我嘅大學生涯 (有甜): 結局

我：「你諗住點樣搞佢嘅喪禮？」
 
阿蓉：「整個墓碑比佢，佢之前話過死咗之後想好似iron man咁樣，其他人著住黑色西裝係佢個碑面前紀念佢。」
 
我估唔到最後都係救唔返，明明呢場交通意外無其他人受傷，淨係帶走咗佢一個。
 
或者佢係夢入面太開心，佢個樣仍然係微笑住，好似話比我地聽佢開心到唔想再醒返，中咗無限月讀一樣。
 
都好嘅，如果係我嘅話都唔會想醒，現實世界太殘酷太無意義，不如一走了之。
 


我：「你有咩需要嘅話記得同我講，唔好一個人死撐。」
 
阿蓉：「嗯我知架啦，你可唔可以比我一個人同佢講下野？」
 
我好識做咁點點頭然後走咗，落到去下面買杯咖啡坐係到飲。
 
望住其他人有啲喊緊，有啲鬆一口氣，有啲同病人一齊傾計。
 
或者只有醫院先可以見到人生百態，集合哂人類所有感覺同感受。
 


因為大家都好驚入醫院，好驚一入到黎就出唔返去，死係入面。
 
諗返起同阿燕嘅第一次相遇，我第一眼見到佢就覺得佢好特別，佢同蔡煒燕嘅氣場一樣。
 
所以我教咗佢好多野，令到佢變成一位男神，作為我嘅接班人。
 
但我都無諗到我身邊嘅兩隻燕，最後都飛唔起，係天空跌落地面而逝去。
 
你地又有無諗過我嘅感受？拋低我一個人係地獄入面，自己就走咗去。
 


其他人望住我，我即刻拎張紙巾抹眼淚，再扮無事咁睇電話。
 
最愛我嘅兩個男人都離開我，我又再次變返一個人，無人無物。
 
如果一切都只係幻想會有幾好，我同佢地可以繼續一齊玩，一齊係沙發到食雪糕，簡簡單單咁過日子。
 
最唔平凡嘅人偏偏想過啲最平凡嘅生活，如果可以返到過去嘅話，我寧願做返個普通女仔。
 
不過我諗真係可以再揀多次嘅話，我都會選擇行呢一條路。
 
或者所有野係注定，生離死別都一樣，無人可以逃避命運嘅安排。
 
阿蓉行過黎坐係我對面，我睇得出佢又喊過黎。
 
我比咗杯咖啡佢，佢飲咗一啖，即刻伸脷覺得好苦。


 
飲多啖，都係好苦，再飲多啖，開始接受到，慢慢飲完一啖接一啖，之後仲可以當水咁飲。
 
再苦嘅野都面對過，一杯咖啡又可以苦得去邊？
 
我：「如果你可以同佢講多一句野，你會想同佢講啲咩？」
 
佢望住出面著住病人衫嘅小朋友好開心係到跑步，再搖搖頭笑住咁講。
 
阿蓉：「呢個世界無咁多如果。」
 
阿蓉：「不過有嘅話，我會想同佢講，多謝你對我做過嘅所有野。」
 
佢對我點個頭之後就走咗，佢真係好慘，第一次拍拖就搞成咁。
 


我飲完杯咖啡亦都離開間醫院，去返我地一齊讀過嘅中學，諗諗下呢間學校都真係害人不淺。
 
同啲老師簡單問候下之後，我就行咗去學校個後花園到，不斷係到想當年。
 
我瞓咗係片草地到，望住個天，諗緊佢兩個宜家係咪係上面望住我。
 
我：「我真係…好想再次見到你地…」
 
有兩隻燕係我面前飛過，我嚇到即刻彈咗起身，佢兩個飛飛下停咗落我下面。
 
我坐返係地下，細細力咁摸佢地，佢地好似係到爭寵咁，仲打起架上黎。
 
我笑到唞唔到氣，佢地呆住咁望住我，而我只係輕輕咁攬住佢地。
 
我：「多謝你地，同埋我永遠都會記住你兩個。」


 
即使你地唔係到，但我同你地之間嘅牽連仲係到。
 
至少比我用呢堆記憶球，永遠咁記住我同你地一齊嘅時刻。
 
我嘅大學生涯。

無須要快樂 反正你一早枯死
如果有眼淚 只不過生理分泌
就算淚水多得 可灌溉整片濕地
蒲公英不會飛 陵墓裡伴你於一起

如果有再會 恐怕已經一世紀
回憶哄騙我但凡失去也是美
用你一分鐘 都足夠我生醉夢死


如懷念也是有它限期 明日我便記不起

從未來再見 遺憾舊時不太會戀愛
願我永遠記不得我正身處現在

從月球觀看 難辨地球相愛跟錯愛
三世書不會記載
情繫我這半生的最愛

時空太過大 超脫我的喜與悲
能戀愛過後 自然參透到命理
就算一雙手 只擁抱你的紀念碑
流離在某月某天某地 仍自覺共你一起

從未來再見 遺憾舊時不太會戀愛
願我永遠記不得我正身處現在

從月球觀看 難辨地球相愛跟錯愛三世書不會記載
情誰為某某歎息感慨

再見 仍舊未能跟你再戀愛
但你與我有過的過去 牽涉後代
從未來觀看 潛伏萬年的野史記載
不理它小愛與大愛 人類太過渺小的最愛

https://www.youtube.com/watch?v=9K1sB4rrdWo

拜託，這只是我的妄想。