不過循例都要關心下嘅。
「冇……擦傷下啫……」佢嘆咗一口氣。「點解我咁戇鳩，鍾意親嘅都唔係單身。」
「你眼角高啫先生，咁鍾意向高難度挑戰。」我忍唔住要串佢。「咁你而家喺邊啊？」
「我喺……你屋企樓下。」佢係咪諗住只要殺到嚟我樓下就可以登堂入室上埋床？
「我唔會俾你上嚟架喎。」我故意裝作冷漠，唔想俾佢得逞。
「我唔搞你吖……」Matt嘅語氣愈來愈可憐。
「我落嚟搵你啦。」明明佢年紀大過我，成日都要人照顧返轉頭，唔怪得咁難搵女朋友啦。
我帶咗Matt去附近嘅一間酒吧，諗住佢既然失戀，最適合就係飲酒麻醉自己，就算唔飲都可以坐下傾下心事。
「俾我睇下……」佢塊面擦傷咗少少，唔算好嚴重，冇對唔住呢副身材。「痛唔痛？」我輕輕幫佢抹走面上嘅污漬。雖然識咗佢唔算好耐，但我從來未見過佢呢個樣，平時喺公司佢俾Mandy屌完都仲會烚熟狗頭，而家完全係死狗咁款。
「Sorry，要你照顧返我。」佢低下頭。
「小事啦。你哋唔係一齊咗好耐咋嘛？」
「唔耐……我冇諗過今次係自己傻仔啫。」
「女咋嘛，呢條女仆街咪搵過個囉，好快放得低架。」我拍一拍佢膊頭，希望會安慰到佢，佢直接攬住咗我。
「俾我攬陣。」佢整個人挨住我，加上佢開到聲，我唔想拒絕呢一刻咁脆弱嘅佢。「我諗係因為你。」
「關我咩事？」吓？你自己唔帶眼識人又賴落我度？做同事係咁，做你前SP又係咁。
「你唔喺度，我想搵人代替你。」Matt可能覺得自己講得好深情，但我聽落就覺得好荒謬。
「如果你係真心想拍拖，就唔好是是旦旦見女就溝啦。而家失手俾人玩就話係因為我，我冇揸支槍逼你溝佢架喎。」我開始扯火，想掙脫佢嘅懷抱，但係佢愈來愈大力，仲錫咗落嚟。我嘗試推開，佢將我逼埋角落，我只可以配合佢嘅嘴唇，接受佢舌尖進入我口腔。
「我唔係咁嘅意思。」佢停咗落嚟，「我掛住你。」
「你係咪特登呃我落嚟？」我疑惑佢一開始打俾我嘅用意。
「唔係，我真係想見你。」佢再一次愈哄愈近，「你唔想咩？」