我嘅大學生涯 (有甜): 派對

時間黎到聖誕Party嘅日子，我接近三點幾四點先起身，因為琴日飲完酒黎。
 
今日難得大家都好準時，買埋野食同酒水之後就一齊入去上次個間Party Room。
 
Chris：「聖誕快樂！」佢企起身舉高個杯。
 
大家：「聖誕快樂！」
 
乾杯之後男仔就係到打機，女仔就係到唱K，等到夜少少先再集體遊戲同交換禮物。
 


而我今日嘅目的除咗飲酒之後就係飲酒。
 
阿洛：「又飲？阿燕你好似飲咗三罐啦喎。」
 
Chris：「係囉，你咁快飲哂咁我地一陣飲咩呀。」
 
我：「唔夠嘅話一陣再叫呀，最多我比錢。」我繼續飲罐啤酒。
 
佢地望咗對方一眼，但都無再講啲咩，繼續係到玩火影。
 


明仔：「做咩事呀？琴日平安夜有野發生？」
 
我：「無事發生。」
 
明仔：「你個樣成個苦瓜乾咁，好難說服我無事發生喎。」
 
我：「琴晚同Hanna玩得開唔開心？我見佢IG Story到po自己去咗迪士尼喎。」
 
明仔：「梗係開心啦，同你講樣野呀，佢琴晚已經同咗條仔講分手。」
 


我：「哦？估唔到喎，咁條仔有咩反應？」
 
明仔：「哈慘囉，佢成晚不斷打比Hanna，喊哂口咁求Hanna唔好分手。」
 
明仔：「不過Hanna應該真係忍咗佢好耐，好絕情咁封鎖埋佢。」
 
我：「絕情啲咪幾好，等佢可以完全死心。」
 
所以你宜家都要我完全死心，係咪？
 
我拍一拍Chris個膊頭，示意佢比個手制我，我揀咗帶土作為我嘅角色。
 
阿洛：「帶土？咁睇黎我要用你師傅啦。」佢揀咗波風水門。
 
我笑咗笑，終極風暴4呢隻game我都唔知自己玩咗幾耐，所以阿洛好快就比我收咗皮。


 
阿洛：「點解會咁嘅...？」
 
Chris：「哇...乜阿燕你玩火影咁勁架咩？」
 
我：「時間都差唔多啦，我地食埋野就玩交換禮物？」
 
然後佢地就排隊去廁所洗手，我地今次亦都係叫咗Pizza。
 
我收返好啲手制，咁啱望到帶土個樣，螢幕上嘅佢亦都好似望住我一樣。
 
無咗琳，呢個世界仲有啲咩意義？
 
因為大家都好肚餓，啲Pizza好快就食哂，清理埋啲野之後就交換禮物。
 


我嘅禮物係比羅拉，不過老實講我都係鳩買，我都唔知佢鍾意啲咩。
 
Chris：「等我抽第一個收禮物嘅人先...係珍妮！邊個送比珍妮嘅？」係明仔。
 
明仔：「我只能夠講呢件禮物你會好鍾意。」
 
珍妮：「哇！你點知我想要呢隻香水架？」佢開心到拎住支香水攬住明仔。
 
明仔：「睇你IG都知啦，成日話想要想要，OK抽下一個。」
 
正如之前所講，逐個逐個講就講到出年都未講完，所以我都係決定Skip哂。
 
羅拉：「多謝你呀阿燕，條頸巾我好鍾意。」佢已經戴係條頸到。
 
我：「唔洗，你鍾意就好啦。」


 
Chris：「咁邊一個送比阿燕架？」
 
麻呼：「係我。」佢企起身，拎住份禮物行到我面前。
 
我拆開份禮物，入面有一隻公仔同一張聖誕卡，隻公仔係進擊的巨人嘅主角，艾主席。
 
麻呼：「我覺得你同佢好似，兩個都一樣咁嚮往自由自在，佢不斷咁向前行，就好似你呢隻燕不斷向前飛。」
 
我：「係咩，多謝你呀麻呼，張卡我返到屋企先睇。」
 
阿贏：「我地不如拎住自己份禮物影張相呀？」
 
呢張相我到宜家都仲係手機入面，亦都好感激有呢班人係我人生入面出現。
 


念茲在茲，記住 我會。
 
玩多陣之後就各自解散，但係我無返屋企，買咗一打醇滑嘉士伯去返同阿蓉上次散步個嗰海濱到坐。
 
一個聖誕節無咗兩個女朋友，到底係乜野感受？
 
飲完一罐又一罐，我只係想令到自己醉，要知道有時候保持清醒唔係一件好事。
 
麻呼：「阿燕？」
 
我：「麻呼...？點解你...會係到...？」我半醉咁講。
 
麻呼：「我有啲野想同你講，見你snapchat個位置係呢到，所以就諗住過黎撞下，估唔到真係搵到你。」
 
我：「睇黎我要del咗snapchat啦...咁容易就暴露自己位置...」
 
麻呼：「但係你做咩飲咁多呀？頭先見你係Party room已經係咁飲。」
 
我：「你做咩咁留意我...？」我望住佢。
 
佢坐係我隔離，開咗罐醇滑嘉士伯，望一望個海，然後再望返住我。
 
麻呼：「因為我發現自己無辦法唔留意你。」
 
佢用個口將啖嘉士伯傳落我個嘴到。