我嘅大學生涯 (有甜): 分組
唔怪得佢地唔比我住Hall，我係屋企行十五分鐘就到咗間大學。
之前中學都有跟大隊參觀過，不過我唔會知邊間課室打邊間課室，所以就去問人。
我：「唔好意思呀，我想問呢間課室係邊呀？」
個男仔好好人咁帶埋我入去，而我終於體會到啲人點解成日講大學啲課室成間大禮堂一樣，上堂上到好似聽音樂會咁，幾十人，甚至一百個人一齊上堂。
新黎新豬肉，第一時間梗係望下其他人，有啲同我一樣豬下豬下咁，應該都係Year one，有啲個Professor一路講，佢就一路睇手機，有啲好認真咁聽同Jot Notes，仲坐最前排。
Professor：「You guys need to hand in the group project before the end of October. Please feel free to find your groupmates now, each group around 4 to 5 students. 」
呢一句可能係我上咗兩個鐘堂惟一聽得明嘅英文，我左望右望，見到其他人都係到左望右望，大家對搵groupmates都好似有啲怕羞。
我諗大家都係最驚分完組但係條友唔做野。
繼續左望右望嘅時候，咁啱我同一個女仔對到眼，我做手勢指一指佢，再指一指自己，佢點點頭，然後我就行過去。
我：「我叫阿燕呀。」
Candice：「我叫Candice，我地仲要搵多2個人。」當我地頭痛緊搵邊個好嘅時候，有2個人走咗過黎。
Spencer：「Hello我叫Spencer呀，想問下你地係咪暫時2個？介唔介意比我同佢Join你地？」
Ruby：「我叫Ruby。」
Spencer同Ruby睇落去已經成個老屎忽咁，我已經感受到自己準備比人Carry。
Candice：「無所謂呀，咁你地比電話我，我宜家開個wts group。」
相比之下，我同Candice就成個初出茅廬嘅傻仔。
交完份分組名單之後就可以走，佢地話之後再約出黎傾題目，所以暫時都無野做。
宜家得我自己一個，唔知去邊到好，但係又未夠鐘上堂。
仲煩腦緊返唔返屋企嘅時候，結果又係個嗰阿蓉搵我。
阿蓉：「Sorry呀，係我語氣重咗，你唔好嬲我啦。」
我：「我無嬲你，我黎唔到應該同你講聲先，我都有責任嘅。」
阿蓉：「你上完堂未呀？我想黎搵你。」
佢約咗我係學校出面食野，因為佢話佢作為過來人，知道學校啲canteen有幾難食。
阿蓉：「阿燕。」佢今日著咗件oversize嘅洗水Tee同條短褲。
我：「哇你無著褲呀？」
阿蓉：「shhhh！我有著呀！」佢揭起件衫少少，證明是有著的。
我：「oh，但你今日好靚。」
阿蓉：「姐係我之前唔靚啦。」
我無答佢，只係拖起佢隻手，好似啲gentleman咁嘴咗佢隻手一啖。
我：「我唔想讚壞你咋，雖然你真係好靚。」
阿蓉：「衰人，我好肚餓呀，去食野啦。」佢拖住我隻手向前行，請問這就是男友視角嗎？
佢帶咗我去食車仔麵，都幾多人，我懷疑大部分都係學生，同我地一樣，唔想食學校啲野先出黎食。
阿蓉：「係呢阿燕，其實你係一個點樣嘅人黎架？」
我：「我？應該唔係一個好人，但我又唔會話自己係壞人。」
阿蓉：「咁你拍過幾多次拖架？」
一次定無數次？這是個問題。
我：「我拍過一次咋，你呢。」
阿蓉：「一次？睇唔出喎，明明你個日仲...」佢意思指我拉佢入廁所測試手速個次。
我：「真架，咁你又拍過幾次？」
阿蓉：「我...我無拍過拖...」佢含糊咁講，再不斷塞啲麵落個口到。
