我嘅大學生涯 (有甜): 貪心

「生日快樂！」Hidy Wts我，我先意識到原來已經係十二點。
 
我：「多謝你喎，你係第一個同我講。」跟住明仔阿洛佢地就係Ocamp group 到講。
 
Hidy：「有啲咩生日願望呀？」
 
我：「雖然話就話講出黎就唔靈，但個願望關你事。」
 
Hidy：「我估你個願望…唔係放低我，就係放棄我。」
 


我：「差唔多，我許願希望可以同你行返條啱嘅路囉，可能啱嘅路就係放低你啦，我都唔知。」
 
Hidy：「haha，我都唔知，但係我個心好痛，可能我自己都放唔低。」
 
我：「我覺得你同你男朋友好sweet，唔似我呢啲路人甲，你唔會care我感受。」
 
Hidy：「唔係，雖然佢好好，但係同你一齊嘅感覺，開心過同佢一齊。」
 
我：「可能我地都真係要move on啦，或者死咗就唔洗煩咁多。」
 


Hidy：「你個靚靚女朋友會唔捨得架，我都唔捨得，不過我係Hidy haha。」
 
我：「如果個身份調返轉會有幾好。」
 
Hidy：「呢個世界無咁多如果，早啲瞓啦，聽日你仲要同女朋友出去玩。」
 
我：「比多三分鐘我，幫我聽咗呢首歌。」
 
Hidy：「嗯，聽完我就瞓啦，goodnight。」
 


Hidy：「阿燕我愛你，我諗呢次會係最後一次講，之後我地就做返朋友。」
 
https://www.youtube.com/watch?v=lZU6DfvssmI
 
一生最愛不會是白雪公主
時間競賽想和你纏綿兜圈
兜兜轉轉結局不是你
其實只是逢情作戲
若有下世大概不會再逃走
At that right time我會捉緊你手
在你想委屈轉身之後我會努力想得通透
別再當我密友

我唔知我同佢可以維持到幾耐，即使呢段關係係錯，但請容許我繼續錯落去。
 


或者我同佢都只係太貪心，我想捉緊你，同一時間我唔想失去佢。
 
阿蓉知道咗可能會對我好失望，但愛咗就係愛咗，你鍾意食A餐同時又鍾意食B餐，咁你又可以點揀？
 
野食你都話可以擲公字決定，愛情唔通又可以咩？
 
係我搵到正確答案之前，比我徘徊係相愛跟錯愛之間，直到我由月球上的人變成月球下的人。
 
阿蓉：「送比你架，你睇下鍾唔鍾意。」佢買咗一隻大眼仔嘅公仔比我。
 
我：「我諗係你鍾意咋掛。」
 
阿蓉：「咩喎，咁人地唔知你鍾意咩公仔呀嘛，同埋我鍾意嘅野咪姐係你都鍾意囉。」
 
我：「咁都得？不過多謝你。」我錫一錫佢塊面。


 
阿蓉：「你唔好怪我直接呀，其實我今日咩都無計劃...主要睇你想今日去邊到慶祝...」佢耷低頭咁講。
 
我無怪佢，因為都知佢第一次拍拖無乜經驗，所以唔識plan行程或者搞驚喜都唔出奇。
 
我：「唔緊要啦，其實我今日都無乜邊到想去，呀...唔係，我有個地方想你陪我去。」
 
係新聞就成日見到佢，都想親眼去睇下但一直都無時間。
 
阿蓉：「哇，搞咩今日咁多人？唔洗返工咩。」 
 
我：「你真係無睇新聞喇，啲人為咗黎睇佢呀。」
 
以前叫叮噹，宜家叫多啦A夢。
 


細過個陣已經好鍾意多啦A夢，成日叫阿媽買豆沙包比我食，又幻想如果有隨意門，我就唔洗日日早起身返學。
 
最近佢地為咗記念多啦A夢100周年，同埋作者誕生90 週年而係星光大道整咗個展覽。
 
好多人即刻黎呢到打卡，Po個IG話真係由細睇到大，係童年回憶。
 
雖然我唔知有幾多人真係由細睇到大，但至少我係。
 
再懷念林保全叔叔嘅配音，佢配音嘅叮噹先係真正嘅叮噹。
 
我同阿蓉都影咗啲相，不過好快就走咗，因為真係好多人。
 
我：「如果你可以得到佢其中一樣法寶，你會想要啲咩？」佢RR頭諗左陣。
 
阿蓉：「嗯... 我諗應該會係隨意門，咁樣我想去邊就去邊，唔洗比錢去旅行，而且仲可以一打開門就可以係你屋企。」


 
我：「哇，咁我裝十個鎖都唔掂。」
 
阿蓉：「嘻嘻，咁你呢？」今次到我諗左陣。
 
我：「我應該會係如果電話亭。」
 
如果我可以一早知如果我咁樣做，個結果會係點嘅話，就好了。
 
阿蓉：「幾似你會揀嘅野，只不過，世界無咁多如果。」
 
所謂有早知就無乞衣，如果我知六合彩結果，我一早發咗達。
 
正因為我地唔能夠預知未來，所以只能活在當下。
 
我：「嗯，但如果我真係可以用一次如果電話亭嘅話，我會同個電話亭講如果阿蓉可以一世都幸福就好喇。」
 
阿蓉：「我宜家都已經好幸福。」