我嘅大學生涯 (有甜): 成長
搞完之後佢就瞓著咗，但隻手仍然拖住我，睇黎佢真係好唔捨得巨龍還在兄。
但有啲野唔係你盡咗力就做得到，有啲人唔係你盡咗力就留得低。
我望住Candice就好似望住以前嘅自己一樣。
好傻好傻咁為咗一個人而付出自己嘅全部，但試問又有邊個未天真過呢。
曾經我都好似Candice咁，好鍾意一個人。
個陣我中三，亦都係我第一次鍾意人，我同佢晚晚都會傾計，講下人壞話，抱怨又要考試，一齊玩手機Game，影相分享自己去咗邊。
星期六日我會約佢出街，而佢亦都會應承我，去博物館，去掃街，去食糖水，去睇戲，接近咩都做齊哂。
有時佢仲會翹住我行，甚至唔小心拖咗手。
旁眼人見到我地都會覺得我同佢已經一齊咗，只有我知仲差表白呢一步。
可惜，當我下定決心表白嘅一日，佢wts頭像轉咗。
係佢同一個男仔係迪士尼城堡面前，嘴對嘴嘅親吻照。
但個男仔唔係我。
公主係城堡入面同王子一齊，騎士就係城堡出面比人拋棄。
唔屬於你嘅野，就算你盡力掙取都好，都唔會屬於你。
好似奧運咁樣，有邊個運動員唔係日練夜練，日操夜操。
但最後贏嘅只會有一個，就算幾努力都好，唔得就係唔得。
我諗野諗到差唔多成晚無瞓，係天光之前瞓咗差唔多兩個鐘咁上下。
Candice：「唔...阿燕...」佢瞇住眼講，事實上兩隻眼已經係腫哂。
我：「起身啦？刷牙洗面跟住Check out啦。」
Candice：「你塊面...Sorry呀...」佢摸一摸我比佢打到紅哂嘅面。
我：「唔緊要，好小事姐。」
如果安慰到你嘅話，比你打多兩巴又有咩所謂。
佢梳洗完之後就同我離開間酒店，同佢去麥記食個早餐之後就收隊。
Candice：「好多謝你琴日陪我，但打到你咁真係好對唔住。」佢仲係有啲唔好意思。
我：「都話咗無事，我最擔心嘅係呢個仲有無事。」我指一指佢個心口。
Candice：「仲有架，雖然暫時止咗痛，但係返到屋企可能又會再痛返。」
我：「如果你仲需要止痛藥嘅話，可以問我攞。」
Candice：「嗯，不過人唔痛下就唔會識得成長，我諗我都要學識面對。」
「好多謝你。」
我諗我同Candice之間嘅戲份係呢一刻就結束，因為佢已經唔需要我再去幫佢止痛。
雖然同佢識得只係短短三個月，交流亦都唔算太多。
但係我好多謝佢係最唔開心嘅時候會諗起我，叫我去陪伴佢。
好多時我地有心事又或者一啲唔如意嘅事，我地都唔知可以同邊個講。
我唔開心，但係我無必要將我唔開心嘅野講比人地知，明明人地咁開心。
所以我地選擇收埋係心入面，慢慢咁忍住佢就算。
但好似熊仔頭咁樣，一直唔開心落去，我驚你地唔識得開心返。
同一時間無人肯聽我講又可以點？
同我講，正如之前咁講，我願意接受你地所有嘅負面情緒。
我唔係扮偉大，我都係個鍾意放負嘅人，所以我好明白放負嘅人諗緊啲咩。
有時我地要嘅唔係確實嘅意見，因為聽完都唔會改，但我地只係想要一個人向聽我呻。
即使我好嬲你地唔Follow我IG都好，我都願意繼續諗爆頭去寫野比你地睇。
可能你地會覺得呢個故對比起男神個故無咁好睇，少咗個種周圍扑野嘅狂妄。
始終之前年少輕狂，宜家嘅我更著重心靈上嘅寄託。
我有啲明白郭富城嘅感受，佢演唱會比人屌唔唱啲出名嘅歌，揀嘅歌都係比較少人聽嘅。
佢可以唱出名嘅歌，我都可以章章都寫扑野，但我地都只係唔想再困住係以前，用返以前成功嘅一套。
而且之前成功嘅一套唔代表宜家用返都會成功。
睇故都只不過想搵一個寄託，搵緊一個共鳴，將現實無可能實現嘅野幻想出黎。
我唔期望我個故可以安慰到你地，事實上我寫呢個故只不過係用黎懲罰我自己。
四年前嘅我因為男神個故而做錯太多野，四年後嘅我寫呢個故提醒自己唔好再重蹈覆轍。
要擁有必先懂失去怎接受，我將一切由零開始，失去一堆讀者，接受自己垃圾，期待能夠再次擁有你地。
呢個故寫嘅大部分都係我嘅經歷同感受，我唔係一個擅長表達自己嘅人，只係識得用故仔嘅方式講出黎。
雖然我又係到講咗啲完全唔關故仔嘅野，但無辦法，我個人就係比較多內心戲。
我只係希望你地可以係故仔入面感受到我嘅感受，當然睇得開心都好重要。
我唔知以前嘅讀者仲有無睇，或者你地可能已經走哂，即使係咁我都覺得係我欠咗你地。
呢個故同一時間當係我彌補返比你地，我點死都會寫埋呢個故先死。
又或者你地係新讀者，無啦啦聽個作者係到唔知up乜9，一心以為有更新結果比啲咁嘅野我睇。
體諒下燕仔多愁善感，當係認識一下呢個連自己做緊啲咩都唔知嘅作者。
由我決定重新寫返故個刻，我知道所有野都已經變哂，亦都知我個故可能根本就無人想睇。
但係我仍然想再寫，唔單止想同比我傷害過嘅人講對唔住。
更重要嘅係，我唔想對自己唔住。
Just enjoy the story