我：「邊有可能呀，你咁靚女，實大把人想追你啦。」
阿蓉：「真架，或者係我個人太宅...又成日掛住打機...所以識唔到男仔囉...」
我：「咁你又上莊？上莊嘅人唔係應該好YO好玩得架咩？」
阿蓉：「我上莊係因為我真係好想令到人地覺得電競其實係有得發展，而唔再係日日打機嘅廢青呀。」
佢激動咁望住我，唔係憤怒個種激動，而係滿懷大志，雄心壯志嘅個種激動。
嘛，我聽到之後有啲於心有愧，無理由要玩一個咁天真又未拍過拖嘅細路女，雖然佢大過我。
我：「咁...不如我地做朋友就算，你都係專心上莊啦。」
阿蓉：「吓...？」佢呆咗咁望住我。
我：「又或者我都係同你坦白啦，我唔係好人亦都唔係咩壞人，我淨係識玩人，個次講嘅野只係呃你，我本身都無諗住同你一齊。」
佢無表情咁企咗起身，隻右手一把扻落我塊面到，然後就走咗出去，其他人即刻O撚咗。
我不以為意，繼續食我碗車仔麵，雖然係有啲痛。
阿叔：「細佬，仲係到食，仲唔追出去？」一個淨係著住白色底衫嘅阿叔問我。
我：「我同佢朋友黎架咋。」
阿叔：「唉，阿叔當年都好似你咁成日撩女仔，仲一次撩幾個添。」
我無聽佢講，繼續食麵。
阿叔：「但係我之後先發現，有啲野到你無咗嘅時候先會識後悔架。」
阿叔：「我睇佢都係個好女仔黎呀，錯過咗就無架啦。」
「阿叔唔收你錢，快啲追返人啦。」
當我內心開始有少少動搖嘅時候，其他人不斷叫我追啦追啦，甚至仲拉起我個人。
唉死就死，我跑咗出去，隱約聽到個阿叔講「氹返掂之後多啲黎幫襯呀」。
好快就見到阿蓉個背影，我跑過去捉住佢隻手。
我：「對唔住呀，你唔好嬲啦，雖然我頭先講嘅野係真...但係你比次機會我呀，我會改架。」
個女仔擰轉身，呆咗咁望住我，仆你個街另一個人黎嘅喂！
阿蓉：「你連我都認錯！！！」真嘅阿蓉企咗係條馬路對面望住我。
我講咗句Sorry認錯人之後就過馬路搵返阿蓉。
阿蓉：「你仲過黎做咩呀，你連我都認唔到。」佢轉身諗住走。
我：「你唔好嬲啦，係我唔好，我有去睇醫生架，但個醫生話我兩隻眼得返五成視力...所以我先會認錯...」
阿蓉：「吓...真架...？」佢望住我兩隻眼，個樣仲好慘，成隻阿愁咁。
我：「嗯...所以我之後就要你做我兩隻眼，幫我睇下有無其他靚女。」
聽到上一句，佢好激動咁點頭。
聽埋下一句，佢好激動咁打我。
我：「玩下咋玩下咋，你不要再打了。」我將佢攬住。
阿蓉：「到底你幾時先係認真...每次都玩下玩下...我都唔知你邊句真邊句假...」
我：「我以後對你講嘅野，都會係真。」
如果我可以上掌門人個到玩口不對心我至勁嘅話，我諗我已經拎咗好多獎金。
阿蓉：「你可唔可以應承我，你最愛嘅人一直都係我。」
曾經有個女仔同我講過，如果你做唔到嘅話，就唔好亂咁比承諾人地。
自此之後，我就無再講啲我根本唔會做，或者根本做唔到嘅野，承諾可以呃到人，但呃唔到自己。
宜家啲人開口埋口就將承諾掛係嘴邊，「我應承你 我淨係鍾意你一個」「我應承你 我會一直陪住你」「我應承你 我以後都唔會離開你」
實際上真係做得到嘅人，少之又少，如果你無心嘅話，就唔好亂比承諾，因為你傷害緊其他人。
我：「我呢一刻無辦法應承，但如果你願意比機會我嘅話，我會好努力咁去試。」
阿蓉：「嗯，我願意。」
我：「第時真係分手，我地去返個間車仔麵到食囉？但到時我唔會再加芝士腸。」
佢學alma咁點點頭，但補咗句。
阿蓉：「不過我先唔會比你同我分手呀。」
咁我地宜家真係一齊啦喎。