17歲的夏天，被開發的過程: 二、阿軒

呢個曾經同我熟過一排嘅男仔叫阿軒，我哋初中嘅時候曾經同過班，仲坐過前後位，不過之後分開咗唔同班就冇再聯絡。識佢咁耐其實我對佢都冇乜感覺，我諗最大原因係佢唔係高我好多，加上單眼皮、眼細細，又有雀斑，實在引唔起我嘅興趣。

搵學校嘅過程其實就係逐間學校去問收生標準，又或者不停打電話收風問邊間學校收呢個分數，再即刻搭車填表交副本。去到下晝我決定咗重讀一年，仲搵咗一間喺阿軒屋企附近嘅中學，而阿軒就去咗一間banding較差、我阿哥讀過嘅學校升中六。咦，點解世事咁奇妙嘅？

唔單止咁，喺搵學校期間我同阿軒仲雞啄唔斷咁傾偈，由打機講到周杰倫咩都傾一餐，仲發現原來我哋好多嘢都好夾！講講下，突然間落雨，我明知自己個袋其實係有遮，但我選擇唔拎出嚟，阿軒就好自然地遮埋我繼續傾。

「我差唔多要返屋企喇。」我睇咗睇電話嘅時間，發覺都就快六點。
「你有冇我電話？」
「冇啊。」
佢喺我電話度入咗佢號碼，叫我今晚SMS佢。