瘋狂鏡粉大戰食人喪屍: （34）

眾所周知，銅鑼灣係老薑嘅集中地。

除咗老薑之外，當大家一講起銅鑼灣，就一定會諗起Sogo。

一講到Sogo就必定會諗起佢個部超級巨型電視。

本來一路慢駛嘅貨車，當一駛近到Sogo門口對出嗰條馬路，就立即加速，用最快嘅速度駛過咗紅綠燈嘅燈位。

跟喺架車後面三百隻喪屍，想加快腳步追上去，但佢地完全無諗到自己已經中咗陷阱。





班老薑一早就喺Sogo出面嗰部大電視做咗手腳。

佢地預早擒上去部巨型電視上面，較鬆咗曬啲接駁位，而且用兩條又粗又長嘅鋼纜，分別勾住大電視最頂嗰兩隻角。

兩條鋼纜嘅長度一路延伸到對面馬路。

成千個老薑早就分開左右兩邊，企喺對面馬路。

佢地每人手上一齊揸住嗰兩條粗長嘅鋼纜。





一見到班喪屍經過部大電視下面，成千個老薑就咬緊牙關，好似扯大纜咁，同時出盡全力將個Mon扯落嚟。

個Mon好闊好巨型，但老薑嘅力量更加大。

「你地班喪屍！快啲去死啦！」

佢地一邊用力扯，一邊大嗌振奮士氣。

只係做咗十秒嘅時間，嗰部巨型電視就鬆開咗，開始搖搖欲墜。





底下嗰三百隻喪屍聽到聲，岳高頭，見到部大電視好似就嚟冧咁款。

但係佢地想走都已經嚟唔切。

成千個老薑用盡全身所有嘅氣力，一鼓作氣將部巨型大電視扯落嚟。

一秒後，嗰部大電視成部打橫從半空冧落嚟地下。

三百隻喪屍，包括阿華在內，岳高頭擘大個口，眼白白望住個Mon砸落嚟。

嘭唥！！！

個Mon跌落地下嘅時候，方圓十里範圍嘅地下都劇烈咁震咗一下，可想而知嗰種衝擊力同震撼力係幾咁大。

俾一個咁巨型嘅Mon砸落嚟，嗰三百隻喪屍無一倖免，全部都被砸到變柿餅。





果然「薑」都係老嘅辣。

老薑呢一招「一mon打盡」真係犀飛利，一個mon就解決咗幾百隻喪屍。

一口氣隊冧咗咁多隻喪屍，班老薑同方劑各好開心咁拍手，一齊歡呼慶祝。

只不過，佢地只係開心咗一陣，突然之間有百幾粒催淚彈從天而降。

白色嘅煙霧一瞬間籠罩住整個銅鑼灣，一眾鏡粉俾啲煙攻到揦口揦面兼係咁咳。

呢個時候，由多個紀律部隊成員所組成嘅特別行動部隊，搭載十幾架直升機，游繩落到地面，正式展開行動。

佢地身穿整齊嘅裝備，並帶備催淚彈、衝鋒槍、盾牌等武器，出動對付鏡粉同喪屍。





除咗銅鑼灣之外，呢班特別行動部隊亦同時出發到港九新界各區，執行任務。

佢地目標只有一個，就係盡快平息呢次「鏡粉喪屍大亂鬥」。