我嘅大學生涯 (有甜): 抱歉
「Dear 燕：
聖誕快樂！我諗呢個聖誕你唔會覺得lonely啦，有我啦、有你女朋友啦、仲有Ocamp識嘅朋友仔啦。雖然我諗我係你心目中唔重要，但係我都好開心今年能夠識到你，同埋寫呢張聖誕卡比你。
我同你都識咗四個月啦，好開心個陣玩Ocamp可以做到你組媽，仲記得揀人個陣，我淨係見到你個樣就已經覺得你好特別，仲問Bella可唔可以將你入我個組，我都估唔到做你組媽做到可以同你一齊過聖誕。
我唔知你覺得呢件事係好彩定唔好彩，我自己就覺得我運氣好好架啦。對於我黎講，可以同你周不時傾幾句，關心下對方，我都覺得已經好值得我地去珍惜，你都知我地之間係有好多難關。咁其實去到呢一步，會唔會已經係最盡呢？
我唔知，我淨係知我好鍾意你，我會不自覺咁緊張你同擔心你，我成日都諗緊你會覺得我係一個點樣嘅人，希望可以比一個好嘅印象比你，所以我一直都係你面前盡量收埋自己唔好個一面，因為我唔想比你見到個一面。
你之前講過我唔緊張你唔搵你，但其實我好多時候都會諗起你，好似食食下飯我都會諗你今晚又會食啲咩，不過我真係唔想阻到你同你女朋友，我唔想令到你覺得我係一個唔識分寸嘅女仔，我唔想令到你覺得我煩，因為我知自己煩起上黎唔係個嗰都接受到，所以我唔想將自己最真實個面比你睇。
你成日都係我面前好緊張你女朋友、好緊張你地之間嘅關係，你地嘈交你又會搵我做出氣袋，但其實我次次同你傾完我個心都係唔好受，哈哈我係咪好無用？我宜家一路寫緊呢張聖誕卡又一路喊緊，係啦，仲有幾日就下一年啦，除咗聖誕之外，我希望係新嘅一年可以搵到一條屬於我同你之間啱嘅路，我希望你可以用唔同嘅身份陪我行埋落去，亦都想你之後會順順利利，無論係你人生嘅邊一面都好，我都希望你一帆風順。
進或退，我們都不踐踏愛。
Hidy」
我坐係張床到望住呢張聖誕卡，一時唔識得反應，亦都無諗過Hidy突然會同我真情流露。
我望住張卡諗咗好耐，到底我同Hidy可以點，所以我係到睇熊仔頭拍嘅《第三者故事》。
去到最後，何歡喜同雪雪講，你同你男朋友分手我就會同我女朋友分手，雪雪問返何歡喜點解你唔分手先，點解你唔肯為我博一次。
即使我地之間有幾鍾意都好，我地都無辦法完全咁相信對方。
如果我分咗手，但你無分到手，咁我點算？
正如雪雪最後所講，「你唔係唔鍾意我呀，你唔係唔鍾意你女朋友，你最鍾意個嗰係你自己呀」。
最後我得出一個結論，係時候要為呢段錯愛寫上一個句號。
我將Hidy嘅WTS，電話，IG全部都封鎖哂。
對唔住，可能我之後會後悔，但係我一定要咁做。
我地已經錯咗好耐，而呢一刻我覺得唔可以再錯落去。
我唔想再耽誤到佢嘅人生，女仔嘅青春有限，唔可以再將時間浪費係我呢個賤人身上。
我好想係呢到同你講一聲對唔住，我粒聲唔出就封鎖咗你，無理過你嘅感受。
我唔期待你會原諒我，就算你唔原諒我都唔緊要，我只係希望你之後會過得開開心心，一帆風順。
我同你係男神個嗰故到識，個陣你只係一個傻更更嘅讀者，我都只係一個屎忽痕無野做嘅作者，我都唔記得我地個陣點解會傾起上黎。
正如我之前所講，燕同我就好似兩個人格咁，我可以用燕嘅角色去講一啲我現實根本就唔夠膽講嘅野。
所以我用燕仔或者阿燕嘅身份不斷咁係到撩人，咁啱就撩中咗你，我仲記得你個陣嘅頭像係用snapchat其中一個filter影嘅。
撩撩下我都無諗過自己真係鍾意咗你，不過有時就係咁，玩下玩下就會玩出火，想避都避唔到。
我同你有無識咗三年或者四年？對唔住不過我都真係唔記得啦，但係我記得自己係一個仆街。
我同咗你一齊，無幾耐我就走咗。跟住我返黎，你有男朋友，然後我又走咗。跟住我又返黎，你有男朋友，我亦有女朋友。
但惟一無變嘅就係我地之間嘅愛。
我封鎖你應該有半年？差唔多啦，期間我有時都會解鎖睇下你IG嘅profile，睇完之後再封鎖返。
不過我諗都係時候要move on啦真係，就好似我寫呢個故嘅目的一樣。
或者你已經唔記得咗我，或者你無諗過原諒我，或者你根本就唔再care。
可能係我一廂情願，但真係對唔住。
我只係唔想你會因為我而停低，所以我選擇做個壞人，徹徹底底咁離開你，因為我知你值得擁有更好嘅男仔。
進或退，我們都不踐踏愛。
容許我送另一句歌詞比你，作為我地之間最後嘅道別。
愛是盲目不過卻不傻。
最後一次同你講，對唔住，之後我地就做返陌生人。
希望你以後會好似你咁名咁樣，每日都開開心心 (雖然我知唔係呢個心字)。
送比你，十面埋伏，我地以後都唔洗再為愛奔波。
https://www.youtube.com/watch?v=QGHB-5e37Fw