瘋狂鏡粉大戰食人喪屍: （33）

當大家都以為呢班方濟各會全軍覆沒之際，突然間，有一架車身印有薑毛大頭相嘅貨車，撞開曬路上嘅障礙物，以時速過百嘅速度鏟入人堆，一嘢撞散曬班喪屍。

隨即，貨車上面三、四十個老薑，兵分兩路。

一班行落車負責分散啲喪屍嘅注意力，另一班就夾手夾腳，將受傷嘅方濟各搬上貨車嘅車廂。

雖然平時佢地兩派人互相敵對，但面對共同嘅敵人，佢地選擇暫時放低恩怨，互相幫忙。

對比起方濟各嘅猛烈轟炸，班老薑對付喪屍嘅方法就有少少唔同。





佢地知道班喪屍鍾意用口咬人，於是預先剪好一pack超強力牛皮膠紙。

未等喪屍埋嚟，班老薑主動衝過去，快手快腳將啲膠紙黐落啲喪屍個嘴到。

嗰啲牛皮膠紙黏力非常之強，一黐咗上去就唔係咁容易搣得甩。

班喪屍俾人蒙住個嘴，擘唔大個口，想叫又叫唔到，想咬人又咬唔到，一下子變成咗「無牙老虎」。

然而班老薑並無對呢班「無牙老虎」作進一步嘅攻擊，反而同心合力將受傷嘅方濟各搬上車廂。





當救曬所有人之後，架貨車就即刻開走。

「焫著焫著焫著焫著焫~著」

架貨車一路開，車頂嘅喇叭就一路咁播住《焫著》，個聲量覆蓋到隔籬兩條街都聽得到。

軒尼詩道上嗰五十幾隻喪屍，一邊用手搣開啲膠紙，一邊追住架貨車。

架貨車嘅車速其實並唔快，一嚟係因為前面有唔少死咗火嘅車擋住去路，二嚟係班老薑故意開到咁慢。





後面車廂道門無閂埋，一班方濟各見到啲喪屍追得咁近，就問班老薑點解唔開快啲。

其中一個老薑就話：「呢個係我地嘅策略，我地要引多啲喪屍過嚟，越多越好。」

跟住，有幾個老薑主動行出去車廂邊緣，用刀𠝹到自己手掌流血，然後再伸隻手出去，用啲血腥味吸引更多嘅喪屍出現。

佢地一路揮動流血嘅手掌，一路沿途大叫：「你班喪屍快啲過嚟啦！快啲過嚟咬我地啦！」

「Raugghhhh！！！」

附近啲喪屍聞到啲血腥味，又真係俾佢地引到埋嚟。

而阿華就係其中一隻俾吸引過嚟嘅喪屍。

佢本身住喺灣仔呢頭，咬死自己老婆之後，佢就離開咗屋企。





出到街佢繼續覓食，見人就咬，之後聞到啲血腥味，就衝埋嚟追住架貨車。

架貨車雖然行得慢，但始終保持住同喪屍一段十米左右嘅距離。

喺灣仔兜咗一陣，然後架車再兜返出軒尼詩道，慢駛至銅鑼灣。

沿途不斷都有喪屍加入，數量慢慢由五十幾隻變成一百隻，由一百隻變成二百隻再到三百隻。